Məlum olduğu kimi, Prezident İlham Əliyevin imzaladığı Fərmanla uşağın anadan olmasına görə birdəfəlik müavinət 200 manat artırılaraq 500 manata çatdırılıb. Yəni 2023-cü il yanvarın 1-dən doğulan uşaqlara 500 manat birdəfəlik müavinət veriləcək. Qeyd edək ki, indiyədək uşağın anadan olmasına görə birdəfəlik müavinət 300 manat idi.
Görünən odur ki, son 5 ildə uşağın dünyaya gəlməsinə görə verilən birdəfəlik müavinətlərin həcmi məhz bu il daha da artdı. Məsələn, 2018-ci ildə uşağın doğulmasına görə verilən birdəfəlik müavinət 109 manat idisə, 2019-da bu 200 manat, 2022-də 300 manat oldu, 2023-də isə daha da artırılaraq 500 manata çatdırıldı.Yəni təkcə bu il 200 manat artımdan söhbət gedir.
O baxımdan son artımın əhəmiyyətini ekspertlər necə dəyərləndirir?
“Belə artımların həyata keçirilməsi və davamlı hal alması gənc ailələrin sosial yükünü azaldacaq”
Məsələyə münasibət bildirən millət vəkili Aydın Hüseynovun fikrincə, bu, Azərbaycanda demoqrafik artıma müsbət təsir edəcək: “Əvvəla, dünya əhalisinin demoqrafiyası mütəmadi dəyişikliyə məruz qalır. Bu dəyişikliklər özünü əsasən iki istiqamətdə büruzə verir. Əhalinin yüksək və aşağı təbii artımı, əhalinin təbii azalması. İkinci vəziyyət demoqrafik böhran hesab edilir və ölüm hallarının doğuşa nisbətdə üstünlük təşkil etməsi ilə ortaya çıxır. Digər tərəfdən, əhali arasında yaşlıların artması və uşaqların azalması ilə müşahidə edilir. Şükürlər olsun sadalanan problemlər Azərbaycanda mövcud deyil. Üstəlik, hər il əhaliyə göstərilən sosial diqqət artırılır. Bunun nəticəsi olaraq bu ilin yanvarın 1-dən həm minimum əmək haqqı, həm yaşayış minimumu, həm də minimum pensiyalar artırıldı. O cümlədən, ölkə prezidentinin sərəncamı ilə yeni doğulan uşaqlara verilən yardım 500 manata qaldırıldı. Bu, birinci növbədə vətəndaşın maddi rifahına xidmət edən addımdır. Eyni zamanda, vətəndaşa verilən dəyərdir. Ölkə vətəndaşına bir mənəvi dəstəkdir. Başqa bir tərəfdən bu, həmin ailələrə bir kömək, yardımdır. Çünki uşaq doğularkən bir sıra zəruri xərclər ortaya çıxır. Hesab edirəm ki, həmin xərclərin qarşılanması baxımından bunun müəyyən müsbət təsiri olacaq. Prezidentin sosial sferaya belə diqqət və qayğısı onu göstərir ki, ölkədə aparılan sosial siyasət vətəndaşların maddi durumunun yaxşılaşmasına xidmət edir. Bütün bunlar həm də ölkə əhalisinin demoqrafik mənzərəsinə müsbət təsir edir. Çünki sözügedən sahənin diqqət mərkəzində saxlanılması həm də strateji əhəmiyyət kəsb edir. Hesab edirəm ki, bu kimi artımların həyata keçirilməsi və davamlı hal alması gənc ailələrin sosial yükünü azaldacaq. Həmçinin, ölkədəki doğum səviyyəsinin artmasınamüsbət təsir edəcək. Çünki bu artım hələ son deyil. İstisna deyil ki, növbəti illərdə də buna görə verilən birdəfəlik yardımların həcmi artacaq”.
Vidadi ORDAHALLI
