Sumqayıtda 10 A saylı marşrut xətti üzrə fəaliyyət göstərən avtobusların sürücüləri işə çıxmaqdan imtina ediblər. Nəticədə əksər sərnişinlər soyuq havada yolda qalıblar. Avtobus sürücülərinin xəttə çıxmamasının səbəbi gündəlik planın çox olmasıdır.
Sürücülər iddia edir ki, ödəməli olduqları gündəlik planın məbləği yüksəkdir. Buna görə də işə çıxmaqdan imtina ediblər. Təbii ki, bu vəziyyətdən ən çox əziyyət çəkən isə sərnişinlərdir.
Qeyd edək ki, bu kimi problem zamanla yaşanıb. Bəzi daşıyıcıların sürücüləri gündəlik planın çox olmasını əsas gətirib işə çıxmaqdan imtina ediblər.
“Sürücülər günlük planı doldurmaq məqsədilə interval müddətini keçir, insanların həyatını təhlükə altına atırlar”
Sosial sahə üzrə ekspert Elxan Əliyev qeyd etdi ki, nəqliyyat sahəsi elə bir sahədir ki, bəlkə də qaydaların tətbiqi ilə bağlı ən çox düzəlişlər məhz bu sahədə edilir. Lakin təəssüf ki, hələlik ictimai nəqliyyatda biz ciddi irəliləyişə nail ola bilməmişik: “Hesab edirəm ki, problemin əsasında ciddi nəzarətin olmaması dayanır. Bugünə kimi müxtəlif qaydalar tətbiq olunsa da, ictimai nəqliyyatla bağlı xidməti həyata keçirən şirkətlər tətbiq olunan qayda və qanunlara nəzarət funksiyasını həyata keçirmirlər. Bundan başqa, həmin şirkətlər bu qaydalara birmənalı yanaşmırlar. Danılmaz faktdır ki, bu gün daşıyıcı şirkətlər avtobus sürücülərinin qarşısında günlük plan qoyub. Hansı sürücü həmin planı təhvil verməsə işdən çıxarılır. Bu səbəbdən də sürücülər günlük planı doldurmaq məqsədilə interval müddətini keçir, insanların həyatını təhlükə altına atırlar. Ona görə də bu sahədə anarxiya var desəm, yəqin ki, yanılmaram. Ödəniş sisteminin dəyişilməsi də avtobuslarda sərnişin sıxlığının azalmasına təsir göstərən amillər sırasındadır. Kartla ödəniş sisteminə keçidin bu cəhətdən müəyyən qədər təsiri var. Əvvəllər sürücülərin məvacibi gündəlik plan əsasında ödənildiyinə görə onlar çalışırdı ki, avtobusa daha çox sərnişin mindirsinlər və qazancları daha çox olsun. Çünki onların qazancı yığılan vəsaitdən ödənilirdi. Bu səbəbdən də avtobuslarda sərnişin sıxlığı olurdu. Düzdür, şəhərdaxili avtobuslarda kart sistemi tətbiq olunub. Ancaq Bakı ətrafı qəsəbələrdə, eləcə də Sumqayıtda avtobuslar kart sistemi ilə işləmir. Bu səbəbdən də bu kimi problemlər yaşanır. Sumqayıtda yaşanan məlum problemin həlli üçün şirkət sürücülərlə razılığa gəlməlidir. Nəzərə almaq lazımdır ki, bu işdən ən çox əziyyət çəkən sərnişinlərdir”.
Günel CƏLİLOVA
