Sosial şəbəkədə iş yerləri ilə bağlı elanlar günü-gündən artır. Lakin həmin elanlar heç də iş axtaranları qane etmir. Belə ki, narazılığa səbəb şərtlərin ağır olmasıdır. Əsas narazılıqlardan biri də iş saatının 8 yox, 10, 11 saat və daha çox olmasıdır.
Məsələn, elə bu yaxınlarda Cəlilabadda yerləşən "Green store" mağazalar şəbəkəsinin 400 manat əmək haqqı təklifi ilə 11 saatlıq iş elanı müzakirələrə səbəb olub. Qeyd edək ki, bu hal əksər iaşə obyektlərində müşahidə olunur. Az əmək haqqı ilə normadan artıq işçilər işlədilir. Bu isə əmək qanunvericiliyinə ziddir.
Elxan Əliyev: "Marketlərdə işçilər gündə 10-12 saat, özü də ağır iş rejimində işləyir"
Sosial sahə üzrə ekspert Elxan Əliyev "Bakı-Xəbər"ə açıqlamasında bildirdi ki, marketlərdə işçilər gündə 10-12 saat, özü də ağır iş rejimində işləyir: "Belə ki, həm bu 12 saatlıq iş rejimində, 1 dəqiqə də olsa, oturmaq icazəsi yoxdur və buna görə də oturacaq olmur, həm nahar fasiləsi 20 dəqiqəyədək olur, həm də həftədə yalnız 1 gün istirahət günü verilir. Həftənin 5 günü deyil, 6 günü iş günüdür. Gündəlik normal iş vaxtının müddəti 8 saatdan və buna müvafiq olaraq həftəlik normal iş vaxtının müddəti 40 saatdan artıq müəyyən edilə bilməz. Altıgünlük iş həftəsində həftəlik norma 40 saat olduqda gündəlik iş vaxtının müddəti 7 saatdan, həftəlik norma 36 saat olduqda gündəlik iş vaxtının müddəti 6 saatdan və həftəlik norma 24 saat olduqda gündəlik iş vaxtının müddəti 4 saatdan çox ola bilməz".
Eyyub Hüseynov: "Geyim mağazalarında, marketlərdə işçilərin istismar olunması halları həddən artıq çoxdur"
Azad İstehlakçılar Birliyinin sədri Eyyub Hüseynov hesab edir ki, mağazalarda çalışan işçilər istismar edilir: "Geyim mağazalarında, marketlərdə işçilərin istismar olunması halları həddən artıq çoxdur. Əmək haqları da ürəkaçan deyil, 450-500 manat. Ən ağrılı məqam odur ki, sınaq müddəti adıyla bir ay pulsuz işlədib sonra "işin bizi qane etmədi" deyib işdən uzaqlaşdırırlar. Dövlət orqanları gərək bu məsələləri nəzarətə götürsün, 8 saatdan çox iş vaxtı olmasın".
Günel CƏLİLOVA
