Neçə nəfər elmlər və fəlsəfə doktorunun təqaüdü 200-dən 500-ə qaldırıldı...
Məlum olduğu kimi, 13 yanvar tarixində elmlər doktoru, fəlsəfə doktoru elmi dərəcəsinə görə Azərbaycan Respublikası Prezidentinin təqaüdünün aylıq məbləği artırılıb.
Prezident İlham Əliyev “Doktorantlara, ali təhsil, orta ixtisas və peşə təhsili müəssisələrində, həmçinin Azərbaycan Milli Elmlər Akademiyasının magistratura səviyyəsində təhsil alan tələbələrə təqaüdlərin verilməsi haqqında” Azərbaycan Respublikası Prezidentinin 2019-cu il 14 fevral tarixli 961 nömrəli Sərəncamında dəyişiklik edilməsi barədə Sərəncam imzalayıb.
Sərəncamla 2023-cü il yanvarın 1-dən əmək kitabçasında müvafiq qeydiyyat aparılan əsas iş yeri üzrə elmi müəssisə və təşkilatlarda və ya təhsil müəssisələrində azı 25 il çalışmış, elmi dərəcəsi olan, işləməyən, əmək pensiyası hüququ olan şəxslərə verilən Azərbaycan Respublikası Prezidentinin təqaüdünün aylıq məbləği elmlər doktoru elmi dərəcəsinə görə 500 (beş yüz) manat, fəlsəfə doktoru elmi dərəcəsinə görə 300 (üç yüz) manat müəyyən edilib.
Qeyd etdiyimiz kimi, elmlər və fəlsəfə doktorunun elmi dərəcəsinə görə təqaüd məbləği artıb. Maraqlıdır, bu artım nə qədər elmlər və fəlsəfə doktoruna şamil olunacaq?
- “Alimlərin bir qismi Azərbaycan Milli Elmlər Akademiyasında, digərləri ali təhsil müəssisələrində, müəyyən hissəsi isə ayrı-ayrı nazirliklərin nəzdində olan sahə institutlarında çalışır”
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü, Azərbaycan Gənc Alim, Doktorant və Magistrlər Cəmiyyətinin sədri İlqar Orucov “Bakı-Xəbər”ə açıqlamasında qeyd etdi ki, Prezident İlham Əliyevin məlum sərəncamı Azərbaycan vətəndaşının daha yaxşı yaşaması naminə görülən işdir: “Azərbaycanda çalışan elmlər və fəlsəfə doktorlarının dəqiq sayı bəlli deyil. Belə ki, onların bir qismi Azərbaycan Milli Elmlər Akademiyasında digərləri ali təhsil müəssisələrində, müəyyən hissəsi isə ayrı-ayrı nazirliklərin nəzdində olan sahə institutlarında çalışır. Bu səbəbdən də bunun dəqiq statistikası yoxdur. Onu da deyim ki, elə fəlsəfə və elmlər doktorları var ki, elmi dərəcəsi olsa da onlar elmi fəaliyyətlə məşğul deyillər. Bu səbəbdən də məlum qərar onlara şamil olunmur”.
Həmsöhbətimiz onu da əlavə etdi ki, Prezident İlham Əliyevin verdiyi sərəncamlar Azərbaycan vətəndaşının daha yaxşı yaşaması naminə görülən mühüm işdir. Sözügedən sərəncamlar dünyada baş verən qlobal iqtisadi böhran və inflyasiyanın fonunda Azərbaycan vətəndaşlarının, xüsusilə həssas təbəqələrdən olan insanların qayğılarının qarşılanması, onların sosial baxımdan bu proseslərdən az zərər çəkməsi istiqamətində atılmış növbəti addımlardır. Bu kimi addımları zaman-zaman görürük. Bu, bir daha onu göstərir ki, ölkə başçısı bu kimi məsələlərdə hər zaman Azərbaycan insanını düşünərək qərarlar qəbul edir. Onun sözlərinə əsasən, ölkədə həyata keçirilən siyasətin təməlində birmənalı olaraq Azərbaycan insanının rifahının yaxşılaşması dayanır: "Vətəndaşlarımızın daha yaxşı həyat şəraitinin təmin olunmasına hədəflənmiş bu siyasət davamlıdır, ardıcıldır. Biz bu kimi addımları gələcəkdə də görəcəyik. Yeni Sərəncam əsasında fəxri adlara görə aylıq təqaüd, doktorantura, ali təhsil, orta ixtisas və peşə təhsili müəssisələrində, həmçinin, Azərbaycan Milli Elmlər Akademiyasının magistratura səviyyəsində təhsil alan tələbələrə verilən təqaüdlərin məbləği artırıldı. Sonuncu Sərəncam daha çox əhatəlidir, həssas qrupdan olan, təhsil alan böyük bir təbəqəni əhatə edir. Sərəncam əsasında doktoranturanın hər iki pilləsi - elmlər doktoru hazırlığı üzrə 400 manat, fəlsəfə doktoru hazırlığı üzrə doktorantların təqaüdləri 240 manat müəyyənləşdirildi”.
Günel CƏLİLOVA
