Ilqar Orucov: "Imtahan sistemində beynəlxalq təcrübədən istifadə olunmalıdır, yeniliklər araşdırılmalı, öyrənilməli və imtahanlarda tətbiq edilməlidir"
"Bir il ərzində dövlət qulluğuna qəbul zamanı biliyə əsaslanan qiymətləndirmə formasından səriştə əsaslı qiymətləndirmə modelinə keçid edəcəyik". Bunu Dövlət İmtahan Mərkəzinin Direktorlar Şurasının sədri Məleykə Abbaszadə "Təlim VI inkişaf sistemində müasir çağırışlar" mövzusunda keçirilən forumda çıxışı zamanı deyib.
O bildirib ki, səriştə modeli xarici və yerli ekspertlərlə müzakirə olunub: "Hüquqi müstəviyə keçid üçün təxminən bir il vaxtımız var. Səriştə modelinə keçid edəndə qiymətləndirmə aparanda fəaliyyətin qiymətləndirilməsi də bu model əsasında aparılacaq. Prosesdə daimi təlimlərin mövcudluğu vacibdir".
Maraqlıdır, səriştə əsaslı qiymətləndirmə modeli nədir və buna keçid hansı zərurətdən yaranıb?
"Əmək bazarında biliklə yanaşı, səriştəyə ehtiyac duyulur, bu səbəbdən də səriştə əsaslı qiymətləndirmə modelinin tətbiq olunması çox vacibdir"
Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov "Bakı-Xəbər"ə açıqlamasında bildirdi ki, imtahan modellərində dəyişiklik edilməsi vacibdir. Artıq tələblər, yanaşmalar dəyişib. Imtahan sistemində beynəlxalq təcrübədən istifadə olunmalıdır. Yeniliklər araşdırılmalı, öyrənilməli və imtahanlarda tətbiq edilməlidir. Dövlət İmtahan Mərkəzinin dövlət qulluğu ilə yaxın gələcəkdə tətbiq edəcəyi model məhz buna əsaslanır".
Ekspert hesab edir ki, əmək bazarında biliklə yanaşı, səriştəyə ehtiyac duyulur. Insan yüksək biliyə malik ola bilər, ancaq qarşıladığı hansısa vəziyyətlə bağlı onun təcrübəsi, bacarığı olmadıqda çətinlik yaracanaq: "Bu səbəbdən də hesab edirəm ki, səriştə əsaslı qiymətləndirmə modelinin tətbiq olunması çox vacibdir. Belə bir modelin tətbiq olunması təqdirəlayiqdir. Dövlət İmtahan Mərkəzinin keçirdiyi imtahanlar kifayət qədər obyektiv, şəffaf, əlçatandır. Amma burada imtahan iştirakçılarının yalnız əzbər biliklərini yoxlamaq imkanına malikik, yeni məzmunlu imtahanlara ehtiyac var".
Həmsöhbətimiz bildirdi ki, dövlət qulluğunda çalışan şəxs daim yeniliklərlə tanış olmalı, öz biliyini inkişaf etdirməlidir: "Məlumdur ki, həkim və müəllimlərin biliyi 5 ildən bir yoxlanılır. Onlar sertifikasiya olunur. Ancaq bu qayda dövlət qulluqçularına şamil olunmur".
Günel CƏLİLOVA
