Azərbaycanın sığorta şirkətləri kiçik mühərrikli avtomobillərin sığortalanmasından imtina etməyə çalışır. Son aylar bazarda ayrı-ayrı sığorta şirkətləri tərəfindən tətbiq edilən qaydalar bunu deməyə əsas verir.
Danılmaz faktdır ki, son illər ölkədə avtomobillərin sayı kəskin artıb. Artım əsasən kiçik həcmli mühərrikli avtomobillərin hesabına olduğuna görə, icbari sığorta yığımlarının həcmi ciddi şəkildə artmayıb. Nəticədə, sığorta şirkətlərinin təminatları və ödənişləri yığımlarından daha sürətlə artır və zərərlilik yüksəlir.
Qeyd edək ki, yeni illə bağlı avtomobillərinin sığorta müddəti yenilənməlidir. Lakin sığorta şirkətləri onların avtomobillərini sığortalamaqdan imtina edirlər. Səbəb kimi isə avtomobilin buraxılış ilinin köhnə olması və yaxud da heç bir qanunvericilik əsası olmayan məsələləri göstərirlər. Hətta bəzi şirkətlərin dilində “qadağa maşın” ifadəsi də yaranıb. Belə ki, həmin avtomobillərin sığortalanmasının “qadağan” olunduğunu bildirirlər.
Elməddin Muradlı: “Sığorta şirkətləri qanunvericilikdə olmayan tələbləri irəli sürdüyünə görə məsuliyyətə cəlb edilməlidir”
Nəqliyyat eksperti Elməddin Muradlı bildirdi ki, bu tamamilə qanunsuz hərəkətdir: “İcbari sığortalar haqqında qanunun 25, 26-cı maddələrində sığorta şirkətlərinin insanlara qarşı münasibəti tam olaraq öz əksini tapıb. Onların heç bir hüququ yoxdur ki, belə bir imtina etsinlər. Və qanunvericilikdə olmayan tələbləri irəli sürdüyünə görə də onları məsuliyyətə cəlb etmək mümkündür. Bunun üçün vətəndaş sadəcə olaraq Maliyyə Nazirliyinə və ya Mərkəzi Banka müraciət etməlidir. Çox təəssüflər olsun ki, vətəndaşlar fərdi qaydada bu işləri orda-burda qabardırlar, danışırlar, amma qanuni addım nədirsə, onu atmaq lazım gəlirsə, bu zaman çəkinirlər, heç bir addım atmırlar. Vətəndaşın belə problemlərlə rastlaşdığını Mərkəzi Bank, Maliyyə Nazirliyinin rəhbərliyi çox yaxşı bilir. Bəlkə də, həmin strukturlarda kimlərsə bu işlərdə sığorta şirkətlərinə dəstək göstərir. Bu özbaşınalığa son qoyulmalıdır. Necə olur, sığorta şirkətlərinin xeyrinə qərarlar qəbul olunanda hamısı əl-ələ verib birlik nümayiş etdirir, amma sığorta şirkətlərinin özbaşınalığından xəbərdar ola-ola özlərini xəbərsizmiş kimi aparırlar? Konkret qərar çıxarıb, hər birini tapşırıq şəklində göndərsələr ki, siz belə özbaşınalıq etməməlisiniz, etməyə görə filan cəzalar nəzərdə tutulub, o zaman bu işlərdən əl çəkmiş olarlar. Amma görünür, Maliyyə Nazirliyi və Mərkəzi Bank buna maraq göstərmir, neqativ hallara göz yumur”.
Elxan Əliyev: “Avtomobilin sığortası ilə bağlı heç bir sığorta şirkətinin imtina etmək kimi bir hüququ yoxdur”
Sosial sahə üzrə ekspert Elxan Əliyev qeyd etdi ki, sığorta şirkətləri hazırda qeyri-rəsmi olaraq kiçik mühərrikli avtomobillərin sığortasından imtina edir. Bunu həmin nəqliyyat vasitələrinin daha çox qəza risqi ilə üzləşməsi ilə əlaqələndirirlər. Amma bütün kiçik mühərrikli avtomobil sahibləri taksi fəaliyyətinə cəlb edilmir: “Bununla belə, hər iki halda tətbiq edilən qadağa qanunsuzdur və tənzimləyici qurum Mərkəzi Bank tərəfindən bu addımı atan sığorta şirkətlərinə qarşı sanksiya tətbiq edilməlidir. Ümumiyyətlə, avtomobilin sığortası ilə bağlı heç bir sığorta şirkətinin imtina etmək kimi bir hüququ yoxdur”.
Günel CƏLİLOVA
