Bəzən deyirlər ki, sevgi yaşa baxmır. İnsan istənilən yaşda sevə və özündən yaşca böyük, yaxud kiçik insana aşiq ola bilər. Müasir Azərbaycan qızlarının sevgiyə münasibəti bir qədər fərqlidir. Əvvəlki dövrlərlə müqayisədə indi qızlar daha çox özlərindən 10-20 yaş böyük kişilərlə sevgi yaşamağa, evlənməyə can atırlar.
Vaxtilə isə qızlar daha çox yaşıdları, yaxud da özlərindən uzaqbaşı 5-6 yaş böyük insanla sevgi yaşamağa, ailə həyatı qurmağa meyl göstərirdilər. Hətta illər öncə, keçən əsrin əvvəllərində, ondan qabaqkı dövrlərdə qızların özlərindən 10-15, 20 yaş böyük kişiyə ərə verilməsi ciddi tənqid edilirdi. Elə dahi Üzeyir Hacıbəyovun “O olmasın, bu olsun” filmində də gənc qızın atası yaşda kişiyə ərə verilməsi şiddətlə tənqid olunub. Üzeyir bəyin bu əsəri yazmasının üstündən bəlkə də 100 ildən çox vaxt keçib. Bu gün ata-analar qızlarını zorla özlərindən yaşlı kişiyə verməyə elə də meyl göstərməsələr də, qızların özləri bu seçimi etməyə cəhdlər göstərirlər.
“Özündən yaşlı kişiyə aşiq olan gənc qızların bir qisminin psixoloji durumu elə də yerində olmur”
Statistikaya görə, Azərbaycanda özündən 15-25 yaş böyük kişilərə aşiq olan qadınların sayı artıb. Cavan qızların özündən 20 yaş böyük kişi ilə niyə ailə qurmaq istəməsinin səbəblərini öyrənmək üçün “Vəfa” Sosial İctimai Birliyinin sədri Fatimə Hacıbəyli ilə həmsöhbət olduq.
- Fatimə xanım, bu gün gənc qızların bir qismi öz yaşıdlarına deyil, özlərindən 15-20 yaş böyük kişiyə maraq göstərir. Bunun səbəbi nə ilə bağlıdır?
- Kişilərin yaşca kiçik xanımlarla münasibət qurmasına bir neçə səbəb ola bilər. Bunlardan biri kişinin özünün hələ yaşlanmadığını, özünün işə yaradığını, kişi kimi bəyənilməsini təsdiq etmək cəhdidir. Digər səbəb isə gənc xanımların fiziki olaraq daha gözəl və cəlbedici olmasıdır. Həmçinin gənc xanımlar intim həyatda da fərqli olurlar. Danılmaz faktdır ki, gənc insanın dərdi də az olur. Onlar daha rahat olurlar və emosinal durumları daha yaxşı olur. Ona görə də gənc qızlar yaşlı kişilərə motivasiya verirlər. Onlar bu qızlar vasitəsilə özlərini daha gənc hiss edir. Digər səbəb də cəmiyyətdən qaynaqlanır.
- Qızların yaşlı kişi ilə münasibət qurması, ailə olmaq istəyinin kökündə maddiyyat dayanır, yoxsa həqiqi sevgi?
- Qızları bu yola sürükləyən birinci səbəb, təbii ki, maddi durumdur. Onlar da istədikləri yerləri gəzmək istəyir, istədikləri paltarları geyinmək istəyir. Bir qisim qızlar adətən uşaqlıqda öz valideynlərindən diqqət-qayğı görmədiyi üçün laqeyd münasibətdən, soyuqluqdan əziyyət çəkir. Onlar daim sığınacaqları, güvənə biləcəkləri insan axtarırlar. Gənc qız imkanlı, yaşlı biri ilə ailə qurursa, onu sevərək ailə qurmur. Öz karyerasını qurur, o, kişini özünə bir köməkçi kimi görür. Təbii ki, bu onların yaşıdı, yaxud da özlərindən 3-5 yaş böyük oğlanlar ola bilməz, bu halda qızlar özlərindən 15-20 yaş böyük kişiyə maraq göstərirlər. Siz fikir versəniz görərsiniz ki, 17, 18, 20 yaşlı qızlar hətta evli, oğul-uşaqlı kişiləri də sevirlər. Onlar bu kişilərə, bir növ, maddi və psixoloji problemlərdən xilas vasitəsi kimi baxırlar. Gənc qızların çoxu özündən 20, 30 ya böyük kişiyə dəlicəsinə aşiq olur və bu da əksər hallarda qızlara faciə yaşadır. Bu həm bizdə, həm də dünya praktikasında var.
- Belə bir fikir var ki, psixoloji problemi olan gənc qızlar daha çox özündən yaşca böyük kişi ilə ailə qurmaq istəyir. Bu fikir nə dərəcədə doğrudur?
- Özündən yaşlı kişiyə aşiq olan gənc qızların bir qisminin psixoloji durumu elə də yerində olmur. Onlar arasında nevrozlar, “Adel” sindromundan əziyyət çəkənlər də var.
- Haqqında danışdığımız kateqoriyadan olan cütlüklərin ailə həyatında da müəyyən problemlər yaşanır. Hətta onlar arasında da boşananlar var.
- Əslində yaş intervalının bir həddi var. Aşırı şəkildə yuxarı yaş seçərlərsə, xəyal qırıqlığı yaşaya bilərlər və hesab edirəm ki, bu, boşanmalara səbəb ola bilər. Bu fonda bir sıra əlavə çətinliklər yaranır. Məncə, yaş intervalı böyük bir məsafə olmamalıdır və bu, ailə dayanıqlığını təqdir edən faktorlardan biridir. O ki qaldı həmin seçimə, vurğuladığım kimi, bu daha çox təminatla bağlıdır. Yəni kişinin bəlli bir yaş dövründə artıq həyat elementlərini təmin edir və təmin etdiyinə görə də qızlar güvənir ki, məhz artıq onun həyatı təminatlıdır və bununla ailə qurmaq olar.
- Əvvəllər yaşlı kişilər cavan qızlara övlad, nəvə kimi baxırdılar. Ancaq indi …
- Əvvəllər cəmiyyətdə müəyyən mənəvi nizam var idi, amma indi bu nizam pozulub, əxlaqi normalar sıxışdırılıb və arxa plana keçib. İllər öncə yaşlı kişilər, bir qayda olaraq, cavan qızlara öz övladları, nəvələri kimi baxırdılar. Cəmiyyətimiz artıq mənəvi dəyərlərə 30-40 il bundan əvvəlki kimi əhəmiyyət vermir. Cəmiyyətimizdə əhli-keflik yaşanır.
- Belə bir fikir var ki, qızların yaşlı kişiyə meyl etməsinə səbəb şou-biznes nümayəndələrinin lüks həyatıdır. Onlar özlərindən yaşca böyük kişi ilə sevgi münasibəti yaşayır və ya ailə həyatı qurduğu üçün bu gün komfort həyat yaşayırlar. Bu fikir nə dərəcədə doğrudur?
- Bəli, düz deyirlər. Təəssüf ki, bu gün müğənnilər, bəzi tanınmış şəxslər özlərindən yaşca böyük kişi ilə yaşadıqları sevgi həyatlarını sosial şəbəkədə yayır. Onların bahalı evləri, avtomobilləri, bir sözlə dəbdəbəli həyatı gənc qızların yaşlı kişilərə olan münasibətini, düşüncəsini dəyişir. Nəticədə gənc qızlar ataları yaşında kişi ilə ailə həyatı qurur.
Günel CƏLİLOVA
