Qardaş Türkiyədə baş vermiş dağıdıcı zəlzələ bu gün bütün dünyanın diqqət mərkəzindədir. Bu hadisə nəticəsində artıq həyatını itirənlərin sayı 35 mini, yaralıların sayı isə 105 mini ötüb. Faciədə həyatını itirən 10 nəfər soydaşımızın 4-ü tələbədir.
Türkiyədə baş verən zəlzələdən sonra yerli universitetlər uzaqdan təhsilə keçirilir. Fevralın 11-də Türkiyə Prezidenti Rəcəb Tayyib Ərdoğan bildirib ki, zəlzələlərə görə universitetlər tamamilə uzaqdan təhsilə keçəcək. O, yaya qədər tətil ediləcəyindən, universitet yataqxanalarından zəlzələdən zərərçəkənlərin qalması üçün istifadə olunacağını vurğulayıb.
Məlumdur ki, Türkiyə universitetlərində təhsil alan Azərbaycan vətəndaşları da var. Açıqlanan statistik rəqəmlərə əsasən, 2022-ci ildə Türkiyədə təhsil alan azərbaycanlı tələbələrin sayı 26 min 700 nəfərdir. Təbii ki, universitetlər distant təhsilə keçəcəyi üçün onlar geri qayıtmalıdırlar. Tələbələrin və onların ailələrinin narahatlığına səbəb isə təyyarə biletlərinin baha olmasıdır. O da bəllidir ki, koronavirus pandemiyası ilə bağlı 2020-ci ilin martından etibarən quru sərhədlər bağlıdır. Belə olduğu halda quru sərhədlərin açılması yenidən gündəmə gəlib. Valideynlər təyyarə biletlərinin baha olmasının əsas gətirərək, quru yolların açılmasının vacib olduğunu bildirirlər.
Vüqar Bayramov: “Quru sərhədlərin açılması ilə bağlı qərarın verilməsi birbaşa epidemioloji gözləntidən asılı olaraq həyata keçiriləcək”
Millət vəkili Vüqar Bayramov bildirdi ki, quru sərhədlərin açılması ilə bağlı qərarın verilməsi birbaşa epidemioloji gözləntidən asılı olaraq həyata keçiriləcək: "Quru sərhədlərin açılması birbaşa Nazirlər Kabineti yanında Operativ Qərargahın qərarından asılı olacaq. Operativ Qərargah mütəmadi olaraq ölkədaxili, eləcə də qonşu ölkələrdəki vəziyyətlə bağlı məlumatın əldə edilməsi və qiymətləndirilməsini həyata keçirir. Hər halda, bizim təklifimiz mərhələli şəkildə quru sərhədlərin açılması ilə bağlıdır. Nəzərə alsaq ki, qonşu ölkələrdən hazırda Rusiyada yoluxma sayı yüksəkdir. İranda praktiki olaraq prosesin nəzarətdən çıxması müşahidə olunur. Bu baxımdan düşünürəm ki, Azərbaycanla Gürcüstan arasındakı quru sərhədin açılması məsələsinin müzakirəsi mümkündür. Gürcüstanla quru sərhədini açmaq olar ki, tələbələr Türkiyədən Gürcüstan üzərindən ölkələrinə qayıda bilsinlər. Amma təbii ki, bununla bağlı qərarın verilməsi birbaşa epidemioloji gözləntidən asılı olaraq həyata keçiriləcək. Operativ qərargah tərəfindən bu istiqamətdə qiymətləndirmə aparıldıqdan sonra qərarın qəbul edilməsi və addımların atılacağı istisna deyil. Amma təbii ki, bütün hallarda quru sərhədlərin açılması iqtisadi baxımdan vacibdir. Bu baxımdan da epidemioloji vəziyyət tənzimlənən həddə olduğu halda bununla bağlı qərarların veriləcəyi gözlənilir".
Kamran Əsədov: “Türkiyə hökuməti, Türk Hava Yolları zəlzələ baş vermiş ərazidə ciddi şəkildə qiymətlərdə endirim etdi, eyni addımı Azərbaycan Hava Yolları da atmalıdır”
Təhsil eksperti Kamran Əsədov bildirdi ki, bu gün Türkiyədə 26 minə yaxın azərbaycanlı tələbə təhsil alır: “Göstəriş verilməlidir ki, azərbaycanlı tələbələrin vətənə gəlməsi ilə bağlı bilet qiymətlərində endirim edilsin. Çünki həm Türkiyədə onlayn təhsilə keçid edildi, həm də onların həyati təhlükəsi davam edir. Digər tərəfdən, təəssüflər olsun ki, Azərbaycan tərəfindən tələbələrin köçürülməsi ilə bağlı qaydalar hələ müəyyənləşməyib. Biz həmin tələbələrin Azərbaycan universitetlərinə köçürülməsinə və burada təhsil almasına şərait yaratmalıyıq. Həmçinin pandemiya dövrü artıq başa çatıb, düşünürəm ki, sərhədlər tam olaraq açılmalıdır və bununla da tələbələrin ucuz şəkildə gediş-gəlişinə şərait yaratmış olarıq. Türkiyə hökuməti, Türk Hava Yolları zəlzələ baş vermiş ərazidə ciddi şəkildə qiymətlərdə endirim etdi. Eyni addımı Azərbaycan Hava Yolları da etməlidir. Təyyarə biletlərinin qiyməti ciddi şəkildə aşağı salınmalıdır".
Günel CƏLİLOVA
