Uşaq və gənclərin həyatında, onların fiziki və mənəvi inkişafında rol oynayan əsas amillərdən biri də onların sosial vəziyyətlərinin yaxşı olmasıdır. Burada isə əsas rolu ailə ilə yanaşı dövlət oynayır. Ailələrin sosial rifah halının yüksəldilməsi üçün dövlət tərəfindən böyük işlər görülür. Xüsusən də qəbul edilən sosial paketlərdə biz bu qayğının təzahürünü görürük. Bu məsələnin digər tərəfi
Prezidentin imzaladığı yeni Fərmanlar və Sərəncamlar uşaqlara və gənclərə də aiddir. Burada uşaq və gənclər üçün də xüsusi müddəalar var. Məsələn, uşağın anadan olmasına görə müavinətin həcmi 500 manata çatdırılır. Bir yaşınadək uşağı olan aztəminatlı ailələrə (ünvanlı sosial yardım alan) hər uşağa görə müavinət 100 manata, beşdən çox uşağı olan qadınlara hər uşağa görə müavinət 105 manata çatdırılır. Bunlar uşaqlara yönəlik addımlardır. Heç şübhəsiz ki, bu addımlar gənclərin və uşaqların mənəvi inkişafına təkan verir.
Dövlətin sosial dəstək paketlərində gənclərə dəstək...
Bildiyimiz kimi, Prezident İlham Əliyevin Fərman və Sərəncamları ilə doktorant və tələbələrin təqaüdləri artırılıb. Yeni Fərmanla 2023-cü il yanvarın 1-dən ali məktəb tələbələri üçün Prezident təqaüdünün məbləği 275 manata çatdırılıb.
Həmçinin dövlət başçısının yeni Sərəncamı ilə dövlət büdcəsinin vəsaiti hesabına doktorantlara, ali təhsil, orta ixtisas və peşə təhsili müəssisələrində, həmçinin Azərbaycan Milli Elmlər Akademiyasının magistratura səviyyəsində təhsil alan tələbələrə verilən təqaüdlərin məbləğləri 2023-cü il yanvarın 1-dən (doktorantura üzrə) elmlər doktoru hazırlığı üzrə doktorantlar üçün 400 manata, fəlsəfə doktoru hazırlığı üzrə doktorantlar üçün 240 manata çatdırılır.
Ali təhsil müəssisələrində və Azərbaycan Milli Elmlər Akademiyasında magistratura səviyyəsi üzrə akademik göstəriciləri 91-100 bal olan tələbələr üçün 195, 71-100 bal olan tələbələr üçün 160, 51-100 bal olan tələbələr üçün 110 manata çatdırılır.
Bakalavriat səviyyəsi üzrə akademik göstəriciləri 91-100 bal olan tələbələr üçün 175, 71-100 bal olan tələbələr üçün 145, 51-100 bal olan tələbələr üçün 100 manata çatdırılır. Orta ixtisas təhsili müəssisələrində akademik göstəriciləri 91-100 bal olan tələbələr üçün 100, 71-100 bal olan tələbələr üçün 80, 51-100 bal olan tələbələr üçün 66 manata çatdırılır.
Fərman və Sərəncamlarda peşə təhsili müəssisələrində oxuyan tələbələr də unudulmayıb. Belə ki, peşə təhsili müəssisələrində akademik göstəriciləri “5” (yüksək texniki peşə təhsili səviyyəsində 91-100 bal) olan tələbələr üçün 100, “4” və “5” (yüksək texniki peşə təhsili səviyyəsində 71-100 bal) olan tələbələr üçün 80, “3” - “5” (yüksək texniki peşə təhsili səviyyəsində 51-100 bal) olan tələbələr üçün 66 manata çatdırılır.
Məlum olduğu kimi, bu artımlar ümumilikdə 150 minədək doktorant və tələbəni əhatə edir.
Gənclərin mənəvi inkişafına yönəlik addımlar...
“Müasir İnkişaf” Birliyinin sədri Mübariz Göyüşlü bizimlə söhbətində bildirdi ki, Azərbaycan dövləti ardıcıl olaraq uşaq və gənclərin mənəvi inkişafına töhfələr verir. Prezidentin imzaladığı son Fərman və Sərəncamlarda tələbələrin və doktorantların təqaüdlərinin artırılması müsbət dəyərləndirilməlidir. Birlik sədri hesab edir ki, dövlətin müxtəlif formalarda gənclərə, doktorantlara, magistlərə, bakalavrlara, eləcə də orta ixtisas məktə və peşə məktəblərində təhsil alan şəxslərə yönəlik dəstəyi müsbət bəhrə verir. O, qeyd edir ki, bu gənclərin yalnız maddi rifahına müsbət təsir etmir, həm də onların mənəvi inkişafına təkan verir. “Azərbaycanda gənc nəsil davamlı olaraq dövlət qayğısı ilə əhatə olunur. Bütün sferalarda fəaliyyət göstərən gənclər dövlətin diqqət mərkəzindədir. Doktorantlar və tələbələr də həmçinin. Prezidentin imzaladığı son Fərmanlarla və Sərəncamlarla doktorantların və tələbələrin təqaüdlərinin, eləcə uşaqlarla bağlı müəyyən edilən maddi yardımların həcminin artırılması müsbət haldır. Bu onu göstərir ki, dövlət gənclərin həm maddi rifah halının yaxşılaşdırılmasında, həm də mənəvi cəhətdən inkişafında maraqlıdır. İnsanların mənəvi keyfiyyəti çox əsasıdır. Gənclər görəndə ki, dövlət onları düşünür, onların təqaüdlərini artırır, bu onlara müsbət təsir göstərir. Bu dəstəklər, artımlar gənclərin, tələbələrin yad tərəflərə meyl göstərməsinin qarşısını alır. Tələbə, doktorant dövlət tərəfindən təmin edilir, bu az iş deyil. Ona görə də, onlar üzərlərində bir məsuliyyət hiss edirlər. Dövlət onlara ata-ana qayğısı göstərirsə onların da əsas vəzifələri dövlətə xidmət etməkdir. Dövlət başçısının doktorant və tələbələrin təqaüdlərinin artırılması ilə bağlı Fərman və Sərəncamları onlara stimul verir, öz ixtisalarını daha dərindən öyrənməyə şərait yaradır”.
Gənclərin mənəvi inkişafının təmin edilməsi üçün dövlətin həyata keçirdiyi proqramların əhəmiyyətini vurğulayan M.Göyüşlü qeyd edir ki, onlar bizim gələcəyimiz olduğu üçün daha yüksək səviyyədə yetişdirilməlidir. Uşaq və gənclərin fiziki, mənəvi tərbiyəsinin, inkişafının formalaşdırılması üçün dövlət xətti ilə çox işlər görüldüyünü xatırladan müsahibimiz hesab edir ki, bu amillər onların gələcəyi üçün çox faydalıdır.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
