Ali məktəb məzunlarının işlə təminatı ilə bağlı problem uzun illərdir yaşanır. Universiteti bitirən gənclərin əksəriyyəti iş tapmaqda çətinlik çəkir. Bugünlərdə elm və təhsil naziri Emin Əmrullayev çıxışında bildirib ki, təhsil sahəsində məzun olub işə qəbul olma faizi 50-dən bir az yuxarıdır: “Təbii ki, yeni məzun olan gəncin iş tapması bir qədər zaman alır. Ən böyük ehtiyaclardan biri tələbələrin təhsil aldığı müddətdə aidiyyəti təcrübə proqramlarına cəlb olunmasıdır. Hər bir universitetin özünə məxsus işəgötürənlərlə iş strategiyası olmalıdır. Tələbələrin iş axtarması sanki qaranlıq otaqda qara pişik axtarmağa bənzəyir”.
Maraqlıdır, ali məktəbi bitirən gənclər niyə iş tapmaqda çətinlik çəkir? Universitetlərdə təyinat sisteminin tətbiqi bu problemi aradan qaldıra bilərmi?
“Ali təhsil müəssisələrində lazımsız ixtisaslar var ki, tələbələr onu bitirəndən sonra o ixtisas üzrə iş tapa bilmirlər”
Təhsil eksperti Nadir İsrafilov bildirdi ki, iş tapmaq problemi ilə yalnız subbakalavrlar deyil, həm də bakalavrlar, magistrlar, bir neçə diplomu olan insanlar üzləşir. Daha çox iş yeri yaratmaq lazımdır və bunun üçün hər bölgədə hansı peşələrə və hansı miqdarda ehtiyac olduğunu bilmək lazımdır: “Bu istiqamətdə müəyyən işlər aparılır. SSRİ-də məzunlar, xüsusən peşə məktəbi məzunları dövlət tərəfindən işlə təmin olunurdular, amma indi öz qaydalarını diqtə edən bazar iqtisadiyyatında yaşayırıq”.
Ekspert hesab edir ki, məzunların işsiz qalmasında ən böyük problem ixtisaslarla bağlıdır: “Çünki tədris olunan ixtisasların əksəriyyəti, demək olar ki, yenilənməyib. İnkişaf etmiş ölkələrdə fəaliyyət göstərən universitetlərdə bəzi ixtisaslar yerində qalsa da, zamanla yenilənir. Bu baxımdan, Azərbaycanda da maliyyə, mühasibat kimi ixtisaslaırn yenilənməsinə ehtiyac var. Bu, məzunların gələcəkdə yerli və ya xarici bazarda iş tapmasına əlverişli şərait yarada bilər. Ali təhsil müəssisələrində lazımsız ixtisaslar var ki, tələbələr bitirəndən sonra o ixtisas üzrə iş tapa bilmirlər. Bu ixtisasların aradan qaldırılmaması və yeni ixtisaslarla əvəzlənməməsi təəssüf doğurur”.
N.İsrafilovun sözlərinə görə, tələbata uyğun kadr istehsal olunmalıdır. Həmin kadrlarla bağlı təyinat məsələsi həyata keçirilməlidir. Bu məsələ müzakirəyə çıxarılmalıdır.
Günel CƏLİLOVA
