Əhaliyə at əti və ölmüş mal əti satanlar yenidən fəallaşıblar. Təkcə ötən il Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin əməkdaşları bir neçə belə cinayətin qarşısını alıblar və müvafiq polis orqanları bu istiqamətdə fəaliyyətlərini dayanmadan davam etdirirlər.
Buna baxmayaraq bu işlə məşğul olanlar öz fəaliyyətlərindən hələ əl çəkmir. Məlumata görə,qırmızı ətin qiyməti artandan sonra satış məntəqələrində mal əti adı altında at və eşşək əti satanların sayı artıb. Qiymətin ucuz olması insanları şirnikləndirir və məhsulun mənşəyini öyrənmədən alıb istehlak edirlər.
Eyyub Hüseynov: “At əti və ölmüş mal əti satışının genişlənməsinin ciddi səbəblərindən biri…”
Azad İstehlakçılar İctimai Birliyinin sədri Eyyub Hüseynov bildirdi ki, rəhbərlik etdiyi qurum 20 ildən çoxdur ki, at, eşşək, murdar olmuş heyvan əti satan şəbəkəni ifşa edir: “Əlbəttə, biz bu ifşalarda daim dövlət orqanlarının köməyindən istifadə edirik. Lakin təəssüflər olsun ki, bunun qarşısı tam alınmır. Bu sahədə ən uğurlu işi DİN-nin Baş Mütəşəkkil Cinayətkarlıqla Mübarizə İdarəsi görür. Bunu edənlərə qarşı cinayət işi qaldırılır, onlar həbs olunurlar. Təəssüf ki, belə cinayətlərə görə məsuliyyətə cəlb olunanlara məhkəmə haqq qazandıraraq azadlığa buraxır".
Ekspertin sözlərinə görə, at əti və ölmüş mal əti satışının genişlənməsinin ciddi səbəblərindən biri qida təhlükəsizliyinin və qida keyfiyyətinin təmin olunması sahəsində dövlətin qanunlarının zəifliyi və bu qanunlara nəzarət edən dövlət orqanlarının passivliyidir: “Hökumət biznes qurumları üçün bir toxunulmazlıq status yaradıb. Onlar da bundan istifadə edib insanların həyatını təhlükə altına atırlar. Bunun nəticəsində apteklərdə insanların növbədə olduqlarını, həkimlərin növbəsinin dolduğunu görürük”.
E.Hüseynov hesab edir ki, bu problemlə bağlı ciddi cəza tətbiq edilməlidir: "Ilk olaraq bu tip ətlərin satışına qanuni şəkildə qadağa qoyulmalıdır. Həmçinin, hökumət üzünü istehlakçılara doğru çevirməli, qida sahəsində yoxlamalar bərpa olunmalı və təhlükəli qida satan yerin cəld ifşa olunması üçün mexanizm hazırlanmalıdır".
Ağa Salamov: “At ətini satırlar, amma bilinmir ki, həmin at ölmüş at olub, ya qoca olub”
Qida məsələləri üzrə ekspert, baş mütəxəssis Ağa Salamov bildirdi ki, at ətini kəsib mal əti adı ilə satan leşsatanlar, vicdanını itirmişlər var. Onlar at ətini mal əti adı ilə insanlara satırsa bu, birbaşa cinayətdir. Bunun qarşısı alınmalıdır və düşünürəm ki, alınır: “At ətini satırlar, amma bilinmir ki, həmin at ölmüş at olub, ya qoca olub. Siz mal ətini alırsınız, gətirib evdə qaynadırsınız 1 saata bişmiş olur, amma at ətini 3-4 saat bişirməlisiniz ki, o hazır olsun. Çünki Azərbaycanda yaşlı olmayan atı heç kəs kəsmir, bizdə at yük heyvanı kimi istifadə olunur, artıq at yaşlanır, gücdən düşür, istifadəyə yararsız olur, bu zaman onu kəsib mal ətinin arasında satırlar gedir. Ətin mənşəyini ilk növbədə rənginə görə ayırd etmək mümkündür. Buna aldanmamaq, aldığınız ətin mal əti olub-olmadığını yoxlamaq üçün də yollar var. At ətində olein turşusu çox olur, bu yağ turşusu da tünd sarı, kəhrəba rəngində olur. Siz əgər alacağınız ətdə həmin kəhrəba rəngini görürsünüzsə, ətdə bir balaca qaraltı hiss edirsinizsə, şübhələnə bilərsiniz ki, həmin ət at ətidir və o ətdən uzaq durmalısınız.
İnsanları aldatmaq olmaz. Əgər at ətini satmaq istəyirlərsə, bir köşk yaratsınlar, necə ki, donuz əti satılan xüsusi yerlər var, eləcə də at əti satsınlar. Azərbaycan tolerant ölkədir, burada yaşayan qeyri-millətlər, xristianlar var ki, onlar satılan həmin donuz ətini alıb istifadə edirlər. At əti satanlar da bunu qeyd etsin. Kim istəyirsə, gedib alsın və və yesin, amma əmin olun ki, bu ət çox nadir hallarda satılacaq. Çünki ölkəmizdə at ətinə tələbat yoxdur”.
Günel CƏLIlOVA
