Çəkisindən narazı olanlar və ya ictimaiyyət arasında xarici görünüşünə, xüsusilə də çəki probleminə görə kompleks yaşayanlar öz psixoloji və fiziki rahatlıqlarını onları arıqladacaq və ya kökəldəcək qida əlavələri və dərman vasitələrində axtarmağa çalışırlar.
Məsələn, son zamanlar sosial şəbəkədə kökəlmək istəyənlər üçün mənşəyi bəlli olmayan qida əlavələri satılır. Qiyməti 18 manatdan başlayan bu məhsullara sahib olanlara 6-8 kiloqrama qədər çəki alacaqları vəd edilir. Ancaq kökəldici və arıqladıcı dərmanların insan səhhəti üçün təhlükəli olduğunu bildirir.
Qeyd edək ki, Azərbaycan Qida Təhlükəsizliyi Agentliyi (AQTA) tərəfindən bioloji aktiv məhsulların satışı ilə bağlı araşdırmalar aparılıb və həmin kökəldici qidalarda insan sağlamlığı üçün təhlükəli hesab olunan kənar kimyəvi maddələr aşkarlanıb.
Eyyub Hüseynov: "Bu məhsullar istifadəçilərin sağlamlıqlarında öz mənfi izlərini qoyub"
Azad İstehlakçılar Birliyinin sədri Eyyub Hüseynov "Bakı-Xəbər"ə açıqlamasında bildirdi ki, bu məhsullar istifadəçilərin sağlamlıqlarında öz mənfi izlərini qoyub: "Azərbaycan Qida Təhlükəsizliyi Agentliyi bu işləri nəzarətə götürüb. Qida əlavələri adı altında satılan bu məhsullar arasında yerli istehsala məxsus olanları da mövcuddur. Onu da qeyd edək ki, həm yerli, həm də xarici məhsullar Azərbaycan Qida Təhlükəsizliyi Agentliyinin reyestrinə daxil olmalıdır. AQTA onların bütün fəaliyyətini təqib etməlidir və icazəsi olmalıdır. Ancaq illər boyu bu məsələ ölkədə nəzarətsiz qalıb. Hazırda Azərbaycanda bu məhsulları satmağa davam edən şirkətlər var. İstehlakçı siyasəti ölkəmizdə bərbad gündədir. Ona görə də hökumət üzünü istehlakçılara çevirməli, mükəmməl istehlakçı siyasəti olmalıdır ki, Azərbaycan Qida Təhlükəsizliyi Agentliyinin ifşa etdiyi qida əlavələri adı altında zərərli məhsullar Azərbaycana daxil olmasın. Onu da qeyd edim ki, bəzən bu qida əlavələri çay paketləri şəklində də insanlara satılır. Bu məhsullardan istifadə edib, müxtəlif xəstəliklərə düçar olan yetəri qədər insanlar var. Vətəndaşlarımızı belə vasitələrdən uzaq durmağa çağırırıq".
Pərvanə Mustafayeva: "Arıqladıcı və kökəldici dərmanlardan istifadə edənlərin çoxu mədə-bağırsaq xəstəliklərindən əziyyət çəkir"
Pərvanə Mustafayeva "Bakı-Xəbər"ə şərhində bildirdi ki, arıqladıcı və kökəldici dərmanlardan istifadə edənlərin çoxu mədə-bağırsaq xəstəliklərindən əziyyət çəkir: "Bəzi firmalar 1 aya 10-15 kilo çəki atmaq adı ilə bu dərmanları sataraq insanları aldadır. İnsanlar bu dərmandan istifadə edərək tez çəki atacaqlarını düşünürlər. Amma onlar sağlamlıqlarını bilib-bilmədən risq altına atırlar. Bu gün bu dərmanlardan istifadə edən xanımların 90 faizi mədə-bağırsaq sisteminin pozulmasından əziyyət çəkir. Hətta onkoloji xəstəliklərə tutulanlar belə az deyil. İnsanlar anlamalıdırlar ki, artıq çəkidən azad olmaq üçün yalnız sağlam qidalanma metodundan, düzgün şəkildə balanslaşdırılmış proqramdan istifadə edərək həmin çəkiləri asanlıqla atmaq olur. Çəki almaq istəyənlər də sağlam qidalanmaqla kilo ala bilərlər".
Günel CƏLİLOVA
