Məktəblərdə nizam-intizam qaydalarını pozan şagirdlərə qarşı tətbiq ediləcək inzibati tədbirlər müəyyən edilib. Elm və Təhsil Nazirliyinin Ümumi və məktəbəqədər təhsilin təşkili və idarə olunması şöbəsinin müdiri Elnur Əliyev bir müddət əvvəl mediaya açıqlamasında bildirib ki, həmin vaxt şagirdlərin davranış səviyyələri nəzərə alınacaq.
Davranış səviyyələrinə görə tətbiq ediləcək inzibati tədbirlərə gəldikdə isə, bunlar müəllim baxışı, qeyri-verbal münasibət, şagirdlərlə sakit söhbət, xəbərdarlıq, uzaqlaşdırma, valideyn ilə əlaqə saxlamaq, dərsdən sonra şagirdin məktəbdə saxlanması, psixoloqa yönləndirmə, sarı xəbərdarlıq məktubu, narıncı xəbərdarlıq, qırmızı xəbərdarlıqdır.
Qeyd edək ki, növbəti ildən, yəni növbəti aydan bu cəza tədbirlərinin orta məktəblərdə tətbiqi gözlənilir.
Son vaxtlar məktəblərdə nizam-intizam qaydalarının pozulması hallarına tez-tez rast gəlinsə də, şagirdlərə cəza tədbirlərinə münasibət birmənalı deyil. Bəzi valideynlər şagirdlərin nizam-intizam qaydalarının pozulmasına görə məktəbdən uzaqlaşdırılmasının düzgün olmadığını, digər qisim isə məktəblərdə nizam-intizamın gücləndirilməsinin vacib olduğunu hesab edir.
“Şagirdlərə qarşı tətbiq ediləcək inzibati tədbirlər qanunvericiliyin tələblərinə, insanların hüquq və azadlıqlarına ziddir”
Təhsil eksperti Kamran Əsədov bildirdi ki, hazırda qanunvericiliyin tələblərində şagirdlərin etik davranış qaydaları qeyd olunub. Şagirdlərin məktəbdaxili davranış qaydalarını müəyyən etməyə ehtiyac yoxdur: "Şagird davranış qaydalarını irəli sürən şəxsin ümumiyyətlə bu şeydən anlayışı yoxdur. Nəzərə almaq lazımdır ki, orta ümumtəhsil məktəblərində şagirdlərlə 150 min müəllim işləyir. Siz təsəvvür edin, birdən-birə məktəbdə 5-10 şagirdi sinifdən kənarlaşdırdınız, onlara kim nəzarət edəcək? Axı məktəbdə elə bir ştat yoxdur. Birincisi, şagirdin saxlanılması üçün yer yoxdur, ikinci də heç kim sizə o ixtiyarı vermir ki, şagirdi bu tipdə cəzalandırasınız. Bu, mövcud qanunvericiliyin tələblərinə, insanların hüquq və azadlıqlarına ziddir".
K.Əsədov hesab edir ki, məlum etik davranış qaydalarını irəli sürən şəxslərin təhsildən anlayışsız olduğu açıq-aşkar görünür: “Nizamnamələrdə kifayət qədər qaydalar müəyyənləşib. Bu, yanlış tərzdir. Şagirdlərin davranış qaydalarına nəzarət etmək üçün daha təkmil üsulları ortaya qoymalıyıq. Onsuz da bu, qanunda var, işləkdir. Məktəbdə bu kartı göstərə biləcək şəxs varmı? Kim edəcək bunu? Sinif rəhbərimi, yaxud da məktəb dırektorumu? İş qaydaları, yanaşmaları var. Hər hansı effekt verməyəcək. Bundan əvvəlki layihələr də yarımçıq qalıb, hamısı boş-boşuna "pul silməkdən" ibarətdir. Bu da onlardan biri olacaq. Nə təhsilin keyfiyyətinin artırılmasında, nə şagirdlərin intizam qaydalarında əhəmiyyəti olacaq".
Günel CƏLİLOVA
