İkinci Qarabağ müharibəsində Vətənin qeyrətli oğulları qanları bahasına qəhrəmanlıq salnaməsi yazaraq xalqımıza şanlı qələbə yaşatdılar. Torpağı Vətən edən belə igidlərdən bir də Elşən Nazim oğlu Sultanlıdır. Doğma Azərbaycanın müqəddəsliyinə tapınıb onun qeyrətini canında əziz tutan igid 19 fevral 2001-ci il Yardımlı rayonun Teşkan kəndində dünyaya göz açıb. Ömür yolu cəmi 19 il oldu. Qaldı ki, bu qısa yolu çox şərəfli yaşadı. Torpağı Vətən etməklə gələcək nəsillər üçün örnək olacaq bir tarix yazıb getdi.
Vətən müharibəsində göstərdiyi igidlik və şücaətə görə Azərbaycan Respublikasının Prezidenti cənab İlham Əliyevin Sərəncamı əsasında Elşən Nazim oğlu Sultanlı 3-cü dərəcəli “Vətənə xidmətə görə” ordeninə layiq görülüb. Həmin orden şəhidin ailəsinə təqdim edildi.
Mərasimdə Rayon İcra Hakimiyyəti aparatının Vətən müharibəsi iştirakçıları və şəhid ailələri ilə işin təşkili şöbəsinin, Səfərbərlik və Hərbi Xidmətə Çağırış üzrə Dövlət Xidmətinin Yardımlı Rayon Şöbəsinin, hüquq-mühafizə orqanlarının, təşkilatların əməkdaşları, şəhid ailələri, müharibə veteranları qəhrəman Elşən Sultanlının ailəsini ziyarət edib, ailə üzvlərinin problemlərini öyrəndilər.
Söhbət zamanı bildirildi ki, Vətən müharibəsində qazanılan qələbədə qan tökən şəhidlərin əziz xatirəsi qəlblərdə əbədi yaşayacağı, bütöv bir xalqın qəhrəmanlıq simvolu olmaqla hər an böyük ehtiramla xatırlanacaq. Şərəfli ölümü ilə Vətəninə, millətinə başucalığı gətirən, müqəddəs şəhidlik zirvəsindən xoş gələcəyə boylanan Elşən də bizim üçün mənən diridir, əbədiyaşardır.
Şəhid ailələrinə göstərilən diqqət və qayğıya görə ölkə rəhbərliyinə minnətdarlığını bildirən şəhidin atası Nazim Sultanov onu da dedi ki, indi bütün Azərbaycan Elşəni özünə oğul bilir. Vətən məhəbbəti onun qanında idi. Məhz buna görə də Vətənin yaşaması naminə şəhid olmağı bacardı...
Zəfər ORUCOĞLU Azərbaycan Jurnalistlər Birliyinin üzvü
