Məlum olduğu kimi, Vasif Talıbovun Naxçıvana rəhbərlik etməsinə son qoyuldu. 27 il idi ki, o, Naxçıvanı öz bildiyi kimi idarə edirdi. Nəticədə on minlərlə yerli sakin oranı tərk etməyə məcbur olmuşdu.
Bu arada, Naxçıvandakı mənbələrdən əldə etdiyimiz məlumata görə, ötən illər ərzində orada çoxsaylı qanun pozuntularına, haqsızlıqlara yol verilib. Naxçıvanda sahibkarlar tikinti işləri aparanda onlara saysız-hesabsız ziyanlar vurulub. Naxçıvan şəhərində biznes obyektləri, yeməkxanalar, dükanlar və digər bu kimi sahələr sökülüb. Bu zaman sahibkarlara dəyən ziyana görə heç bir kompensasiya ödənilməyib. Halbuki, aparılan tikintilərə görə sahibkarların əllərində obyektlərin çıxarışları olub. Ancaq bunların heç birinə məhəl qoyulmayıb. Necə gəldi ya obyektləri söküblər, ya da əllərindən alıblar. Naxçıvandakı məlum dəyişiklikdən sonra bu insanların hamısı hərəkətə keçib. Ona görə də, bütün bunlara görə saysız məhkəmə iddialarının qaldırılacağı gözlənilir. Bir vaxtlar Vasif Talıbovdan çəkinib səslərini çıxara bilməyən sahibkarlar, indi onlara dəymiş zərərə görə iddia qaldırmaq fikrindədilər. Söhbət minlərlə oxşar faktdan gedir. Hətta kiçik kafedən tutmuş, restorana qədər böyük obyektləri zorakılıqla dağıdıb sahibkarlara heç nə verməyiblər.
O baxımdan maraqlıdır, sözügedən məsələlərlə bağlı sahibkarların onlara dəymiş zərərə görə məhkəmələrdə qaldıracağı iddiaların nə kimi hüquqi perspektivi var?
“Bütün bu pozuntulara görə cavabdeh olanlar cinayət məsuliyyətinə cəlb oluna bilər və bunun hüquqi perspektivi var”
Sözügedən məsələyə aydınlıq gətirən hüquqşünas Şəmsəddin Əliyevin fikrincə, bütün bu baş verənlərə görə Naxçıvandakı sahibkarların qaldıracağı iddiaların hüquqi perspektivi var: “Hüquqi və sosial ədalət baxımından haqlı bir məsələ çıxır ortalığa. Ona görə ki, ötən illər ərzində Naxçıvanda sahibkarlar, iş adamları çoxsaylı haqsızlıqlarla üzləşiblər. Hüquqları pozulub. Nəticədə Naxçıvana sərmayə qoyuluşu azalıb, sahibkarlığın inkişafı zəifləyib və s. Ona görə də hesab edirəm ki, vətəndaşlara dəymiş ziyanın ödənilməsinə hüquqi prosedurda mülki mübahisə şəklində məhkəmələr tərəfindən baxılacaq. Bu iddialar həm maddi, həm mənəvi ziyanın ödənilməsi ilə bağlı təmin oluna bilər. Ancaq burada Naxşıvandakı sahibkarlar mülki mübahisənin baxılması ilə yanaşı, həm də vəzifədən sui-istifadə, vətəndaşlara qarşı həddini aşma ilə bağlı iddia qaldırmalıdırlar. Bu müddət ərzində sahibkarlara ziyan vuran şəxslər cinayət məsuliyyətinə cəlb oluna bilər. Söhbət burada vəzifə cinayətlərindən, səhlənkarlıqdan və digər qanun pozuntularından gedir. Çünki Naxçıvanda bununla bağlı pozuntuların miqyası böyük olub. Vətəndaşlara böyük maddi və mənəvi zərər vurulub. Ona görə də bütün bu pozuntulara görə cavabdeh olanlar cinayət məsuliyyətinə cəlb oluna bilər və bunun hüquqi perspektivi var. Sadəcə, hüquqi prosedura uyğun olaraq ardıcıl olaraq bunun üzərinə getmək lazımdır. Bu baxımdan Naxçıvandakı vətəndaşlarımız bunun üzərinə getməlidilər. Aradan illər keçib deyə, ümidsizliyə qapılmaq olmaz. Dəymiş maddi və mənəvi zərərin ödənilməsi ilə bağlı məhkəmələrə müraciət edə bilərlər. Məhkəmə prosesi əsnasında həmin şəxslərin cinayət məsuliyyətinə cəlb olunması ilə bağlı qərar verilə bilər. Çünki Talıbovun dövründə belə sui-istifadə hallarına yol çox verilib. Vəzifə səlahiyyətlərindən sui-istifadə etməsi ortadadır. Məhkəmə ayrıca qərardad şəklində və yaxud da ayrıca hal kimi cinayət işinin istintaqının aparılması ilə bağlı qərar qəbul edə bilər. Daha sonra onu aidiyyəti üzrə müvafiq orqanlara göndərə bilər. Çünki bu, ölkə konstitusiyasında öz əksini tapıb”.
Bu baxımdan hüquqşünas hesab edir ki, bunun üzərinə getmək lazımdır.
Vidadi ORDAHALLI
