Azərbaycan sosial dövlət kimi artıq özünü təsdiqləyib. İl-ildən sosial islahatlar daha da genişlənir, daha çox sahələri əhatə edir. 2022-ci ildə də biz böyük sosial islahatlar dövrünü yaşadıq. Dövlətin bu sahədə siyasəti davamlıdır, məntiqi ardıcıllığa söykənir.
2023-cü ildə də ölkə başçısı bir sıra istiqamətlər üzrə müavinətlərin artırılması üçün fərman imzaladı. Beləliklə, 2023-cü ilin başlanğıcında yeni sosial islahat mərhələsi başladı.
Əlbəttə, Prezident İlham Əliyevdən həssas qruplara növbəti dəstək xüsusi təqdir olunur. Qeyd etdiyimiz kimi, müavinət və təqaüdlər də artırıldı.
Şəhid ailələri, müharibə ilə əlaqədar əlilliyi olan şəxslər üçün Prezident təqaüdlərində də artımlar edildi.
İmzalanmış yeni Fərman və Sərəncamlara əsasən, 2023-cü ilin 1 yanvarından şəhid ailəsi üçün Prezidentin aylıq təqaüdü - 600 manata çatdırılır, müharibə, 20 Yanvar, hərbi xidmət vəzifələrini yerinə yetirməklə və Çernobıl AES-də hərbi xidmətlə əlaqədar əlilliyi müəyyən edilmiş şəxslərə Prezidentin aylıq təqaüdü, orqanizmin funksiyalarının:
81-100 faiz pozulmasına görə (I dərəcə) 500 manata,
61-80 faiz pozulmasına görə (II dərəcə) 400 manata,
31-60 faiz pozulmasına görə (III dərəcə) 330 manata çatdırılır,
uşağın anadan olmasına görə birdəfəlik müavinət 500 manata çatdırılır.
Məlumdur ki, Prezident İlham Əliyevin imzaladığı yeni Fərman və Sərəncamlar 2023-cü il üzrə yeni sosial islahat paketi çərçivəsində əhalinin rifahının yaxşılaşdırılması, bir sıra kateqoriyalara, o cümlədən şəhid ailələrinə, müharibə ilə əlaqədar əlilliyi olan şəxslərə və b. yönələn sosial ödənişlərin artırılması istiqamətində növbəti mühüm addımların atılmasını təmin edir. Bununla da son beş ildə artıq dördüncü sosial islahat paketi reallaşır.
Qeyd edək ki, 2023-cü ildə yeni sosial islahat paketi üzrə 1,9 milyon vətəndaşı əhatə edən sosial ödənişlərdə növbəti artımlar üçün illik əlavə 750 milyon manat vəsait nəzərdə tutulub.
"...Şəhid ailələrinin sosial müdafiəsinə yönəlik addım olaraq qiymətləndirmək olar"
“Liberal İqtisadçılar” İB-nin sədri Akif Nəsirli bizimlə söhbətində bildirdi ki, Prezident fərmanı ilə Azərbaycanda sosial müavinətlərin məbləğləri müəyyənləşib. Ekspert vurğuladı ki, Prezident İlham Əliyev sosial müavinətlərin məbləğinin artırılması və “Sosial müavinətlərin məbləğinin artırılması haqqında” Azərbaycan Respublikası Prezidentinin 2013-cü il 29 avqust tarixli 973 nömrəli Fərmanında dəyişiklik edilməsi barədə Fərman imzalayıb. Burada cəmiyyətin həssas qruplarına xüsusi önəm verildiyini deyən A.Nəsirli hesab edir ki, əhali yeni ildə hökumətdən belə bir addım gözləyirdi və o addım da atıldı: "Prezidentin belə bir fərman verəcəyini əhali gözləyirdi. Xüsusən də həssas qrupa aid olan vətəndaşlar gözləyirdilər ki, hökumət belə bir qərar qəbul edəcək, pensiyaların, müavinətlərin, təqaüdlərin məbləğini artıracaq. Belə də oldu. Şəhid ailələrinə verilən təqaüdün 600, uşağın anadan olmasına görə birdəfəlik müavinətin 500 manata çatdırılması müsbət haldır. Prezidentin bu istiqamətdə imzaladığı fərmanın böyük sosial əhəmiyyəti var. Əhali bu artımı arzulayırdı. Təbii ki, Azərbaycan hökumətinin bu istiqamətdə ayırdığı addım yerinə düşdü". A.Nəsirli vurğuladı ki, vətəndaşların bahalıq və inflyasiya ilə üz-üzə qaldığı bir dövrdə Prezident müavinətlərin, təqaüdlərin, pensiyaların, minimum əməkhaqqının artırılması ilə bağlı fərman və sərəncamlar imzaladı.
" Bunlar hamısı təqdirəlayiq məsələdir, müsbət haldır. Son addımları da şəhid ailələrinin sosial müdafiəsinə yönəlik addım olaraq qiymətləndirmək olar. Elə uşağın doğulmasına görə birdəfəlik yardımın həcminin artırılması da təqdirəlayiq haldır. Hesab edirəm ki, hökumət bu istiqamətdə addımlarını daha da gücləndirəcək və növbəti illərdə bu vəsaitin həcmi daha da artırılacaq".
A.Nəsirli hesab edir ki, əhalinin həssas təbəqəsinə aid olan şəhid ailələrinin və gələcəyimiz olan uşaqların həyatının daha da yaxşılaşdırılması əsas hədəflərdəndir. Bu gün onun təzahürlərinin açıq şəkildə ifadə olunduğunu deyən müsahimiz qeyd edir ki, qəbul edilən bu qərarlar cəmiyyətə, vətəndaşlara müsbət təsir göstərir.
İradə SARIYEVA
