İllərdir ki, Abşeronun Masazır kənd sakinləri ərazidə bələdiyyənin heç bir abadlıq, yaşıllaşdırma və yol təmiri, əhalinin su ilə təminatı kimi sosial layihələr üzrə iş aparmadığından narazılıq edirlər.
Son aylarda isə ictimai narazılıq yaradan problemlərin sırasına başqa biri də əlavə olunub. Məsələ burasındadır ki, kəndin içindən keçən Bakı-Novxanı yolundan əlavə son vaxtlar içərilərdə fərdi yaşayış evlərinin arasında da çoxmərtəbəli yaşayış binalarının tikintisi intensiv xarakter alıb. Sakinlər bildirirlər ki , müvafiq araşdırmalar aparıblar və məlum olub ki, rayon İcra Hakimiyyəti və FHN-in yalnız üçmərtəbəli 10-12 metr hündürlükdə evlərin tikintisinə rəsmi icazə verdiyi həyətyanı sahələrdə 7-8 mərtəbəli çoxmənzilli yaşayış binaları tikilməkdədir. Sakinlər bələdiyyənin bir qurum olaraq, bu problemlərə heç bir diqqət ayırmadığını, qanunsuz və təhlükəli tikintilərlə bağlı öz səlahiyyətləri çərçivəsində heç nə etmədiyini deyirlər. Sakinlər bələdiyyə üzvlərinin qanunsuz tikinti aparanlarla qeyri-şəffaf işbirliyində olub-olmadığından şübhə edirlər.
"Bakı-Xəbər" redaksiyası olaraq sözügedən problemləri əhatə edən araşdırma aparmaq niyyəti ilə fevralın 11-də şənbə günü müvafiq rəsmi məktubla bələdiyyə idarəsinə baş çəkdik.
Çox maraqlı bir mənzərə ilə üzləşdik. Əhaliyə vergi borcları ilə bağlı qəbzlər verən hüquq şöbə əməkdaşları, ümumi şöbə deyilən şöbənin xanım müdiri işdə, hətta bələdiyyənin gənc sədri Quliyev Azər İlham oğlu, eləcə də bəzi bələdiyyə üzvlərinin iş yerində olmalarına baxmayaraq redaksiyamızın adından rəsmi sorğu məktubunu bizdən qəbul edən bir kəs tapılmadı. Ümumi şöbə müdiri xanım əməkdaş bildirdi ki, sədr desə qəbul edə bilər, sədr Azər müəllim isə çox qəribə cavab verdi: "Bu gün qeyri-iş günü olduğu üçün məktubu qəbul etməyimiz qanunsuzluq olar, gedin həftənin birinci günü gələrsiniz".
Təsəvvür edirsinizmi, adi bir sorğu məktubunu bələdiyyə ofisində qeydiyyata saldırmaq nə qədər bürokrat və süründürməçi münasibətlə üzləşir? Daha qəribəsi odur ki, hörmətli bələdiyyə sədri "biz fəaliyyətimizlə bağlı mətbuata hesabat verməliyik?" deyə ritorik sual da verir. Yəqin cənab sədrdən soruşulacaq ki, qeyri -iş günündə ümumi şöbə, hüquq şöbəsi, sədr özü nə üçün iş yerindədir, qeyri-iş günündə hüquq şöbə əməkdaşları vətəndaşlara vergi borcları ilə bağlı bələdçi qəbz verə bilir, mətbuatın sorğu məktubunu qəbul edə bilmir?
Elə bu cür iş metodlarının nəticəsidir ki, bələdiyyələr cəmiyyət arasında sadəcə torpaq satmaqdan, vergi toplamaqdan başqa heç bir iş görməyən lüzumsuz qurumlar kimi tanınıb.
Sakinlər haqlı olaraq deyirlər ki, torpaq və əmlak vergisi ödəmək bizim borcumuzdur, bəs bələdiyyə nə etməlidir və nə üçün heç nə etmir? Kənd yollarında heç bir abadlıq işi aparılmır, ara küçələrdə zibil dizə çıxır, zibil qutuları da yoxdur, əhalinin su təminatı qayğısına qətiyyən qalınmır, yalnız keçmişdə torpaq satıb bu gün vergi yığmaqdan başqa nəyəsə yaramayan bələdiyyələr kimə lazımdır?
Biz hələ Masazır bələdiyyəsinə rəsmi poçtla göndərdiyimiz məktubun məzmunu ilə bağlı heç nə yazmırıq, bunlar bələdiyyə rəhbərliyinin verəcəyi rəsmi cavab əsasında ayrıca araşdırılacaq. Növbəti günlərdə hüquqşünasların rəyləri və Ədliyyə Nazirliyinin bələdiyyələrlə iş üzrə müvafiq qurumlarının fikirləri ilə mövzunu davam etdirəcəyik.
Masazırda üzləşdiyimiz mənzərənin Bakı və Abşeronun bir sıra başqa bələdiyyələrində də hökm sürdüyü barədə məlumatlarımız var.
Bu istiqamətdə daha geniş araşdırmalar aparacağıq.
Bizi izləyin...
"Bakı-Xəbər" redaksiyası
