Qarlı, şaxtalı havada paytaxt ərazisində göz oxşayan mənzərə, ürək açan fotolarla yanaşı, hər kəsi məyus edən görüntülər də az olmadı. Şəhərin iflic yollarının qardan təmizlənməsi üçün ağır texnika əvəzinə, daha çox əli “lapatka”lı, “xüsusi təyinatlı” “JEK” işçilərindən istifadə edildiyini gördük.
Təhlükəli yolların kənarında qalaqlanmış qarı təmizləyənlər arasında yaşlı qadınların da olması isə ciddi qınaq obyektinə çevrilib. Qadınların belə qarlı havada küçə təmizləmələri müzakirələrə səbəb olub. Fotolar paylaşılır, müvafiq qurumlar tənqid edilir.
Qeyd edək ki, qar yağanda küçələrdə, yolların kənarlarına qalaq-qalaq yığılan, əriməyən qarı təmizləyən texnologiya mövcuddur. Texnikanın inkişaf etdiyi bir dövrdə bu il texnologiyadan deyil, qadın əməyindən istifadə edildi.
Elçin Bayramlı: “Qadın və yaşlı insanların küçələrin qarını təmizləməsi onu göstərir ki, hazırlıq sıfır səviyyəsindədir”
Sağlam Cəmiyyət Hərəkatının rəhbəri, sosioloq Elçin Bayramlı bildirdi ki, Bakı qışa hazır deyil, nə qədər qurumlar hazır olduqlarını desələr də görünən mənzərə fərqlidir: “Maraqlıdır, sərt şaxtalar düşsə, o zaman şəhər tam iflic olacaq? Ümumiyyətlə, küçələrin təmizlənməsi prosesi də həmişəki kimi biabırçılıqla müşahidə olundu. Müvafiq texnika əvəzinə, küçələri qoca insanlar təmizləyir. Qadın və yaşlı insanların küçələrin qarını təmizləməsi onu göstərir ki, hazırlıq sıfır səviyyəsindədir. Müvafiq təşkilatlara indiyədək lazımi vəsait ayrılsa da, ortalıqda cəmi bir neçə texnika görünür”.
Sosioloq qeyd etdi ki, müvafiq təşkilatlar həmişə hər şeyə hazır olduqlarını açıqlayırlar, amma belə havalarda əhali o hazırlığı görmür. Hətta bir çox məktəblərdə və bağçalarda istilik problemi oldu: “Belə biabırçılıq heç bir yerdə görünməyib. Elə ölkələr var ki, 9-10 ay qış olur, bir problem belə yaranmır. Bizdə isə qışa hazırlıq sıfır vəziyyətdədir".
Ərşad Hüseynov: “Qartəmizləyən texnikalarla səki təmizləmək mümkün deyil, bunun üçün xüsusi kiçik texnikalar var”
Nəqliyyat üzrə ekspert Ərşad Hüseynov qeyd etdi ki, Azərbaycanda səkiləri təmizləmək üçün xüsusi texnika yoxdur: “Yolların qırağı ibtidai üsulla – bellə təmizlənir. Gələcəkdə bu texnikaların alınması haqqında düşünməyə dəyər. Bakı şəhərində qarla bağlı təmizləmə işləri aparanda piyadalar tamam unudulur. Amma unudulmamalıdır. Çünki piyadalar yol hərəkətində daha çoxdur, nəinki avtomobil və sürücülər. Piyadaların təhlükəsizliyi üçün şərait yaradılmalıdır. Bunu qanun da tələb edir. Qartəmizləyən texnikalarla səki təmizləmək mümkün deyil. Bunun üçün xüsusi kiçik texnikalar var. Balaca, yüngül, asanlıqla səkilərə çıxır və təmizləmə işini apara bilir".
Günel CƏLİLOVA
