İnsanlar bəzən tutulduqları xəstəliklərdən sağalmaq üçün sərvət xərcləyirlər. Bunun üçün dünyanın ən bahalı dərmanlarını belə alanlar var. Dünyanın ən bahalı dərmanları deyəndə isə 100-200-300 manat yox, nə az, nə çox 10000 manat civarında dərmanlardan söhbət gedir.
Məlumdur ki, Azərbaycanda dərman preparatlarının qiymətini Tarif Şurası müəyyən edir. Elə dərmanlar var ki, onların qiyməti əmlak dəyərindədir. Yəni 2 qutusunun qiymətinə daşınmaz əmlak almaq olar.
Bahalı dərmanlar siyahısında DİFİCLİR FIDAXOMICIN yer alır. Bu preparatın 200 mq tableti - 16 970 AZN-dir.
NOVOSEVEN EPTACOG ALFA (ACTVATED) 8 mq, inyeksiya məhlulu üçün toz - 10 935 AZN - hemofiliya xəstələri üçün preparatdır.
CAKAVİ RUXOLITINIB - 11.000 AZN. Bu dərman splenomeqaliya və ya mielofibrozla bağlı xəstəliklərdə təyin edilir.
QONAL-F FOLLITROPIN ALFA 600 IU/ml, inyeksiya üçün məhlul - 9 705 manat. Bu dərman isə yumurtalıqların polikistozunda, follikul yetişməzliyində ovulyasiya stimuləedici preparatdır, sonsuzluqda istifadə olunur.
HEMLİBRA – 8369 manatdır. Qeyd edilən dərman hemofiliya xəstələri üçün nəzərdə tutulub.
Qeyd edək ki, bahalı dərmanlar siyahısını daha da uzatmaq olar. Maraqlı məqam ondan ibarətdir ki, bu dərmanlar qonşu ölkələrdə daha münasib qiymətlərə satılır. Xarici ölkələrdə 800-900 manata olan dərman Azərbaycanda 5000 manata satılır. Siyahıda liderlik edən DİFİKLİR FIDAXOMICIN-in qiyməti Avropa ölkələrində 2000-2200 avrodur. Ancaq ölkəmizdə bu dərman 16 min manata satılır.
Maraqlıdır, xarici ölkələrlə müqayisədə Azərbaycanda dərmanlar niyə baha satılır?
“Bahalı dərmanlar əslində vətəndaşlara pulsuz verilməlidir, ancaq…”
Professor, tibbi ekspert Adil Qeybulla “Bakı-Xəbər”ə açıqlamasında qeyd etdi ki, Azərbaycanda dərmanların qiyməti Tarif Şurası tərəfindən müəyyən edilir: “Bahalı dərmanlar əslində vətəndaşlara pulsuz verilməlidir. Ancaq vətəndaşlara verilən həmin dərmanlar əsli deyil, “poddelka”dır. Həmin dərmanların əslinin qiyməti olduqca bahadır. “Original” dərmanların satış qiyməti vətəndaşların cibinə uyğun deyil”.
Ekspertin sözlərinə görə, qonşu ölkələrlə müqayisədə Azərbaycanda dərman preparatlarının satış qiymətinin baha olmasının səbəbi preparatlar ölkəyə gətirilən zaman rüsumun artıq tələb olunmasıdır: “Xarici ölkələrdə dərman təminatı İcbari Tibbi Sığorta Tərəfindən təmin olunur. Ancaq bizdə isə bahalı dərmanlar bu siyahıya aid deyil. Səhiyyə sistemi sosial, humanitar sahədir, iqtisadi biznes sahəsi deyil, şirkətlər bura insanların sağlamlığı üzərindən qazanc mənbəyi kimi baxmamalıdır. Dərman sektoru dövlət nəzarətində olmalıdır, firmalar buradan kənarlaşdırılmalıdır. Bu məsələni, dərman idxalını dövlət öz üzərinə götürməlidir, çünki keyfiyyətlə bağlı da problem var”.
Günel CƏLİLOVA
