Dizellə işləyən avtomobillər yanacağa və büdcəyə qənaət baxımından daha sərfəli olduğu üçün ölkəmizdə və dünyada belə avtomobillərə böyük maraq var. İnsan və ətraf mühitin sağlamlığına mənfi təsir göstərdiyi üçün Avropada bu nəqliyyat vasitələrinə qadağa qoyulur.
Belə ki, Avropa Parlamenti elektrikli avtomobillərə keçidi sürətləndirmək və iqlim dəyişikliyi ilə mübarizə aparmaq məqsədilə Avropa İttifaqında yeni benzin və dizel avtomobillərinin satışını effektiv şəkildə qadağan edən qanunu rəsmi olaraq təsdiqləyib. Bu barədə "Reuters" agentliyi məlumat yayıb. Qeyd etdiyimiz kimi, dizellə işləyən nəqliyyat vasitələrinə ölkəmizdə böyük tələbat var. Maraqlıdır, ölkəmizdə də dizel mühərrikli avtomobillər qadağan ediləcəkmi?
Ekologiya və Təbii Sərvətlər Nazirliyi - Rasim Səttarzadə: “Azərbaycanda ekoloji təmiz avtomobillərdən istifadənin təşviq edilməsi istiqamətində işlər görülür”
Ekologiya və Təbii Sərvətlər Nazirliyinin Ekoloji Siyasət şöbəsinin müdiri Rasim Səttarzadə bildirdi ki, Azərbaycanda ekoloji təmiz avtomobillərdən istifadənin təşviq edilməsi, köhnə nəqliyyat vasitələrinin, xüsusilə də dizel mühərrikli avtomobillərin istismarının mərhələlərlə məhdudlaşdırılması istiqamətində işlər görülür: “Yol hərəkətinin təhlükəsizliyinə dair” (2019-2023) Dövlət Proqramında məqsəd nəqliyyatla bağlı təhlükəsizliyin təmin edilməsidir. Orada bir neçə istiqamət nəzərdə tutulub. Onlardan biri ətraf mühitə və insan sağlamlığına mənfi təsirin azaldılmasıdır. Ekoloji cəhətdən təmiz avtomobillərdən (elektromobillər, hibrid avtomobillər, digər alternativ yanacaq növü, misal üçün sıxılmış təbii qazla işləyən) istifadənin stimullaşdırılması atmosfer havasına atılan zərərli maddələrin miqdarının kəskin azalması baxımından yaxşıdır. Bu da şəhərlərdə, böyük meqapolislərdə ətraf mühit üçün çox vacibdir”.
Yasin Mustafayev: “Elektromobilə keçid düşündüyümüz qədər asan deyil, ilk növbədə…”
Nəqliyyat məsələləri üzrə ekspert Yasin Mustafayev bildirdi ki, Avropa Parlamentinin qərarı Azərbaycanın avtomobil bazarına da təsirsiz ötüşməyəcək. Ancaq hazırda bu məsələ yerli bazarda hər hansı narahatlıq yaratmır: “Elektromobilə keçid düşündüyümüz qədər asan deyil. İlk növbədə bu nəqliyyat vasitələrinin istehsalı artmalıdır”.
Ekspert hesab edir ki, elektromobillərin vergi və gömrük rüsumlarından azad edilməsi ölkəmizdə onların sayının artmasına şərait yaradıb. Ancaq belə nəqliyyat vasitələrinin istehsalı az olduğuna görə qiymətləri kifayət qədər yüksəkdir: “Elektromobilləri istehsal etmək daxili yanma mühərrikli avtomobili istehsal etməkdən daha rahatdır. Çünki bu nəqliyyat vasitələrində ehtiyat hissə daha az olur. Ancaq bu sistemə keçmək üçün istehsalçılardan müəyyən vaxt tələb edilə bilər. Nəzərə almaq lazımdır ki, ili köhnə olan nəqliyyat vasitələri ekologiyaya daha çox zərər vurur, həm də təhlükəsizlik problemləri az deyil”.
Y.Mustafayevin fikrincə, Azərbaycanda 2035-2040-cı illərə qədər elektromobillərə keçidi yekunlaşdırmaq mümkündür.
Günel CƏLİLOVA
