“Ötən il şəhid ailələri və müharibə əlillərinə dəstək istiqamətində də önəmli addımlar atılıb. Bu kateqoriyadan olan 1500 ailəyə dövlət tərəfindən mənzillər verilib, 2021-ci ildə isə 3 min mənzil verilmişdi. Bu il də ən azı 1500 mənzil veriləcək. Beləliklə, hələ növbədə duran bu kateqoriyadan olan insanların hamısına dövlət tərəfindən mənzillər veriləcək”.
Bunu Prezident İlham Əliyev yerli televiziya kanallarına müsahibəsində səsləndirib.
Prezident qeyd edib ki, bugünə qədər 13 min ailə bu imkanlardan faydalanıb: “Bu da müharibə yaşamış ölkələr arasında, belə demək mümkündürsə, bir bizim yeniliyimizdir. Çünki bir çox ölkələrdə belə praktika yoxdur. Biz bunu nə üçün edirik? Çünki bu, o ailələr qarşısında bizim mənəvi borcumuzdur və bu borcu imkan daxilində yerinə yetirməyə çalışırıq”.
Qeyd edək ki, xarici ölkələrdən fərqli olaraq, Azərbaycanda şəhid ailələrinə dövlət tərəfindən xüsusi qayğı, diqqət göstərilir.
“Ölkəmizin ərazi bütövlüyünün və müstəqilliyinin müdafiəsi uğrunda şəhid olmuş döyüşçü ailələrinin mənzil-məişət şəraitinin yaxşılaşdırılması dövlətin sosial siyasətinin əsas istiqamətlərindən biridir”
Iqtisadçı ekspert Pərviz Heydərov bildirdi ki, Prezident İlham Əliyev yerli televiziya kanallarına müsahibəsində bildirdi ki, Azərbaycan sosial dövlətdir və biz bunu sözlə yox, əməlimizlə təsdiqləyirik. Sosial sahə isə çoxşaxəlidir: “Məsələ burasındadır ki, dövlətimiz və hökumətimiz bütün bu şaxələr üzrə uğurla tələb olunan müvafiq siyasət həyata keçirə bilir. İkinci Qarabağ müharibəsində əlil olmuş 379 hərbçi ən müasir protezlərlə təmin edilib. Bundan əlavə, Azərbaycanda dövlət büdcəsi sosialyönümlüdür, yəni büdcə xərclərinin böyük hissəsi maaş, pensiya və sosial müavinətlərin ödənişinə gedir. Və dövlət büdcəsinin də həcmi artdıqca bu sosialyönümlülük durmadan gücləndirilir”.
Iqtisadçının sözlərinə görə, 2023-cü ilin dövlət büdcəsindən sosial istiqamətə ( əməyin ödəniş fonduna, ərzaq məhsullarının alışına, təqaüd və sosial müavinətlərə, dərman, sarğı ləvazimatları və materiallarının alınmasına, icbari tibbi sığorta və koronavirus (COVID-19) pandemiyasına qarşı mübarizə tədbirlərinə, kommunal, kommunikasiya xidmətləri və digər tədbirlərə) 15 milyard 218 milyon 900 min manat ayırmaq nəzərdə tutulub. Bu da keçən ildəki ilə müqayisədə 1 milyard 289 milyon 200 min manat (9,3%) çoxdur.
P.Heydərov onu da əlavə etdi ki, ölkəmizin ərazi bütövlüyünün və müstəqilliyinin müdafiəsi uğrunda şəhid olmuş döyüşçü ailələrinin və müharibə əlillərinin mənzil-məişət şəraitinin yaxşılaşdırılması, onların yeni mənzillərlə təminatı dövlətin sosial siyasətinin əsas istiqamətlərindən biridir. Həyata keçirilən siyasətin əsas məqsədi budur ki, həmin kateqoriyadan olan vətəndaşlar hər cür qayğı ilə əhatə olunsunlar.
Iqtisadçının dediyinə görə, Azərbaycan dövlətinin ölkəmizin ərazi bütövlüyü uğrunda həlak olan, yaralanan, zərər çəkən insanların sosial müdafiəsi istiqamətində bütün resurslarından istifadə etməsi hər il artan xətt üzrə inkişaf edir. Bu da ölkə Prezidentinin Azərbaycan vətəndaşına verdiyi dəyərin daha bir göstəricisidir.
Günel CƏLİLOVA
