Bakıda minlərlə istismar müddətini bitirmiş bina var. Nə qədər acınacaqlı olsa da, bu binalarda yüzlərlə sakin yaşayır. Bu binalar sovet dövründə tikilib. Məlumdur ki, İpoteka Fondu 70-ci ildən sonra tikilmiş mənzilləri ipotekaya verir.
Bakıda 70-ci illərdən öncə tikilmiş yüzlərlə bina var. Bu binaların əksəriyyəti təhlükəli vəziyyətdədir. Bəzilərinin divarlarında böyük çatlar, zirzəmilərində heç bir zaman çəkilməyən kanalizasiya suları var. Necə deyərlər, bu binaların əksəriyyəti hazır bomba kimidir. Nə zaman partlayıb yüzlərlə insanı məhv edəcəyi bəlli deyil.
Araşdırmalar zamanı müəyyən olunub ki, Bakıda ististar müddəti bitmiş, istifadəyə yararsız binaların sayı 11 mindir.
“Hazırda ən təhlükəli məqam bu cür binalarla bağlıdır, əgər təbii fəlakət baş verərsə, bu binalarda insan təlafatı qaçılmaz olacaq”
Əmlak məsələləri üzrə ekspert Elnur Fərzəliyev bildirdi ki, rəsmi qeydə alınan qəzalı binaların sayı 150-dir. Bunlar, 4, 5 və 9 mərtəbəli binalardır. Bir çox binalar10-15 ildir ki, istismar müddətini başa vurub. Düşünürəm ki, bu gün köhnə binaların monitorinqi aparılsa, bu say daha da yüksək olacaq. Hazırda ən təhlükəli məqam bu cür binalarla bağlıdır. Əgər təbii fəlakət baş verərsə, bu binalarda insan tələfatı qaçılmaz olacaq: “Türkiyədə baş verən zəlzələdən nəticə çıxarmaq lazımdır. Zəlzələ, yaxud təbii fəlakət zamanı binaların uçub dağılmaması üçün ilk növbədə həmin qəzalı binalarda indidən tikinti-bərpa, bərkitmə işləri aparılmalıdır. İstismar müddəti ötən binalar sökülənə qədər onları hansısa formada qoruyub saxlamaq lazımdır. Çünki orada insan yaşayır”.
Həmsöhbətimiz onu da əlavə etdi ki, köhnə binaların əsas problemi ondan ibarətdir ki, əvvəllər bu sahəyə mənzil istismar idarələri baxırdı, lakin sonra həmin binalar tamamilə sahibsiz, baxımsız vəziyyətdə qaldı. Doğrudur, ildə bir dəfə cüzi miqdarda da olsa kommunal pullar yığılır, lakin bu pul binaların baxımına yetmir. Həmin pullar sadəcə bina ətrafının təmizliyi üçün xərclənir.
Ekspertin sözlərinə görə, bu gün Bakıda yaşı 60-ı ötmüş yüzlərlə bina var. Bu binalar bir çox parametrlərinə görə artıq yaşayış standarlarına cavab vermir. Bunlara; otaqların ölçüləri, tavanların hündürlüyü ilə yanaşı, yaşayış üçün təhlükəli olan divarlarda çatların əmələ gəlməsi, fasadın sıradan çıxması və s. problemlər daxildir: “Bir təbii fəlakət və ya zəlzələ olsa, bu binalar çökə bilər. Onları bərpa etmək mümkün deyil”.
Günel CƏLİLOVA
