İnternet müasir dünya insanının həyatının ayrılmaz parçasına çevrilib. Bu, günün reallığıdır və çox az adam tapılar ki, internetdən istifadə etməsin. Nəinki paytaxtda, hətta kənd və rayonlarda da internet istifadəçilərinin sırası durmadan genişlənir. Bu gün hər birimizin həyatında internetin özünəməxsus yeri var.
Danılmaz faktdır ki, Azərbaycanda internetdən istifadə tamamilə azaddır və istifadəçilər istədikləri saytlara, sosial şəbəkələrə daxil ola və özlərinə lazım olan materialları internetdə yerləşdirib yaya bilərlər. Ancaq bəzi peşə sahibləri sosial şəbəkə vasitəsilə öz həmkarlarına qarşı xoş olmayan ifadələr işlədir, bu da həmin peşənin nüfüzuna xələl yetirir.
Bu günlərdə Vəkillər Kollegiyasının Rəyasət Heyətinin sədri Anar Bağırov mediaya açıqlamasında qeyd edib ki, vəkillərin öz həmkarlarını müzakirəyə çıxarması yolverilməzdir: “Mən dəfələrlə demişəm və yenə də təkrar edirəm ki, vəkillərin sosial şəbəkələrdə öz həmkarlarını müzakirəyə çıxarmasının əleyhinəyəm. Bu, vəkillərin etik davranış qaydalarına da ziddir. Vəkillərin aralarında olan münasibətlər Kollegiya çərçivəsində öz həllini tapmalıdır. Kənar müzakirələrin aparılması yolverilməzdir. Bu, nəticə etibarilə cəmiyyətdə vəkilliyin nüfuzuna mənfi təsir göstərir. Kimin narazılığı varsa, Vəkillər Kollegiyasına müraciət etsin, intizam icraatı başlanılsın və məsələyə hüquqi qiymət verilsin".
“Vəkillər cəmiyyətin ziyalı təbəqəsi sayıldığı üçün onların sosial şəbəkə vasitəsilə bir-birini müzakirəyə çıxarıb, etik qaydalardan kənar şəkildə fikir bildirməsi düzgün deyil”
A.Bağırovun məlum iradı ilə bağlı fikir bildirən vəkil Əziz Qəmbərov “Bakı-Xəbər”ə açıqlamasında qeyd etdi ki, vəkillərin bir-birinə qarşı olması yalnız məhkəmə müstəvisində baş verə bilər: “Bəzi hallarda məhkəmə prosesində qarşı tərəfin vəkili digər həmkarı ilə münasibətə hisslərini qarışdararaq aralarında münasibəti korlayır. Bu isə qətiyyən yolverilməz haldır. Ümumiyyətlə, iş və şəxsi həyat bir-birinə qarışmamalıdır. Məhkəmə prosesi zamanı vəkillər arasında münasibət də etik qaydalar çərçivəsində olmalıdır”.
Həmsöhbətimizin dediyinə görə, bəzi vəkil yoldaşlar öz həmkarlarını sosial şəbəkədə müzakirəyə çıxarır. Bu isə düzgün deyil: “Vəkillər arasında olan problem sosial şəbəkə üzərində deyil, Vəkillər Kollegiyasının Rəyasət Heyətinə müraciət edilməklə həll edilməlidir. Vəkillər Kollegiyasının Rəyasət Heyəti yeganə qurumdur ki, obyektiv şəkildə intizam icraatı başladır. Bu qurum əsassız şikayətləri icraata götürmür. Vəkillər qurumun obyektivliyindən arxayın olub Vəkillər Kollegiyasının Rəyasət Heyətinə müraciət etməlidirlər. Hansı vəkilin günahı varsa o mütləq şəkildə cəzalanacaq. Ancaq sosial şəbəkə vasitəsilə hər hansı bir mövzunun müzakirəyə çıxarılması düzgün deyil. Nəzərə almaq lazımdır ki, vəkillər cəmiyyətin ziyalı təbəqəsi sayıldığı üçün onların sosial şəbəkə vasitəsilə bir-birini müzakirəyə çıxarıb, etik qaydalardan kənar şəkildə fikir bildirməsi düzgün deyil”.
Günel CƏLİLOVA
