2023-2024-cü tədris ili üçün ali təhsil müəssisələrinin və AMEA-nın magistraturalarına qəbul imtahanının nəticələri açıqlanıb. İmtahanın nəticələri ötən illərdən fərqlidir. Belə ki, imtahan iştirakçılarının nəticəsi ürəkaçan olmayıb.
Magistratura pilləsinə keçirilən qəbul imtahanında tələbələrin əksəriyyəti aşağı nəticə göstərib. Cəmi 1 nəfər yüksək – 100 bal toplayıb. İmtahanda iştirak edənlərin zəif nəticə göstərməsinin səbəbi kimi onun fevral ayında keçirilməsi göstərilir. Həmçinin, informatika predmeti üzrə yeni tipli sualların məntiqi təfəkkür üzrə salınması narazılığa səbəb olub.
“Məntiq sualları texniki fənləri oxuyanlar üçün asan idi, ancaq humanitar sahədə oxuyanlar üçün…”
Təhsil eksperti Kamran Əsədov bizimlə söhbətində bildirdi ki, bu il ali təhsil müəssisələrinin magistratura pilləsinə qəbul olmaq üçün 19 mindən çox şəxs prosesdə iştirak edib. Ötən illərdən fərqli olaraq, magistratura pilləsində təhsil almaq istəyənlərin sayı artır: “Bu il keçirilən imtahanda test suallarını təhlil edərkən bəzi məqamlar ortaya çıxıb. Belə ki, magistratura imtahanında imtahan verənlərə təqdim edilən məntiq, xarici dil və informatika suallarının bir neçəsi əvvəlki illərdə istifadə olunmuş test tapşırığı idi. Bundan başqa Dövlət İmtahan Mərkəzinin nəşr etdiyi test bankında olan suallardan da imtahana düşmüşdü. Magistr imtahanı suallarını təhlil edərkən deyə bilərəm ki, suallar müəyyən ixtisaslı məzunlar üçün çətindir. Məsələn, məntiq sualları texniki fənnləri oxuyanlar üçün asan idi, ancaq humanitar sahədə oxuyanlar üçün çətin idi. Eyni hal, xarici dil sahəsində yaşanır. Humanitar sahədə oxuyan xarici dillə bağlı salınan sualları rahatlıqla həll edir, ancaq texniki fənnlərin məzunları çətinlik çəkirdi”.
Həmsöhbətimiz onu da əlavə etdi ki, bir neçə gün əvvəl keçirilən magistr imtahanında informatika fənnindən salınan suallar “Microsoft” və Windows proqramının tərtib etdiyi son suallar idi. Müasir dövrün tələblərindən biri gələcək tədqiqatçıların, elm adamlarının İKT bacarıqlarının formalaşmasıdır. Ancaq ali təhsil müəssisələrində informatika yüksək səviyyədə keçirilmir: “Magistratura imtahanında informatika fənnindən düşən suallar bakalavrlara belə keçilməyib. Bu, təbii ki, ciddi bir problemdir. Hesab edirəm ki, magistratura imtahanına ixtisas sualları əlavə edilməlidir”.
Günel CƏLİLOVA
