Lerikin dağ kəndi Siyov təbiətin ən füsunkar guşəsində qərar tutub. Havası, suyu o qədər safdır ki, ən ağır xəstə gəlib burada şəfa tapa bilir. Təəssüf ki, bu dağ kəndi də uzun müddətdir gözdən-könüldən iraq düşmüşdür.
Doğrudur, son illər Siyovda bir neçə yeni ev tikilib. Digər tərəfdən isə kəndin sosial problemləri onu acınacaqlı hala salmışdır. Əhalini narahat edən, həlli olduqca vacib məsələlərin sayı artır. Kənd sakinləri hər şeyə güzəşt etsələr də, ictimai nəqliyyatın, eləcə də mavi qazın yoxluğuna dözə bilmirlər.
On ildən çoxdur Siyov kəndinə qaz çəkilməli idi. Deyilənlərə görə, işin görülməsi üçün vəsait də ayrılıb. Harama öyrəşən səlahiyyət sahibləri həmin vəsaiti mənimsədiyi üçün siyovlular çətin durumda qalıblar. Kənd məktəbinin müəllimi Qüdrət Əmirov deyir:- Rayonun bəzi dağ kəndləri kimi, Siyov da çoxdan unudulub. Artıq rahat həyatdan əlimizi üzmüşük. Gündüzlər kənd sakinlərin başı qarışır işə, odur ki, sosial-mədəni məsələlər yada düşmür. Axşamlar isə heç cür soyuq otaqlarda qalmaq olmur. Əvvəllər meşədən odun gətirib bu problemi özümüz yoluna qoyardıq. Necə qaz çəkmək söhbəti ortaya düşdü, meşələr insanların üzünə bağlandı, yanacaq odunu bilə-bilə qaldırdılar qızı qiymətinə. İndi on ildir yanacaq barədə həyatımız dönüb cəhənnəm əzabına. Artıq kənd sakinlərin çoxu meyvə ağaclarında yandırıb. Sözün qısası, yalançı məmurlar dövləti aldatmaqla siyovluları ağır günə salıblar..
İctimai nəqliyyata gəldikdə isə, sovet vaxti kəndə avtobus işləyib. Sonradan o da siyovluların əlindən alınıb. Məhz bu səbəbdən indi əhali üçün rayon mərkəzinə, eləcə ətraf kəndlərə gediş-gəliş müşkülə dönüb.
Bəli, hələlik Siyovun problemləri ilə rayonda maraqlanan yoxdur. Respublikanın lazımi təşkilat və nazirliklərə edilən müraciətlər cavabsız qalır. Amma dövlətə bağlı, sadə, zəhmətkeş siyovlular gələcəyə ümidlə baxırlar. Deyirlər ki, ölkə başçısı kənddə olan problemləri bilsə, heç vaxt bizi darda qoymaz.
Zəfər ORUCOĞLU Azərbaycan Jurnalistlər Birliyinin üzvü
