İrandan Azərbaycana narkotik keçirmək istəyən şəxs özünü bıçaqlayıb.
Dövlət Sərhəd Xidmətindən verilən məlumata görə, mart ayının 1-də saat 01:30-da Dövlət Sərhəd Xidmətinin “Göytəpə” sərhəd dəstəsinin və Dövlət Gömrük Komitəsinin Əməliyyat İstintaq Baş İdarəsinin əməkdaşlarının keçirdiyi birgə əməliyyat-axtarış tədbirləri nəticəsində 1 (bir) nəfər şübhəli şəxs qismində saxlanılmışdır.
Saxlanılan şəxsin Ağsu rayon sakini 1986-cı il təvəllüdlü Manafov Məmməd Ağahəsən oğlu olması müəyyən edilmiş, üzərindəki bağlamaya baxış zamanı ümumi çəkisi 17 kiloqram 600 qram narkotik maddə marixuana və 1430 ədəd psixotrop tərkibli Metadon-40 həbi aşkar olunaraq götürülmüşdür.
Martın 2-də saat 00:10-da Astara rayonu Alaşa kəndi yaxınlığında yerləşən sərhəd zastavasının xidməti ərazisində sərhəd naryadı tərəfindən naməlum şəxslərin İran İslam Respublikasından Azərbaycan Respublikası istiqamətində dövlət sərhədini pozmaları müşahidə edilmişdir. Aparılmış axtarış-əməliyyat tədbirləri nəticəsində ərazidən 90-BZ-775 dövlət nömrə nişanlı “VAZ-2107” markalı avtombillə uzaqlaşmağa cəhd edən Şirvan şəhər sakinləri 1975-ci il təvəllüdlü Əliyev Əli İsrafil oğlu, 2002-ci il təvəllüdlü Balayev Arif Alxas oğlu və avtomobilin sürücüsü 1987-ci il təvəllüdlü Mirzəyev Kamal Əliməmməd oğlu saxlanılmışlar. Şəxslərin üzərinə baxış zamanı 2 ədəd bağlamada ümumi çəkisi 10 kiloqram 155 qram narkotik maddə marixuana aşkar olunaraq götürülmüşdür.
Saxlanılarkən A.Balayev sərhəd naryadının qanuni tələblərinə məhəl qoymayaraq müqavimət göstərmiş, qaça bilməyəcəyini anladıqa isə üzərində olan bıçaqla özünə xəsarət yetirmişdir. A.Balayevə dərhal ilkin tibbi yardım göstərildikdən sonra Lənkəran Rayon Mərkəzi Xəstəxanasına təxliyə edilmişdir.
Mart ayının 2-də saat 02:10-da “Göytəpə” sərhəd dəstəsinin Yardımlı rayonu Zevin kəndi yaxınlığında yerləşən sərhəd zastavasının xidməti ərazisindən ümumi çəkisi 8 kiloqram 609 qram narkotik maddə marixuana və 63 qram civənin, saat 04:30-da “Horadiz” sərhəd dəstəsinin Füzuli rayonu Aşağı Yağlıvənd kəndi yaxınlığında yerləşən sərhəd zastavasının xidməti ərazisindən ümumi çəkisi 18 kiloqram 400 qram narkotik vasitənin ( 17 kq 400 qram marixuana, 400 qram heroin, 500 qram tiryək), saat 07:00 radələrində Astara şəhəri yaxınlığında yerləşən sərhəd zastavasının xidməti ərazisindən ümumi çəkisi 7 kiloqram 100 qram narkotik maddə marixuananın dövlət sərhədindən keçirilməsinin qarşısı alınmışdır.
Qeyd olunan faktlar üzrə əməliyyat-istintaq tədbirləri davam etdirilir.
