Kamran Əsədov: "Azərbaycan öz təhsil brendini dünyada tanıdacaq"
"İnkişaf etməkdə olan kiçik ada dövlətlərinin vətəndaşlarına Azərbaycan universitetlərində təhsil almaq üçün təqaüd imkanlarını genişləndirəcəyik". Bu fikirlər Azərbaycan Prezidenti İlham Əliyevin İnkişaf etməkdə olan kiçik ada dövlətlərinin "Dayanıqlı firavanlıq üçün istiqamətin müəyyən olunması" mövzusunda 4-cü Beynəlxalq Konfransının iştirakçılarına müraciətində yer alıb.
Müraciətdə bildirilib ki, indiyədək 10-dan çox inkişaf etməkdə olan kiçik ada dövləti Azərbaycanın İslam Əməkdaşlıq Təşkilatı və Qoşulmama Hərəkatının Üzv Dövlətləri üçün təqdim etdiyi Təhsil Qrant Proqramlarından faydalanıb.
"Xarici tələbələrin sayının artması Azərbaycan universitetləri arasında rəqabət mühitini inkişaf etdirəcək"
Mövzu ilə bağlı fikir bildirən təhsil eksperti Kamran Əsədov "Bakı-Xəbər"ə açıqlamasında bildirdi ki, Azərbaycanda ali təhsilin beynəlxalq reytinqi istiqamətində ciddi irəliləyişlər var. Azərbaycan dövləti ölkəmizdə ali təhsilin inkişafına dövlət səviyyəsində çox ciddi dəstək göstərir: "Azərbaycanın iqtisadi və siyasi gücü var. Azərbaycan ali təhsil müəssisələrinin beynəlxalq reytinqini daha da inkişaf etdirmək üçün xarici tələbələrin ölkəmizdə təhsil almasına imkan yaratmalıyıq. Xarici tələbələrin ölkəmizdə təhsil almasının Azərbaycan həqiqətlərinin dünyaya çatdırılmasında mühum rolu olacaq. Məlumat üçün bildirim ki, ölkəmizdə 11 minə yaxın əcnəbi tələbə təhsil alır. Bu kifayət qədər yaxşı rəqəmdir. Azərbaycanda təhsil alan əcnəbi tələbələrin sayının artması ölkə iqtisadiyyatına da öz təsirini göstərir. Onu da bildirim ki, Azərbaycan universitetlərində tədris azərbaycan dili ilə yanaşı, xarici dildə də aparılır".
Həmsöhbətimiz hesab edir ki, xarici tələbələrin sayının artması Azərbaycan universitetləri arasında rəqabət mühitini inkişaf etdirəcək: "Məlumdur ki, Azərbaycan buna qədər Qoşulmama Hərəkatına üzv olan ölkələrin tələbələrin ödənişsiz təhsilini təmin edir. Həmçinin, bir sıra dövlətlərarası proqram çərçivəsində xarici ölkə vətəndaşları ölkəmizdə ödənişsiz ali təhsil alır. Ödəniş həmin ölkə aidiyyəti qurumları tərəfindən həyata keçirilir. Bu yaxşı haldır. Beləliklə, Azərbaycan öz təhsil brendini dünyada tanıdacaq. Birmənalı şəkildə xarici ölkələrdən tələbə axını yaxşıdır. Bu, gələcəkdə ödənişli əsaslarla gələcək tələbələrin sayına da təsir edəcək. Prezident İlham Əliyevin inkişaf etməkdə olan kiçik ada dövlətlərinin vətəndaşlarına Azərbaycan universitetlərində təhsil almaq üçün təqaüd imkanlarını genişləndirməsi müraciəti təqdirəlayiqdir".
Günel CƏLİLOVA
