Polisin fəaliyyət sahəsi çox genişdir. Cinayətkarlıqla, narkotiklə və başqa neqativlərlə mübarizədə Azərbaycan polisi sözün həqiqi mənasında hünər göstərir. Bu gün Azərbaycanda polis narkomaniyaya qarşı yalnız inzibati yolla mübarizə aparmır, eyni zamanda maarifçilik üsulu ilə də mübarizə aparır.
Azərbaycan polisi müxtəlif layihələr çərçivəsində müxtəlif auditoriyalarda, ali və orta məktəblərdə, müəssisələrdə narkomaniyaya qarşı maarifçilik tədbirləri həyata keçirir, yeniyetmələri, gəncləri bu yolla narkotiklə mübarizəyə təşviq edir.
Maraqlıdır ki, Azərbaycan polisi məktəblərdə narkotklərə qarşı mübarizə ilə bağlı maarifçilik tədbirləri çərçivəsində şagirdlərə ədəbiyyatımızla, tariximizlə, tarixi şəxsiyyətimizlə, mətbuat tarximizlə əlaqəli məsələləri də təbliğ edir. Şagirdlərlə bu yöndə sual-cavab aparır, onlarla hərttərəfli söhbət qurur. Əlbəttə, polisin təhsil müəssisələrində başlıca işi isə narkotiklərə qarşı mübarizə sahəsində maarifçilik tədbirlərini həyata keçirməkdir.
Şagirdlərdən ibarət auditoriyalarda polisin maarifçilik tədbirləri həyata keçirməsi olduqca müsbət haldır və bu, gələcəyimiz olan uşaqlara, yeniyetmə və gənclərə müsbət təsir edir, onların pis vərdişlərə yiyələnməsinin qarşısını almaqda kömək edir.
Bu günlərə “Narkomaniyaya yox deyək” mövzusunda növbəti maarifçilik tədbiri Binəqədi Rayon Polis İdarəsinin təşkilatçılığı ilə rayonun 300 saylı tam orta məktəbində keçirilib.
Sözügedən tədbirdə Rayon Polis İdarəsinin rəis müavini, polis polkovnik-leytenantı Vüsal Axundov narkotik vasitələrin qanunsuz dövriyyəsinə qarşı rayon ərazisində aparılan mübarizəyə diqqət çəkib. Qeyd edilib ki, rayon polisi narkotik vasitələrin alveri ilə məşğul olanların tutularaq məsuliyyətə cəlb edilməsi istiqamətində əməliyyat tədbirləri keçirməklə yanaşı, davamlı olaraq aparılan maarifləndirmə işi ilə gəncləri “ağ ölüm” bəlasından qorumağa çalışır.
Ötən il rayon ərazisində qanunsuz dövriyyədən 57 kiloqram 763 qram narkotik vasitə çıxarıldığını deyən Binəqədi RPİ-nin Narkotiklərlə Mübarizə Bölməsinin rəisi, polis kapitanı Eltun İsayev də qətiyyətli mübarizənin bundan sonra da davam etdiriləcəyini vurğulayıb.
DİN Mətbuat Xidmətinin rəis müavini, polis polkovnik-leytenantı Hafiz Təmirov, Polis İdarəsinin İctimai Təhlükəsizlik Şöbəsinin rəisi, polis mayoru Orxan Rzayev və İdarənin yetkinlik yaşına çatmayanlar üzrə inspektoru, polis leytenantı Lalə Əliyeva məktəblilərə gənclərin narkomanlıq və digər zərərli vərdişlərlən qorunması üçün dövlət səviyyəsində görülən işlər barədə məlumat verib, gənc nəslin savadlı, vətənpərvər ruhda boyüməsi, sağlam inkişaf etməsi, zərərli vərdişlərdən uzaq olmaları ilə bağlı zəruri tövsiyələr veriblər.
Natiqlər xüsusilə qeyd ediblər ki, narkotiksiz cəmiyyət üçün mübarizəsini ardıcıl şəkildə davam etdirən polisin fəaliyyətinin ictimaiyyət, əsasən də valideyn və təhsil müəssisələri tərəfindən aktiv formada dəstəklənməsi zəruridir.
Sonda şagirdlərin sualları cavablandırılıb, mövzu ilə bağlı videoçarx nümayiş etdirilib. Bu, sözügedən layihə ilə bağlı məlumatdır.
Azərbaycanda polisin narkomaniyaya qarşı yalnız inzibati yolla deyil, həm də maarifçilik üsulu ilə mübarizə aparması necə dəyərləndirilməlidir?
“Fikrimcə, şagirdlər arasında keçirilən maarifçilik tədbirləri öz effektini verəcək”
“Müasir İnkişaf” Birliyinin sədri Mübariz Göyüşlü bizimlə söhbətində bildirdi ki, cəmiyyətdə hər kəs “ağ ölüm”lə mübarizə tədbirlərinə qoşulmalıdır və maarifçilik işlərinə təkan verməlidir. “Polisin narkotiklərlə mübarizə istiqamətində maarifçilik tədbirlərini həyata keçirməsi çox müsbət haldır. Çünki narkotikə qarşı yalnız inzibati yolla aparılan mübarizə gözlədiyimiz effekti verə bilməz, odur ki, maarifçilik işi zəruridir.
Bu sahədə maarifçilik işinin aparılması çox önəmli və təsirlidir. Polisin, DİN əməkdaşlarının bu sahədə maarifçilik işi aparması təbii ki, peşəkar səviyyədədir. Amma bəzən təşkilatlar da olur ki, onlar da bu sahədə maarifçilik işi apardıqlarını deyirlər. Bu təşkilatların səviyyəsi, işlərini hansı şəkildə qurması diqqətə alınmalıdır. Onun DİN-lə əlaqəsinin olub-olmamasına fikir verilməlidir. Daxili işlər naziri, nazirliyin işçiləri narkotiklə bağlı mübarizəyə çox ciddi yanaşır”.
O hesab edir ki, bu sahədə peşəkarların fəaliyyəti fayda verə bilər və şagirdlər, gənclər yalnız bu mübarizənin yollarını peşəkar şəkildə izah edənlərdən öyrənə bilərlər. Bu baxımdan, polisin bu sahədə gördüyü işləri təqdir edən müsahibimiz hesab edir ki, bu, “ağ ölüm”lə mübarizədə effekt verəcək. “Fikrimcə, şagirdlər arasında keçirilən maarifçilik tədbirləri öz effektini verəcək”-deyə M.Göyüşlü qeyd etdi.
İradə SARIYEVA
