Astara elinin qəhrəman oğlu, Vətən müharibəsinin qazisi Samir Əliyev doğma kəndi Suparibağda ömrünün 33-cü ilini yola salır. Bu qəlbi sevdalı insan gözəl ailə başçısıdır, hala ocağında elinə, yurduna layiq bir övladı böyüyür.
44 gün çəkən, xalqımıza zəfər sevincini yaşadan İkinci Qarabağ müharibəsinə Samir könüllü qoşulur. Əlinə silah götürüb 30 il əsir düşən müqəddəs Azərbaycan torpaqlarının azadlığı naminə ən ağır müharibə meydanlarında erməni dığalarına qan qusdurur. Vətən sevgisi Samiri çox döyüşlərdən sağ çıxardır. Onun şücaəti dillərdə dastana dönür. İgid əsgər qələbəmizə gedən yolda ağır yaralanır. Bir müddət Azərbaycanda müalicədən sonra YAŞAT Fondu Samiri Türkiyəyə göndərir. Qardaş ölkədə igidimizə böyük hörmətlə yanaşır, onu sağlam həyata qaytarırlar.
Hazırda Samir öz evindədir. Astara Rayon İcra Hakimiyyətinin başçısı Qəzənfər Ağayev ona baş çəkdi. Sağlamlığına sevinən, qayğılarını ətraflı öyrənən icra başçısı səmimi söhbət zamanı dedi: “Müharibədə düşməni məğlub edən qazi və qəhrəman şəhidlərimiz Azərbaycan xalqının ən cəsur, mərd övladlarıdır. Onların Ali Baş Komandan İlham Əliyevin rəhbərliyi altında qazandığı tarixi qələbədə ölkəmizin ərazi bütövlüyü bərpa olundu. Bu zəfər rəhbərlə xalqın birliyi, qəhrəman əsgər və zabitlərin Vətən sevgisi, əzmi, iradəsi və Ali Baş Komandana böyük inamı hesabına yarandı. Fəxr edə bilərsən ki, sən də düşmənin uzun illər ərzində qurduğu müdafiə səddini yaran ilk döyüş əməliyyatının qəhrəmanısan. Sənin və digər qəhrəman Vətən sevdalıların müharibədə göstərdiyi igidliklər heç vaxt unudulmaz, həmişə örnək olacaqdır”.
Keçdiyi döyüş yolundan, düşmənlə qızğın savaş gedərkən həkimlərin onu həyatda saxlaması üçün göstərdiyi fədakarlıqdan danışan Samir onu da bildirdi ki, Füzulinin Qaraxanbəyli kəndinin azadlığı uğrunda qızğın döyüşlərdə ağır yaralandım. İlkin tibbi yardımdan sonra 2021-ci ilin mart ayınadək Bakı şəhərində müalicə olundum. Həkimlərin məsləhətinə əsasən müalicəmin davamından ötrü həmin tarixdən YAŞAT Fondu məni qardaş Türkiyə Respublikasına göndərdi. Yaxın günlərdə müalicəmi davam etdirmək üçün yenidən Türkiyəyə gedərəm. Sağlamlığım məni narahat etmir. Şanlı qələbədə əməyim olduğuna hədsiz sevinirəm, onun memarı Müzəffər Ali Baş Komandanla qürur duyuram. Bütün qayğılara görə hamıya minnətdaram.
Samir Əliyevin atası Daşqın kişi qazi və şəhid ailələrinə olan yüksək diqqətə, həmçinin övladının uzun müddətli müalicəsinə görə ölkə Prezidenti cənab İlham Əliyevə, eləcə oğlunu ziyarətə görə icra başçıya razılıq etdi, Vətənin müdafiəsinin hər bir oğulun müqəddəs vəzifəsi olduğunu söylədi.
İcra başçısı Vətən üçün ləyaqətli, vətənpərvər övlad böyütdüyünə görə ataya minnətdarlıq etdi, igid döyüşçü Samirə tezliklə tam sağlamlığı arzuladı.
Vətənin qalib əsgəri Samir Əliyev cənab Prezidentin Sərəncamları əsasında Füzulinin, Cəbrayılın, Qubadlının, Şuşanın azadlığına görə, “Vətən uğrunda” və “Cəsur döyüşçü” medallarına layiq görülüb.
Zəfər ORUCOĞLU Azərbaycan Jurnalistlər Birliyinin üzvü
