Prezidentin tələbələrin təqaüdlərinin artırılması ilə bağlı Fərmanında peşə təhsili alanlar da unudulmayıb. Subbakalavrlar, bakalavrlar, magistrlər və doktorantlarla yanaşı peşə təhsili müəssisələrində oxuyan tələbələrin də təqaüdləri artırılacaq.
Peşə təhsili müəssisələrində akademik göstəriciləri
“5” (yüksək texniki peşə təhsili səviyyəsində 91–100 bal) olan tələbələr üçün 100 manata, “4” və “5” (yüksək texniki peşə təhsili səviyyəsində 71–100 bal) olan tələbələr üçün 80 manata, “3” – “5” (yüksək texniki peşə təhsili səviyyəsində 51–100 bal) olan tələbələr üçün 66 manata çatdırılır. Beləliklə, bu ilin yanvar ayının 1-dən peşə təhsili müəssisələrində də akademik göstəricilərə uyğun şəkildə tələbələrin təqaüdləri artırılır.
“...Bu onlara böyük stimul verir”
“Vəfa” Sosial İctimai Birliyinin rəhbəri, eyni zamanda pedaqoji fəaliyyətlə məşğul olan Fatimə Hacıbəyli bizimlə söhbətində bildirdi ki, Prezidentin fərmanı ilə 150 mindən artıq tələbənin təqaüdünün artırılması çox mühüm hadisədir. O hesab edir ki, indiki şəraitdə tələbələrin də təqaüdünün artırılmasına ehtiyac vardı və bu artımın baş verməsi üçün rəsmi qərar verildi. Son dövrlər Azərbaycanda peşə təhsilinə maraq yarandığını qeyd edən F.Hacıbəyli hesab edir ki, peşə təhsilinə cəlb edilən yeniyetmə və gənclərin sosial rifahında təqaüd artımı xüsusi rol oynayacaq. “Dövlət səviyyəsində gənclərin peşə təhsilinə yönəldilməsi üçün bir sıra tədbirlər həyata keçirilib. Bütün hallarda peşə təhsilinin inkişafı bizə lazımdır və artıq bu istiqamətdə fəaliyyət göstərən təhsil müəssisələrinə kifayət qədər gənclər daxil olub. Peşə təhsili məktəblərində oxuyan tələbələrin aylıq təqaüdünün artırılması maddi vəziyyətlərinin yaxşı mənada dəyişməsinə səbəb olacaq. Yəni bu həm onların sosial rifah halına yaxşı təsir edəcək, həm də oxumağa maraqlarını artıracaq. Tələbələr görürlər ki, dövlət onların yaxşı oxuması, mütəxəssis kimi yetişməsi üçün təqaüdlərini artırır, bu onlara böyük stimul verir. Hər tələbə maksimim təqaüdü əldə etmək üçün daha çox çalışır. Tələbələr istəyirlər ayda 100 manat təqaüd alsınlar, buna görə də çalışıb akademik göstıriciləri həmin həddə çatdıracaqlar. Təqaüdlərinin artırılması peşə təhsilində oxuyan tələbələrə çox ciddi maddi və mənəvi təkandır”.
F.Hacıbəyli qeyd etdi ki, təqaüdü artırılan tələbələr sırasında peşəyönümlü müəssisələrdə təhsil alanların da olması bu sahəyə ciddi maraq artımına səbəb olacaq. Tələbələrin həm burada peşə, sənət öyrəndiyini, həm də aylıq təqaüd aldıqlarını vurğulayan F.Hacıbəyli deyir ki, bu amil həmin gənclərin öz peşələrini daha ürəkdən öyrənməsinə imkan yaradır. Dövlət başçısının hər zaman gənc nəslə böyük diqqət və qayğı göstərdiyini qeyd edən F.Hacıbəyli hesab edir ki, bu kimi dəstək addımları gənclərə stimul verir, onların cəmiyyət, dövlət üçün gərəkli olduğunu təsdiqləyir.
Leyla QARAXANLI
