Su həyat deməkdir. Bütün canlıların yaşaması üçün suya ehtiyacı olduğuna görə bəşəriyyət yaranandan bu qida növü həyatda ən vacib amillərdən sayılır.
Dövrümüzdə isə bəzi hallarda insanların belə vacib tələbatlarından istifadə edərək daha çox pul qazanmaq üçün müxtəlif vasitələrə əl atanlar var. Məlumdur ki, ölkəmizin bir çox regionlarında dünyanın heç yerində olmayan, müxtəlif xəstəliklərin dərmanı kimi istifadə edilən mineral sular mövcuddur. Onlarla yanaşı, saysız-hesabsız digər bulaqlar və su ehtiyatları da var. Bir çox əyani təhlillər göstərir ki, bəzi hallarda su istehsal edən şirkətlər heç də qabların üstündə yazıldığı kimi həmin bulaqlardan deyil, adi sulardan istifadə edir, zərərli maddələr təmizlənmir. Hətta buna görə bir neçə şirkət rəhbərləri hüquq-mühafizə orqanları tərəfindən cinayət məsuliyyətinə də cəlb olunub.
Hazırda isə şəhərimizin marketlərində qazsız içməli sular istehlakçılara müxtəlif qiymətlərə təklif olunur.Və həmin sular haqqında müxtəlif, xoşagəlməz məlumatlar yayılır. Bu günlərdə “Space” telekanalında aparıcı Elçin Əlibəylinin verilişində bu mövzuya toxunulub və qeyd edilib ki, bəzi suların əksəri əslində ölü - qara sudur, heç bir minerallığı, sterilizasiyası yoxdur, bəziləri hətta təhlükəlidir: “O baxımdan ki, əksər şirkətlərin daşıdığı bu su elə Ceyranbatan anbarının, yəni evlərə kəmərlə verilən sudur, onu filtrasiya edib, qablaşdırıb mineral su adı ilə baha qiymətə satırlar. Digər tərəfdən, həmin plastik qablar birdəfəlik deyil, dəfələrlə doldurulur, istifadə edilir, həmçinin saxlanma, qablaşdırılma şəraitinə nəzarət də yoxdur”.
Maraqlıdır, su satışı ilə məşğul olan şirkətlərin fəaliyyətinə kim nəzarət etməlidir?
Eyyub Hüseynov: “Ölkədə suya nəzarət “sıfır” vəziyyətindədir”
Azad İstehlakçılar Birliyinin (AİB) sədri Eyyub Hüseynov qeyd etdi ki, su bazarında vəziyyət ürəkaçan deyil: “Su təbiətin və Allahın möcüzəsidir. Yeganə maddədir ki, 3 halda, kristal, qaz və maye halında olur. Yeganə maddədir ki, rəngi, dadı, qoxusu yoxdur. Yeganə maddədir ki, bütün maddələr istidə genişlənib, soyuqda sıxıldığı halda, su hər ikisində genişlənir. Suyun ilahiliyindən istifadə edən su istehsalçıları, guya suyu təmizləyirlər və nədənsə, istehlakçı təmizliyi müəyyən edə bilmir. Təmizlənmiş suyun yanına kran suyunu da yığıb satırlar. Belə hallar var”.
Birlik sədri onu da əlavə etdi ki, ölkədə suya olan nəzarət “sıfır” vəziyyətindədir. Qida Təhlükəsizliyi Agentliyi qidanın, o cümlədən suyun yalnız təhlükəsizliyini təmin edir, keyfiyyət məsələsi isə illərdir ki, masanın üzərində qalıb. Bununla, ümumiyyətlə, heç bir aidiyyəti qurum məşğul olmur, istehlakçı hüquqları arxa plandadır”.
Pərvanə Mustafayeva: “Üzərində hansısa bulağın adını yazırlar, ancaq Ceyranbatan su anbarının təmizlənmiş suyunu qablaşdırırlar
Həkim ekspert Pərvanə Mustafayeva bildirdi ki, bəzi firmalar var ki, üzərində hansısa bulağın adını yazırlar, ancaq Ceyranbatan su anbarının təmizlənmiş suyunu qablaşdırırlar: “Təəssüf ki, Bakı şəhərinin yarısı o sudan istifadə edir. Onun tərkibindəki mikrobların və virusların titri normadan aşağıdır. Suyun tərkibində yol verilə biləcək hədd olur. O həddi keçmədikdə həmin su içməli sayılır. Bu sular qiymət baxımından ucuz olurlar. Öncələr xalqımız Kürün suyunu daş filtrlərdən keçirirdi. Naxçıvanda və Qazaxda həmin daşlardan istehsal olunur. Həmin daşlardan keçirilən içməli su indi satılan yeni texniki vasitələrdən keçirilən sulardan qat-qat effektlidir”.
Günel CƏLİLOVA
