Dövlət Statistika Komitəsi (DSK) ötən il Azərbaycana gələn turistlərlə bağlı göstəriciləri açıqlayıb. Rəsmi rəqəmlərə görə, 2022-ci ildə Azərbaycana 1 milyon 602 min xarici ölkə vətəndaşı gəlib. Bu rəqəm 2021-ci illə müqayisədə əcnəbi turist sayının 2 dəfə artdığını göstərir. Belə ki, həmin il ölkəyə toplam 792 min əcnəbi səfər edib.
Ancaq bütövlükdə götürəndə, turist sayı hələ də pandemiyaöncəsi göstəricinin çox gerisindədir. Məsələn, 2019-cu ildə Azərbaycana səfər edənlərin sayı 3 milyon nəfəri aşmışdı. Burada təəccüb doğuran məqam odur ki, Azərbaycanla qonşuluqda yerləşən, ərazi, əhali sayı və iqtisadi göstəricilər baxımından Azərbaycandan geri sayılan Gürcüstana ötən ilin ilk 9 ayında 3 milyon 800 min turist gəlib. Təəccüb doğuran odur ki, Gürcüstana cəmi 9 ayda səfər edənlərin sayı Azərbaycana bütün il boyu səfər edənlərin sayından 2.4 dəfə çoxdur.
Gürcüstandan bu qədər geridə qalmağımızın səbəbi nədir? Burada Gürcüstanın quru sərhədlərinin açıq olması nə dərəcədə rol oynayır?
“Turistlərin cəlbi məsələsində dövlətin təşviq siyasəti genişləndirilməlidir, aviadaşımalar sahəsində liberal addımlar atılmalıdır”
Sözügedən məsələyə aydınlıq gətirən Azərbaycan Sağlamlıq və Termal Turizmə Dəstək Assosiasiyasının sədri, turizm eksperti Ruslan Quliyev bu sahədə Gürcüstandan geri qalmağımızın səbəbini bir sıra amillərlə əlaqələndirdi: “Bəli, əfsuslar olsun ki, say məsələsində biz qonşu ölkələrdən geridəyik. Azərbaycanla müqayisədə Gürcüstana daha çox turist gəlir. Bunun bir neçə səbəbi var. Bir səbəbi odur ki, Gürcüstanın quru sərhədləri açıqdır. Quru sərhəd açıq olanda, bu, ölkəyə gələn turistlərin sayının artmasına öz təsirini göstərir. Bizdə isə, məlum olduğu kimi, pandemiya ilə əlaqədar 2020-ci ilin martından quru sərhədlər bağlıdır. Sərhədlər bağlı olduğu üçün 2019-cu illə müqayisədə gələn turistlərin sayı qat-qat azdır. Ancaq turist axınının az olması təkcə quru sərhədinin bağlı olması ilə bağlı deyil. Bunun digər səbəbləri də var. Buna rəğmən, postpandemiya dövründə gözləntilərə bir qədər nikbin yanaşmaq lazımdır. Məsələ ondadır ki, az da olsa Azərbaycana gələn turistlərin sayında artım müşahidə olunur. Düzdür, quru sərhədin bağlı qalması turist axınına mənfi təsir edir. O üzdən, quru sərhədi açılsa, ölkəyə gələn turistlərin sayı daha da artacaq. Digər tərəfdən, turistlərin cəlbi məsələsində dövlətin təşviq siyasəti genişləndirilməlidir. Hesab edirəm ki, bu, əsas məsələlərdən biridir. Ən başlıcası, aviadaşımalar sahəsində liberal addımlar atılmalıdır. Bu sahədə rəqabət mühiti olmalıdır. Xarici aviakompaniyaların ölkəyə gəlişi ilə bağlı konkret bir konsepsiya olmalıdır. Həmçinin, nəqliyyat dəhlizlərinin qurulması, yeni nəqliyyat xətlərinin açılması istiqamətində atılan addımlar, görülən işlər ölkəyə gələn turistlərin sayının artmasına öz müsbət təsirini göstərəcək. Turizm sahəsində çalışanların işinə çox böyük dəstək olacaq. O baxımdan hesab edirəm ki, bu yöndə səylər artırılmalıdır”.
Bir sözlə, turizm eksperti hesab edir ki, bir sıra görüləsi işlər var.
Vidadi ORDAHALLI
