Azərbaycanda sosial məsələlər, əhalinin sosial rifahının yüksəldilməsi daim dövlətin diqqət mərkəzindədir. Təsadüfi deyil ki, iqtisadi inkişaf tempinə görə dünyanın gündəmində olan Azərbaycan, həm də sosial dövlət kimi xarakterizə olunur.
Bu o deməkdir ki, dövlət siyasətinin bütün istiqamətlərində və sahələrində mərkəzdə məhz Azərbaycan vətəndaşı dayanır. Ölkəmizdə sosial təminatla bağlı çox uğurlu işlər həyata keçirilib. Məhz həyata keçirilən sosial-iqtisadi inkişaf siyasətinin, sosialyönümlü layihələrin qanunauyğun nəticəsi kimi Azərbaycanda insanların rifah halı daha da yaxşılaşdırılıb, əhalinin məşğulluq səviyyəsi artıb, işsizlik əhəmiyyətli dərəcədə aşağı düşüb. Sosial təminatın əsas göstəricilərindən biri kimi qəbul edilən yoxsulluğun səviyyəsinin aşağı salınması istiqamətində əldə olunan uğurlar da xüsusi qeyd edilməlidir. Dövlət siyasətinin əsas hədəfi respublikamızda yoxsulluğun tamamilə aradan qaldırılmasıdır. Məlumdur ki, bir neçə gün əvvəl ölkə başçısı İlham Əliyev əhalinin sosial vəziyyətinin yaxşılaşması ilə bağlı sərəncam imzalayıb. Sərəncama əsasən 20 Yanvar, hərbi xidmət vəzifələrini yerinə yetirməklə və Çernobıl AES-də hərbi xidmətlə əlaqədar əlilliyi müəyyən edilmiş şəxslərə Prezidentin aylıq təqaüdü də müvafiq olaraq 500 manata (I dərəcə), 400 manata (II dərəcə), 330 manata (III dərəcə) çatdırıldı.
“Çernobıl AES qəzası nəticəsində əlillik dərəcəsi alan şəxslərin sosial müdafiəsinin gücləndirilməsi müsbət haldır”
Çernobıl əlilləri üzrə müəyyən edilmiş müavinətin artmasının əhəmiyyəti haqqında danışan “Sosial Hüquqların Araşdırılması” İctimai Birliyinin sədri Mayis Əliyev bildirdi ki, Çernobıl AES qəzası nəticəsində əlillik dərəcəsi alan şəxslərin sosial müdafiəsinin gücləndirilməsi müsbət haldır: “Ölkədə Çernobıl əlillərinin hüquqlarını tənzimləyən xüsusi qanunvericilik aktı var. Bununla yanaşı, əlillərin sosial hüquqları ilə bağlı qanunlar onlara da şamil edilir. Bütün əlillər pensiya ilə təmin olunur. Həmçinin, Çernobıl əlillərinə pulsuz ev və avtomobillər də verilir”.
M.Əliyevin sözlərinə görə, dövlə başçısının müəyyənləşdirdiyi strateji kursa uyğun olaraq həyata keçirilən dövlət siyasəti vətəndaşların məmnunluğuna xidmət edir. Ölkənin dinamik iqtisadi inkişafı fonunda əhalinin bütün təbəqələri sosial paketlər, dəstək proqramları hazırlanıb həyata keçirilir və proqram paketləri getdikcə genişləndirilir: “Bu sərəncam dövlət başçısının növbəti dəfə cəmiyyətin sosial müdafiəsinə ehtiyacı olan təbəqəsinə göstərdiyi diqqətin bir nümunəsidir. Bu gün Azərbaycanın hər bir vətəndaşının sosial müdafiəsi üçün ölkə rəhbərliyi tərəfindən önəmli addımlar atılır. Sosial müavinətlərin şəffaf şəraitdə ünvanlara çatdırılması və onların həcminin artırılması istiqamətində mütəmadi olaraq tədbirlər həyata keçirilir. Hesab edirəm ki, biz bu kimi sərəncamların verilməsi xəbərini hələ çox eşidəcəyik və Azərbaycanın iqtisadi qüdrəti artdıqca sosial müdafiəyə ehtiyacı olan insanların pensiya həcmi daha da yüksək olacaq. Ölkə rəhbərinin cəmiyyətin sosial rifahının yüksəldilməsi istiqamətində imzaladığı fərmanlar və verdiyi sərəncamlar Azərbaycan xalqının dövlət başçısına göstərdiyi etimadı doğrultduğunu bir daha sübut edir".
Günel CƏLİLOVA
