Milli Məclisin Regional məsələlər komitəsinin iclasında “Bələdiyyələrin fəaliyyətinə inzibati nəzarətin həyata keçirilməsi ilə bağlı illik (2022-ci il üzrə) məruzə” müzakirəyə çıxarılıb. Müzakirə zamanı qəbiristanlıqların bələdiyyələrə verilməməsinə aydınlıq gətirilib.
Milli Məclisin Regional məsələlər komitəsinin iclasında çıxış edən ədliyyə nazirinin müavini Vilayət Zahirov bildirib ki, məzarlıqların bələdiyyələrə tam təhvil verilməsi hələ başa çatmayıb. “Bunun da bir neçə səbəbi var. Regionlarda və bir çox kəndlərdə qəbiristanlıqların sənədlərinin, xəritələrinin, pasportlarının olmaması gecikməyə səbəbdir. Çatışmazlıqlar aradan qaldırıldıqdan sonra müəyyən qərar qəbul olunub, qəbiristanlıqlar bələdiyyələrə verilməlidir”.
Qeyd edək ki, bələdiyyələr tam özünü doğrultmayıb. Bələdiyyələrin normal işgüzar mühiti formalaşmayıb. Bu səbəbdən də onlar hələ işlək qurum kimi özünü təsdiq etməyib. Belə olan halda qəbiristanlıqların bələdiyyələrə verilməsi nə dərəcədə düzgündür?
“Tam olaraq qəbiristanlıq və dəfn xidmətinin bələdiyyəyə verilməsi hələ düzgün deyil”
Sosial sahə üzrə ekspert İlqar Hüseynli bildirdi ki, bələdiyyələrin fəaliyyəti yox dərəcəsindədir: “Türkiyədə məzarlıqlar və dəfn xidməti bələdiyyənin səlahiyyətindədir. Dəfn işini həyata keçirmək üçün bələdiyyənin xüsusi resursları var. Bələdiyyənin xüsusi nəqliyyat vasitəsi var. Həmin maşın vasitəsilə meyit daşınır. Ancaq bu gün bizdə bu işlər xüsusi şirkətlər tərəfindən həyata keçirilir. Bələdiyyələrin dəfn xidmətini həyata keçirmək üçün maddi gücü yoxdur. Bələdiyyələr vətəndaşlara məzarlıqlarla bağlı sosial xidmətlər göstərməlidir. Buraya məzar yerinin qazılması, dəfn işinin təşkili və sairə daxildir. Hətta qəsəbədə kimin maddi imkanı yoxdursa, onun dəfni pulsuz həyata keçirilməlidir. Ancaq bunu necə edəcək, bəlli deyil”.
Həmsöhbətimiz onu da əlavə etdi ki, bu gün qəbiristanlıqlarda natəmizlik yaşanır. Ola bilsin ki, qəbiristanlıqlar bələdiyyəyə verilərsə təmizlik işləri onlara tapşırılar. Ancaq tam olaraq qəbiristanlıq və dəfn xidmətinin bələdiyyəyə verilməsi hələ düzgün deyil.
Günel CƏLİLOVA
