İşğaldan azad olunmuş ərazilərdə işləyən mütəxəssislər üçün birdəfəlik müavinətin 5 il ərzində ildə bir dəfə verilməsi nəzərdə tutulur. Milli Məclis tərəfindən təsdiq olunan “Sosial müavinətlər haqqında” Azərbaycan Respublikası Qanununda dəyişikliyə əsasən, işğaldan azad olunmuş ərazilərdə işləyən mütəxəssislər üçün birdəfəlik müavinət təyin olunacaq.
Maraqlıdır, işğaldan azad olunmuş ərazilərdə işləyən mütəxəssislər üçün birdəfəlik müavinətin məbləği təxminən nə qədər olacaq?
Vüqar Bayramov: “İşğaldan azad olunmuş ərazilərdə işləyən mütəxəssislər üçün birdəfəlik müavinətin həcmi xüsusi sərəncamla müəyyən ediləcək”
Millət vəkili Vüqar Bayramov “Bakı-Xəbər”ə açıqlamasında qeyd etdi ki, işğaldan azad edilən ərazilərdə çalışacaq mütəxəssislərin daha yaxından dəstəklənməsi üçün müavinət təyin olunacaq: “Nəzərə almaq lazımdır ki, işğaldan azad edilən ərazilərin bərpa olunması prioritetdir. Bu prioritetin önəmli cəhətlərindən biri də orda yaşayacaq və çalışacaq mütəxəsislərin daha yaxından dəstəklənməsidir. Yeni qaydaların əsas mahiyyəti işğaldan azad edilən ərazilərdə ixtisaslı kadrların işlə təmin olunmasıdır. Bu da həmin şəxslərin sosial həyatının güclənməsinə təkan verəcək”.
Millət vəkili bildirdi ki, işğaldan azad olunmuş ərazilərdə işləyən mütəxəssislər üçün birdəfəlik müavinətin həcmi xüsusi sərəncamla müəyyən ediləcək. Bu zaman ixtisaslı kadrların sosial təminatı da nəzərə alınacaq.
Aydın Hüseynov: “Müavinət işğaldan azad edilmiş ərazilərdə işləmək üçün ən azı 1 il müddətinə bağlanmış əmək müqaviləsi olduqda təyin olunacaq”
Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov bildirdi ki, “Sosial sığorta haqqında” AR Qanununa dəyişikliklər layihəsinə əsasən, 2023-cü ildən etibarən işğaldan azad edilmiş ərazilərdə işləyən mütəxəssislərə ilkin maddi məişət şəraitinin dəstəklənməsi üçün birdəfəlik müavinətlər veriləcək. Hazırda müvafiq orqanlar tərəfindən həmin müavinətin məbləği müəyyənləşdirilir və 2023-cü ildə həmin məbləğin həcmi məlum olacaq. Layihəyə görə, bu müavinətin təyin olunması şərtləri də müəyyənləşməkdədir. Müavinət işğaldan azad edilmiş ərazilərdə işləmək üçün ən azı 1 il müddətinə bağlanılmış əmək müqaviləsi olduqda təyin olunacaq. Birdəfəlik müavinətlər müraciətetmə müddətindən asılı olmayaraq təyin ediləcək. Başqa sözlə, azad edilmiş ərazilərdə işləmək üçün azı 1 il müddətinə bağlanılmış əmək müqaviləsi olduqda, ilkin maddi-məişət şəraitinin dəstəklənməsi üçün 2023-cü il yanvarın 1-dən 5 il müddətinə birdəfəlik müavinət müəyyən olunacaq.
Millət vəkilinin sözlərinə görə, azad edilmiş ərazilərdə çalışan sahibkarlar və digər şəxslərin maaşlarına təxminən 20% məbləğində də güzəşt olunacaq ki, bu da onların əməkhaqlarına həmin faiz üzrə əlavələrin edilməsi deməkdir. Həmçinin, bu şəxslərə əlavə məzuniyyət hüququ veriləcək. Əmək Məcəlləsinin 21-1-ci maddəsinə əsasən, bu kateqoriyaya aid olan şəxslər əsas və əlavə məzuniyyətlərin müddətindən asılı olmayaraq 5 təqvim günü müddətində əlavə məzuniyyətlə təmin olunacaqlar.
A.Hüseynov vurğuladı ki, həmin ərazidə çalışan mütəxəssislər 10 il müddətində əmək haqqından hesablanan sosial vergidən də azad olunacaqlar: “Növbəti ildən Qarabağ və Şərqi-Zəngəzur iqtisadi rayonlarında özəl sektorda çalışan işçilərin əməkhaqqından 10 faiz sosial sığorta haqqı tutulmayacaq. “Sosial sığorta haqqında” Qanunun 14-1.1-ci maddəsinə əsasən, sosial sığorta haqqının subsidiyalaşdırılması 4 mexanizm üzrə tətbiq olunacaq. Belə ki, 2023-cü il yanvarın 1-dən 2026-cı il yanvarın 1-dək işçilərin gəlirlərinə sosial sığorta güzəşti, yəni subsidiyalaşdırma 100 faiz miqdarında tətbiq ediləcək. Bu, sosial sığorta ödəmələrinin subsidiyalaşdırılması mexanizminin tətbiqi deməkdir. Məcburi dövlət sosial sığorta haqlarının dövlət büdcəsinin vəsaiti hesabına kompensasiyası məqsədilə sığortaedənlərə ödənilən əvəzsiz maliyyə vəsaitidir. Subsidiyalaşdırma layihəsinə əsasən, sosial vergi güzəşti nəticəsində Dövlət Sosial Müdafiə Fondunun büdcəsində yaranacaq itkilər dövlət büdcəsinin doyasiyası hesabına təmin olunacaq”.
Günel CƏLİLOVA
