Azərbaycanda 9 mərtəbədən hündür yaşayış binalarının tikintisinin dayandırılması nəzərdən keçirilir. Milli Məclisin deputatı Vahid Əhmədov mediaya açıqlamasında qeyd edib ki, çoxmərtəbəli yaşayış binalarının tikintisinin dayandırılması üçün plan hazırlanıb: “Məndə olan məlumata görə, dövlətin bununla bağlı planları var.
Plana əsasən, ölkə ərazisində 9 mərtəbədən artıq binalar tikilməyəcək. Azərbaycan və Türkiyə seysmik zonada yerləşdiyi üçün bu cür qərarların verilməsi normal haldır. Həmçinin, binaların tikintisi zamanı elə mexanizm qurulmalıdır ki, Yaponiyada olduğu kimi dağıdıcı zəlzələlərə dözümlü olsun. Bütün bu kimi məsələlərə ciddi nəzarət olunmalıdır”.
Belə aydın olur ki, yeni plana əsasən Bakıda 9 mərtəbədən hündür bina tikilməyəcək. Çoxmərtəbəli binalara qadağa daşınmaz əmlak bazarına necə təsir edəcək?
“Hazırda Bakıda çoxmənzilli yaşayış binalarının tikintisi üçün yararlı torpaq sahələri məhdud saydadır və qiymətləri kəskin şəkildə bahadır”
Əmlak məsələləri üzrə ekspert Elnur Fərzəliyev hesab edir ki, binaların 9 mərtəbəli tikilməsi kimi bir qərar tikinti şirkətləri üçün maraqlı olmayacaq: “Müəyyən müddətdir ki, yeni tikili binaların 9 mərtəbədən hündür olmaması müzakirə olunur. Əslində, bu dəyişiklik şəhərin estetik görünüşü və təhlükəsizlik baxımından arzuolunandır. Sadəcə, bu məsələdə bir sıra problemlər mövcuddur. Hazırda Bakıda çoxmənzilli yaşayış binalarının tikintisi üçün yararlı torpaq sahələri məhdud saydadır və qiymətləri kəskin şəkildə bahadır. Torpaq sahələrinin baha olması isə yeni tikili binalarda mənzillərin qiymətinin artmasına səbəb olub. Ona görə də tikinti şirkətləri daha çox pilot layihələrə, yəni istismar müddəti bitən binaların sökülərək yerində yeni binaların inşa edilməsinə meyllidirlər. Bu halda tikinti şirkəti sökdüyü mənzilin əvəzinə köhnə binada mənzil sahibi olan vətəndaşa yeni binada daha böyük və tam təmirli mənzil verir. Bundan başqa, yeni bina tam hazır olan müddətə qədər mənzil sahibinə kirayə haqqı ödənir, köç və digər xərcləri qarşılanır. Tikinti şirkətləri məcburən çoxmərtəbəli bina tikirlər ki, sakinlərə verdikləri mənzillər qarşılana bilsin və köhnə mənzil sahibi üçün ödədikləri xərcləri yeni mənzilin satışından götürə bilsinlər. Ona görə də əmlak bazarında qiymətlər sabit deyil”.
Ekspertin fikrincə, binaların 9 mərtəbəli tikilməsi şərt kimi qoyularsa, bu, tikinti şirkətləri üçün maraqlı olmayacaq. Bu baxımdan köhnə binaların söküntüsü səngiyə bilər. Bu gün Bakıda istismar müddətini bitirmiş minlərlə çoxmənzilli köhnə tikili var. Bundan başqa, qəzalı kimi qeydə alınan binaların da sayı az deyil. E.Fərzəliyev onu da əlavə etdi ki, binaların 9 mərtəbəli olması mənzillərin qiymətini ən azı üç dəfə artıracaq. Bu isə vətəndaşlar üçün əlçatanlığın olmaması ilə yanaşı, tikinti şirkətlərinin iflasa uğraması deməkdir.
Günel CƏLİLOVA
