Artıq Naxçıvan Muxtar Respublikası Ali Məclisinin keçmiş sədri Vasif Talıbovun istefasından 1 ay ötəcək. Ötən müddətdə bölgədə hadisələr sürətlə biri-brini əvəz edib. Prezidentin təyin etdiyi kadrlar Naxçıvandakı vəziyyəti araşdırır, əhali ilə görüşlər keçirir, problemləri, şikayətləri dinləyir, bölgənin inkişafı ilə bağlı yeni layihələr hazırlayırlar.
Talıbovlarsız keçən günlərin ən səs-küylü xəbərləri isə onların dövründə yerli əhaliyə, xüsusən sahibkarlara qarşı törədilmiş dəhşətli qanunsuzluqlar, cinayətlərlə bağlıdır.
Vaxtilə əmlakları quldurluq, zorakılıq, hətta adam oğurluğu vasitəsilə əllərindən alınmış iş adamlarının danışdıqları Azərbaycanın bu bölgəsində misli görünməmiş cinayətlərin baş verdiyinə dair təsəvvür yaradır.
“Flaminqo” restoranı ilə bağlı təqdim etdiyimiz araşdırmalar vaxtilə Əhməd Əhmədovun rəhbərlik etdiyi Naxçıvan DİN-də sahibkarlara divan tutan mütəşəkkil cinayətkar bir dəstənin fəaliyyət göstərdiyini üzə çıxarmış olur.
“Sədərək” gömrüyündə çalışmış Faiq Rzayevin söylədiklərindən aydın olur ki, ona qarşı da eynilə “Flaminqo”dakı ssenari üzrə hərəkət ediblər. Məlum olur ki, Naxçıvandakı işindən çıxdıqdan sonra gəlib 10 il Bakıda yaşayandan sonra adı ”Flaminqo” olayında hallanan Naxçıvan Daxili İşlər Nazirliyinin Qasım adlı işçisi 2008-ci ildə Faiq Rzayevi buradan “oğurlayaraq”, Naxçıvana sabiq daxili işlər naziri Əhməd Əhmədovun hüzuruna aparıb. Hadisələr eynilə “Flaminqo” olayındakı ardıcıllıqla cərəyan edib. Sonra nə baş verdiyi, inanın ki, dəhşətdi. Onun Naxçıvana aparılmasının bir səbəbi olub. Müəllimə qarşı “vaxtilə gömrükdə işləyibsən, sənin yaxşı pulun var, gətir filan qədərini qoy ortaya”,- kimi tələb irəli sürüblər. 12 günlük işgəncədən sonra qohum-əqraba yığışıb tələb olunan məbləğin bir hissəsini zorla toplayıb ödədikdən sonra Faiq müəllimi girovluqdan azad ediblər.
Artıq məlum olur ki, sən demə, 2000-ci illərdə Naxçıvan rəhbərliyinin “xeyir-duası” ilə vaxtilə MR-də yaxşı vəzifələrdə işləmiş naxçıvanlıların Bakıda “ovunu” həyata keçirən mütəşəkkil cinayətkar dəstə fəaliyyət göstərib. Həmin “banda”nın fərqi yalnız bu olub ki, polis mundiri arxasında gizləniblər.
Prosesə birbaşa DİN başçısı Əhməd Əhmədov rəhbərlik edib, icraçı isə əslən Şahbuz rayonunun Keçili kəndindən olan, Naxçıvan DİN-də böyük vəzifədə işləmiş sabiq OMON-çu “polkovnik Qasım” olub. Deyilənə görə, “polkovnik Qasım” hazırda təqaüddədir. Ancaq zamanında onu qəddarlığına görə Naxçıvanın Hacı Məmmədovu da adlandırıblar.
Göründüyü kimi, konkret adlar çəkilir, etiraflar səsləndirilir. Talıbovların cinayətləri, demək olar ki, açıqdır, hər şey ortadadır, amma hüquqi prosedurlara hələ ki, start verilməyib...
Ortaya çıxan iddialardan belə məlum olur ki, sahibkarlara qarşı həyata keçirilən mütəşəkkil cinayətkarlıq hadisələrində həmin dövrdə Azərbaycan hüquq-mühafizə orqanlarının bəzi əməkdaşları da iştirak edib. Naxçıvana yeni təyin olunan daxili işlər naziri və digər əlaqədar qurumlar “polkovnik Qasım” və digərləri ilə bağlı araşdırmalara başlamalıdırlarmı?
Hüquqşunas, ehtiyatda olan polis polkovniki Şəmsəddin Əliyev “Bakı-Xəbər”ə açıqlamasında bildirdi ki, bu yöndə təqdim etdiyimiz araşdırmalarda çox ciddi məqamalara rast gəlinir: “Qeyd edim ki, polis nəfəri heç vaxt kiminsə qanunsuz əmr və göstərişlərini yerinə yetirməməlidir. Talıbov dönəmində Bakıda fəaliyyət göstərən Naxçıvan əsilli iş adamlarına divan tutan, onları Bakıda həbs edib, qoluna qandal vurub Naxçıvana aparan şəxs kimi əsasən Qasım adlı polis polkovnikinin adı keçir. Onun barəsində deyilənlər öz təsdiqini taparsa, təhlükəli əməl sayıla bilər. Vasif Talıbov vəzifədə olan dönəmdə bu işlərin üstü açılmayıb. İnsanlar danışmaqdan ehtiyat ediblər. Bu əməllərə hüquqi qiymət verilməlidir. Ölkənin qanunları qarşısında hamı bərabərdir. Cinayət törətmiş şəxs mütləq öz cəzasını almalıdır. Ola bilər ki, kimlərsə Qasıma bu göstərişləri üstün vəzifə mövqeyindən istifadə edərək verib. Onda bu cinayətkar dəstənin bütün üzvləri müəyyən edilərək, məsiliyyətə cəlb olunmalıdır. Cəza sosial ədalətin bərpası, həm də yeni cinayətlərin qarşısını almaq üçün tətbiq edilir. Qasım adlı həmin şəxs təqaüddə olsa da, etdiyi əməllərin üstündən xeyli vaxt keçsə də, onun məsuliyyətə cəlb edilməsi ilə bağlı problem ola bilməz. Azərbaycan qanunları şəxsin cəzadan azad edilə bilməsi ilə bağlı hüququ tanıyır. Ancaq Qasımla bağlı belə hüquq müəyyən edilmir. Törədilən əməllərdə mütəşəkkil dəstə izi görünür. Bu kateqoriya cinayətlərə müddətin ötməsi ilə bağlı maddə şamil oluna bilməz. Cinayətin iştirakçısı olan şəxslər nə etdiklərini çox gözəl anlayıblar. Fakta görə cinayət təqibinə başlanmalıdır. Hər bir cinayətin subyekti öz əməlinə görə cəza alacaq. Burada Hacı Məmmədov olayına bir oxşarlıq da görürəm. Bütün təqsirkarlarla bağlı hüququn aliliyi səviyyəsində ölçülər götürüləcək. Burada dövlətin nüfuzuna xələl gətirilib. Naxçıvana çox təcrübəli nazir təyin edilib. Əminəm ki, hörmətli Süleyman Nemətov oradakı polisin nüfuzunu özünə qaytarmaq yolunda ciddi addımlar atacaq”.
Məhəmmədəli QƏRİBLİ
