Yeni ilin gəlməsinə sayılı günlər qalıb. Bayramın gəlişi ilə əlaqədar mağazalarda da ciddi aktivlik müşahidə olunmaqdadır. Bir müddət əvvəl metrostansiyaların çıxışında yaradılan Yeni il “palatka”ları da artıq öz fəaliyyətinə başlayıb.
Qeyd etdiyimiz kimi, yeni ilin gəlməsinə sayılı günlər qalsa da, satıcılar satışın zəif olduğunu deyir. Alıcılar isə yarmarkada satılan bayram aksesuarlarının qiymətinin dükanlarla müqayisədə baha olduğunu iddia edir. Bu səbəbdən də alıcılar metro ətrafında quraşdırılan yarmarkalara maraq göstərmir.
Bayram atributlarının qiymətləri ilə maraqlanmaq üçün metronun Nəriman Nərimanov stansiyasının qarşısında təşkil olunmuş bayram yarmarkasında olub və qiymətlərlə maraqlandıq. Orda olarkən alıcıların qiymətin baha olmasından giley etmələrinin şahidi olduq. Alıcılar qeyd edir ki, burda məhsullar digər satış yerləri ilə müqayisədə ucuz olmalıdır. Ancaq yarmarkaya gələndən sonra deyilənlərin əksinin şahidi oluruq. Qiymətlər adi dükanlarla müqayisədə ya eynidir, ya da baha.
Metronun Nəriman Nərimanov stansiyasının qarşısında təşkil olunmuş bayram yarmarkasında satılan yeni il aksesuarlarının qiyməti ilə maraqlandıq. Yeni ilin əsas atributlarından biri sayılan Şam ağaclarının qiyməti ölçü və keyfiyyətinə görə dəyişir. Ən kiçik ölçülü “yolka” 10 manatdır. Ümumiyyətlə, şam ağaclarının qiyməti 10 -100 manat arasında dəyişir. 10 manatlıq şam ağacının uzunluğu 60 sm, 100 manata satılan “yolka”lar isı 2 m 40 sm-dir.
Şaxta baba oyuncaqlarının qiyməti isə 2 manatdan başlayır. Hərəkətli və böyük ölçülü Şaxta baba oyuncaqları 35 AZN-ə təklif edilir.
Qarşıdan gələn Yeni ilin atributu sayılan yumşaq dovşanlar isə hər qiymətə mövcuddur. 15 manatdan tutmuş 35 manata qədər.
“Yolka” işıqlarının qiyməti isə 5 manatdan başlayır. Şam ağacının bəzədilməsi üçün lazım olan rəngli oyuncaqların qiyməti isə 5 -50 manat arasında dəyişir. Satıcılar qeyd edir ki, ötən illə müqayisədə məhsulların qiyməti 2-5 manat artıb. Bunun səbəbi qiymət artımının bütün sahələrdə qeydə alınmasıdır.
Aytəkin Kamranqızı: “Bayram yarmarkalarının yaradılmasında məqsəd şəhər əhalisinin bayram məhsullarına olan tələbatını daha asan yolla əldə etmələridir, ancaq…”
Sosioloq Aytəkin Kamranqızı bildirdi ki, bayram yarmarkalarının yaradılmasında məqsəd şəhər əhalisinin bayram məhsullarına olan tələbatını daha asan yolla əldə etmələridir. Qiymətlər digər satış nöqtələri ilə müqayisədə 10 faiz aşağı olmalıdır. Ancaq bu gün əksi müşahidə olunur: “Satıcılar bilir ki, elə yeni il aksesuarları bu il satılmasa gələn il istifadəyə yararsız olacaq. Onlar satdıqları məhsulu öz qiymətinə satmalıdırlar. Məhsulu dəyərindən yüksək qiymətə satılanda nə alıcı razı qalır, nə də satıcı”.
Eyyub Hüseynov: “Alıcılar aldıqları məhsulların sertifikatını tələb etməyi unutmamalıdır”
Azad İstehlakçılar Birliyinin (AİB) sədri Eyyub Hüseynov bildirdi ki, alıcılar aldıqları məhsulların sertifikatını tələb etməyi unutmamalıdır: "Bayramla əlaqədar olaraq bazarda saxta mallar artmaqdadır. Azərbaycan bazarına nəzarət olduqca aşağı səviyyədədir. İndi bizim bazara hardan, necə gəldi girmək olur. Normal, müstəqil ekzpertiza yoxdur. Azərbaycanda kifayət qədər təhlükəli mallar var. Bunların sırasında isə yeni il qabağı təlabat artan mallar üstünlük təşkil edir. Keyfiyyətsiz ərzaq və sənaye malları ilə qarşılaşan insanlar zəhərlənmə, sağlamlıq riskləri ilə üz-üzədir. Buna görə də insanlar alış-veriş edən zaman məhsulun sertifikatını tələb etməyi unutmamalıdır”.
Günel CƏLİLOVA
