Asif İbrahimov: "Konkret olaraq, dövlət qurumlarına bahalı avtomobillərin alınması qadağan edilməlidir"
5 iyul 2024-cü il tarixində "Azər-Türk Bank" ASC-nin balansında olan nəqliyyat vasitələrinin hərraca çıxması haqqında elan açıqlanıb. Satışa "Azər-Türk Bank" ASC-yə məxsus 4 nəqliyyat vasitəsi çıxarılıb. Elanda yazılıb ki, beh "Azər-Türk Bank" ASC-nin göstərilən hesabına köçürülməlidir.
Hərraclarda iştirak etmək istəyən şəxslər aşağıdakı sənədləri hərracın başlanmasına ən geci 3 bank günü qalanadək Əmlak Məsələləri Dövlət Xidmətinin Əmlak Xidmətləri Məkanına təqdim etməlidirlər :
Hüquqi şəxslər üçün təsis sənədlərinin müəyyən olunmuş qaydada təsdiq edilmiş surətləri;
Fiziki şəxslər üçün şəxsiyyəti təsdiq edən sənədin surəti;
Hərraclarda iştirak etmək üçün sənədlər hüquqi və fiziki şəxsin nümayəndəsi tərəfindən verildiyi təqdirdə o özünün hərracda iştirak etmək istəyən şəxsin adından hərəkət etmək hüququnu təsdiq edən sənəd (etibarnamə) təqdim etməlidir;
"Azər-Türk Bank" ASC-nin hesabına behin köçürülməsini təsdiq edən ödəmə sənədinin surəti.
Hərraca çıxarılan maşınların markası AudiA6-dır, buraxılış illəri isə 2015-dir. Təbiidir ki, dövlət bankı bu maşınları yeni vaxtı çox baha qiymətə alıb və cəmi 9 ildən sonra onları əvvəlki dəyərindən azı 10-15 dəfə ucuz qiymətə - 15 min manata satır. Çox maraqlıdır, olmazdı ki, dövlət qurumları bir az qənaət edib, əvvəlcədən nisbətən ucuz maşın alsınlar? Ən əsası isə, bəyəm 9 ilin maşınını sürmək olmaz ki? Bütün bunlar dövlətə əlavə yük sayılırmı?
Beynəlxalq idarəetmədə sistemləri üzrə mütəxəssis, iqtisadçı Asif İbrahimov "Bakı-Xəbər"ə açıqlamasında bildirdi ki, hər hansı bir dövlət müəssisəsində, dövlət bankında, dövlətdən maliyyələşən təşkilatlarda bir məhsulu əldə etmək üçün dövlət satınalmaları haqqında qanuna əsasən tenderler, kotirovkalar və bu istiqamətdə müsabiqələr keçirilir: "Bunun əsasında hər hansı mal, məhsul əldə olunur. Bu məhsullar alındıqdan sonra balansa oturdulur, illik olaraq hər il amortizasiya xərcləri çıxılır. İldən-ilə maşının bazar dəyəri aşağı düşməyə başlayır. Bir müddətdən sonra amortizasiya məsələləri dəyəri aşağı düşdükcə artıq balansdan silməyə əsas götürürlər. Yəni bu avtomobilləri satışa çıxarıb, faktiki dəyərindən aşağı qiymətə satırlar. Təbii ki, avtomobillərin markalarına baxdıqda 2015 - cı ildə alınmış "AudiA6" markalı avtomobilin çox yüksək qiyməti vardı. Bu israfçılıqdır. Ümumiyyətlə, burda hökumət tərəfindən meyarlar tətbiq olunmalıdır. Məsələn, xidməti avtomobil aldıqda, hansı tip avtomobil alınmalıdır, hansı qiymətdən yuxarı olmamalıdır. Əgər bu meyarlar yoxdursa, əlində səlahiyyət var ki, istədiyi qiymətdə avtomobili alsın. Bu məsələlərə digər tərəfdən də baxsaq, bilirsiz ki, artıq Azərbaycanda avtomobil istehsalı da həyata keçirilir. Bu sahəni də təşkil etmək üçün dövlət qurumlarının xüsusi qanunvericiliyi, sərəncamı və tapşırığı olmalıdır. Bu, sözlə olmur. Konkret olaraq, dövlət qurumlarına bahalı avtomobillərin alınması qadağan edilməlidir. Xüsusilə də qurumlar Azərbaycanda istehsal edilən avtomobillərin alınmasına məcbur edilməlidir".
Məhəmmədəli QƏRİBLİ
