Son dövrlər cəmiyyət arasında “uşaq pulu” müzakirələri geniş aparılır. Vətəndaşlar uşaqların böyüməsi üçün onların haqqı olan vəsaitin 18 yaşına kimi ödənilməsini tələb edirlər. Bir çox ölkələrdə olduğu kimi, Azərbaycanda da uşaqlar üçün müəyyən müavinətlər nəzərdə tutulub. Ancaq vətəndaşlar çox zaman bu müavinətlərin varlığından belə xəbərsiz olurlar.
Bilirsinizmi? Dövlət 1 yaşınadək uşağı olan aztəminatlı ailələr üçün müavinət nəzərdə tutub. Belə ki, "Ünvanlı dövlət sosial yardımı haqqında" Azərbaycan Respublikası Qanununa əsasən, ünvanlı (yəni bu ailələr eyni zamanda ünvanlı sosial yardım da ala bilər) sosial yardım təyin olunan ailəyə əlavə dəstək olaraq bir yaşadək uşağı olduğu halda uşağın bir yaşı tamam olan ayın sonunadək aylıq müavinət təyin edilir.
Məlumat üçün bildirək ki, 1 yaşınadək uşağı olan aztəminatlı ailələr üçün müavinətin həcmi artıb. Prezident İlham Əliyev Sosial müavinətlərin məbləğinin artırılması və “Sosial müavinətlərin məbləğinin artırılması haqqında” Azərbaycan Respublikası Prezidentinin 2013-cü il 29 avqust tarixli 973 nömrəli Fərmanında dəyişiklik edilməsi barədə fərman imzalayıb. Fərmana əsasən, bir yaşınadək uşağı olan aztəminatlı ailələrə sosial müavinətin məbləği hər uşaq üçün 100 (bir yüz) manat müəyyən olunub.
“Bir yaşınadək uşağı olan aztəminatlı ailələrə sosial müavinətin məbləği…”
“Vəfa” Sosial İctimai Birliyinin rəhbəri Fatimə Hacıbəyli qeyd etdi ki, uşaqların müdafiəsi Azərbaycanda dövlət siyasətinin əsas istiqamətlərindən biridir və Prezident İlham Əliyevin uğurlu sosial siyasəti nəticəsində daim güclənən sosial təminat sisteminin əhatə etdiyi əhali qruplarından biri də uşaqlardır. Ölkəmizdə 10-dan çox sosial təminat növü məhz uşaqların sosial müdafiəsinə yönəldilib: “Dövlət tərəfindən atılan bu addım cəmiyyətin həssas təbəqəsinə aid olan uşaqları əhatə etməsi səbəbindən olduqca müsbətdir. 1 yaşadək uşaqlar üçün nəzərə tutulan müavinətin artması yenidoğulanların sağlamlığı baxımından da vacib addımdır. Məlumdur ki, yeni doğulan uşağın xərci çox olur. Körpənin sağlamlığı üçün həkim müayinəsi, pampers, qida və digər tələblər xərc tələb edir. Bu səbəbdən də bir yaşınadək uşağı olan aztəminatlı ailələrə sosial müavinətin məbləği hər uşaq üçün 100 manat müəyyən olunması əhəmiyyətlidir”.
Birlik sədri onu da əlavə etdi ki, dövlətin əsas siyasəti ondan ibarətdir ki, uşaqlar çətinlik çəkməsin, problemdən uzaq olsun: “Bu müavinəti əldə edə bilmək üçün isə qeydiyyat yeri üzrə Dövlət Sosial Müdafiə Fondunun müvafiq şəhər, rayon şöbəsinə müraciət etmək lazımdır: “Müavinət aztəminatlı ailələr üçün nəzərdə tutulub. Müavinət üçün müraciət edən zaman şəxsin ailə vəziyyətini təsdiq edən sənəd-arayış təqdim edilməlidir. Bundan sonra ailəyə müavinət təyin edilir”.
Günel CƏLİLOVA
