Bakıda fəaliyyət göstərən dönərxanalardakı vəziyyət zaman-zaman müzakirə olunub. Ən çox da həmin iaşə obyektlərinin sanitar-gigiyenik normalara cavab verib-verməməsi və ətin keyfiyyəti ilə bağlı tələblər danışılır, yazılır.
Bu günlərdə Azərbaycan Qida Təhlükəsizliyi Agentliyinin əməkdaşları tərəfindən dönər məhsulunda at DNT-si aşkar edilib. Uyğunsuzluq aşkarlanmış 2 müəssisədə (“Xırman” MMC və fiziki şəxs Salamov Ramin Yusif oğluna məxsus “Dönərçi Baba” dönər evi) plandankənar yoxlama aparılıb. Yoxlama çərçivəsində hər 2 müəssisədə aşkar edilmiş uyğunsuzluqlarla əlaqədar inzibati tədbir görülüb, “Dönərçi Baba” dönər evinin fəaliyyəti məhdudlaşdırılıb.
Qeyd edək ki, zaman-zaman dönərxanalarda istifadə olunan ətin keyfiyyəti ilə bağlı müxtəlif fikirlər səslənir. At, eşşək və ya leş ətin dönərdə istifadə ediməsi ilə bağlı müəyyən məlumatlar yayılır. Maraqlıdır, dönərxanalarda ət niyə yoxlanılmır?
“Dönərxanalardan asılan ətin keyfiyyətinin baytar yoxlamasını əks etdirən sənədlərin çoxu formal, yoxlanılmadan verilir”
Azad İstehlakçılar Birliyinin sədri Eyyub Hüseynov bildirdi ki, belə hallar dönərxanalarda çox aşkarlana bilər. Sadəcə olaraq bütün dönərxanaları yoxlamaya cəlb etmək mümkün deyil: "Bu təkcə dönərxanalarda yox, restoran və kafelərdə də baş verir. AQTA-nın əsasnaməsində qidanın təhlükəsizliyinin təmin olunması var. Keyfiyyət isə yoxdur. Ona görə də AQTA-nın əsasnaməsinə qidaların keyfiyyəti də əlavə olunmalıdır ki, belə hallar baş verməsin. Məlumat üçün deyim ki, 15 min dönərxana var. Amma onların ətləri faktiki yoxlanılmır. Dönərxanalardan asılan ətin keyfiyyətinin baytar yoxlamasını əsk etdirən sənədlərin çoxu formal, yoxlanılmadan verilir".
Birlik sədri onu da vurğuladı ki, dönərxanalardakı ciddi problemlərdən biri budur ki, ətin üst tərəfi qızarır, içərisi çiy qalır. Ətin içindəki plazma yavaş-yavaş qızır. Qan qaynayır, axır tökülür siniyə: “Ət də doğranıb tökülür həmin siniyə. Ətlə qanlı maye qarışdırılıb verilir müştəriyə. Heyvan xəstəlikləri nə varsa, heyvana vurulan antibiotiklər, dərmanlar qızdırılmış ətdən süzülüb siniyə tökülür və doğranmış ətlə qarışıq müştəriyə verilir”.
Günel CƏLİLOVA
