Azərbaycanda tələbə köçürülməsi prosesi dayandırılıb. Bu barədə Elm və Təhsil Nazirliyi məlumat yayıb. Qeyd edilir ki, hazırda təhsilin müxtəlif pillələrində təhsil alan tələbələrin köçürülməsi ilə bağlı qanunvericilikdə dəyişikliklər hazırlanır. Məsələ geniş şəkildə Milli Məclisdə və ictimaiyyətdə müzakirə olunur.
Bu səbəbdən 2022-2023-cü tədris ilinin qış tətili müddətində transfer.edu.az portalı vasitəsilə respublika daxilində, eləcə də xarici ölkələrin ali və orta ixtisas təhsili müəssisələrindən (bir ixtisasdan və (və ya) təhsilalma formasından digərinə) tələbələrin köçürülməsi həyata keçirilməyəcək. Tələbələrin respublika daxilində və xarici ölkələrin ali təhsil müəssisələrindən köçürülməsi, həmçinin tələbələr sırasına bərpası məsələlərinə növbəti dəfə 2022-2023-cü tədris ilinin yay tətili müddətində baxılması nəzərdə tutulur.
Qeyd edək ki, tələbələrin bakalavriat səviyyəsində bir ali təhsil müəssisəsindən və ixtisasdan digərinə köçürülməsi zamanı tələbənin qəbul olunduğu və köçürülmək istədiyi ixtisaslar Dövlət İmtahan Mərkəzi tərəfindən müəyyən olunmuş eyni ixtisas qrupu daxilində olmalıdır. Ölkə daxilində bakalavriat səviyyəsində, tibb təhsilinin əsas tibb təhsili üzrə tələbələrin bir ali təhsil müəssisəsindən digərinə köçürülməsi, təhsilalma formasını və ya ixtisasını dəyişməsi o şərtlə aparıla bilər ki, DİM tərəfindən keçirilən qəbul imtahanlarında tələbənin topladığı bal qəbul olunduğu ildə köçürülmək istədiyi ali təhsil müəssisəsində müvafiq ixtisas üzrə minimal keçid balından az olmasın.
Bakıda yerləşən dövlət ali təhsil müəssisəsindən ölkənin regionlarında yerləşən ali təhsil müəssisəsinə köçürüldükdə, bu, tələbənin DİM tərəfindən keçirilən qəbul imtahanlarında topladığı bal nəzərə alınmadan aparılır. Həmçinin ölkənin bir regionunda yerləşən ali təhsil müəssisəsindən digər regionda yerləşən ali təhsil müəssisəsinə köçürüldükdə də bal nəzərə alınmır.
Maraqlıdır, tələbə köçürülməsi prosesində hansı dəyişikliklər gözlənilir?
“Qanuna dəyişikliklərdən sonra köçürülmələrdə olan boşluqlar, xoşagəlməz hallar aradan qalxacaq"
Azərbaycan Gənc Alim, Doktorant və Magistrlər Cəmiyyətinin sədri, təhsil üzrə ekspert İlqar Orucov bildirdi ki, tələbələrin köçürülməsi indiyədək Elm və Təhsil Nazirliyinin kollegiyasının təsdiq etdiyi qaydalarla tənzimlənib: “Ali təhsil müəssisələrinin bakalavriat və magistratura səviyyələrində, tibb təhsilinin əsas tibb təhsili üzrə təhsilalanların köçürülməsi, xaric edilməsi, bərpa olunması və akademik məzuniyyət götürülməsinə dair Qaydalar"ında bununla bağlı tənzimləmə mexanizmləri öz əksini tapıb. Amma son dəyişikliklə bu prosesin qanunvericilik bazası möhkəmlənəcək. Ali təhsilin bakalavriat səviyyəsində, tibb təhsilinin əsas tibb təhsili üzrə tələbələrin bir ali təhsil müəssisəsindən digərinə köçürülməsi, ixtisasının və təhsilalma formasının dəyişməsi, tələbələr sırasına bərpası və akademik məzuniyyətdən qayıtması qış və yay tətili dövründə həyata keçirilir. Hazırkı qaydaya görə, Bakıda yerləşən dövlət ali təhsil müəssisəsindən ölkənin regionlarında yerləşən ali təhsil müəssisəsinə köçürüldükdə, bu proses tələbənin DİM tərəfindən keçirilən qəbul imtahanlarında topladığı bal nəzərə alınmadan aparılır. Həmçinin ölkənin bir regionunda yerləşən ali təhsil müəssisəsindən digər regionda yerləşən ali təhsil müəssisəsinə köçürüldükdə də bal nəzərə alınmır. Belə halda bir ali təhsil müəssisəsindən digərinə tələbə axını başlayır. Nəticədə universitetlərin plan yerlərində qeyri-mütənasiblik baş verir”.
İ.Orucov onu da əlavə etdi ki, tələbələrin balı nəzərə alınmadan köçürülmə olduqda onların çoxlu fərq imtahanları yaranırdı. Bu isə tələbələrə çətinliklər yaşadırdı: “Onu da deyim ki, tələbənin bir ixtisasda üç il oxuyub sonradan tamamilə başqa istisasa köçürülməsi düzgün deyil. Bu zaman tələbə əsas yiyələndiyi ixtisasın imicini nəzərə alır. Onu həmin ixtisası necə öyrənməyi yox, alacağı diplom maraqlandırır. Bu isə keyfiyyətsiz mütəxəssislərin yetişməsinə səbəb olurdu. Qanuna dəyişikliklərdən sonra köçürülmələrdə olan boşluqlar, xoşagəlməz hallar aradan qalxacaq".
Ekspert hesab edir ki, ən böyük qanunsuzluqlar xarici ölkələrdən tələbə köçürmələri ilə bağlıdır. 2013-cü ilədək xarici ölkələrin ali təhsil müəssisələrindən Azərbaycan universitetlərinə tələbə köçürmələrində xeyli qanunsuzluqlar baş verib: "Adı olub özü olmayan universitetlərdən xeyli sayda tələbələr köçürmə yolu ilə yerdəyişmə ediblər. Onlar Bakıdakı ən yaxşı ali təhsil müəssisələrinə köçürülüblər. Bu daha çox hüquq fakultəsi ilə bağlı olub. Qəbul planına əsasən universitetlərin hüquq fakültəsinə plan yerindən dəfələrlə artıq məzun olub. Bu, köçürmələr hesabına baş verirdi. Son illər bu cür qanunsuz köçürmələrin qarşısı alınıb".
Günel CƏLİLOVA
