Paytaxt Bakıda ictimai nəqliyyatla bağlı problemlər bitmək bilmir. Avtobusların gecikməsindən tutmuş sürücü kobudluğuna qədər saysız xoşagəlməzliklər mövcuddur. Bu hallarla bağlı ictimai narazılıqlar artsa da, təəssüflər olsun ki, bunun hələ də qarşısı alınmayıb.
Yenə də köhnə hamam, köhnə tas. İndi də sərnişinlər yeni bir problemlə üzləşiblər. Bəzi xətlər üzrə marşurt avtobuslarını son dayanacaqda saxlayıb, həkimin onları xəttə buraxacağı vaxtı gözləyirlər. Sərnişinlər şikayət edir ki, bəzi marşrut xətləri üzrə hərəkət edən avtobusların sürücüləri günortaya yaxin 12-1 arası həkim müayinəsindən keçirlər. Məsələn, 125 saylı avtobusda bunun şahidi olanlardan biri də bizik. İki-üç gün əvvəl 28 May Metrostansiyasının qarşısında ard-arda bir neçə 125 saylı avtobus dayansa da, dayanacaq sərnişinlə dolub daşsa da sürücülər avtobusları hərəkətə gətirmirdilər. Bunun səbəbini soruşduqda isə sürücülər bildirdilər ki, həkimin icazə verməsini gözləyirlər, nə zaman icazələri təsdiqlənsə o zaman xəttə çıxacaqlar.
Bildiyimiz qədər, ictimai nəqliyyatda işləyən sürücülər səhər tezdən yoxlamadan keçməli və ondan sonra xəttə çıxmalıdırlar. Qəribə haldır ki, bəzən belə olmur, onlar günorta yoxlanır. Hər halda, şahidi olduqlarımızdan belə qənaətə gəlirik.
Bu nə dərəcədə düzdür ki, sürücü günorta yoxlansın və dayanacaqda sərnişinlər avtobus gözləsin? Sürücülər günün hansı vaxtı müayinədən keçməlidir?
“…Digər tərəfdən baxanda, bəli, burada məsuliyyətsizlik də var”
Nəqliyyat üzrə tanınmış ekspert Elməddin Muradlı “Bakı-Xəbər”ə bildirdi ki, qaydalara görə, sərnişindaşımanı həyata keçirən hüquqi və fiziki şəxslər sürücülərin tibbi müayinəsini reysqabağı təşkil etməlidirlər. “Yəni xəttə çıxmazdan əvvəl. Bu qarajdamı, yolun ortasındamı olmalıdır? Hər bir halda qanunda qeyd olunur ki, sürücülərin müayinəsi reysqabağı təşkil olunmalıdır. “BakiBus”un avtobuslarından söhbət gedirsə, növbə dəyişilərkən bu baş verir. Nəzərə almaq lazımdır ki, növbə dəyişəndə avtobusu qaraja aparmaq, başqa sürücüyə təhvil vermək, sürücünü müqayinədən keçirmək bu işin ziyanına olar. Təsəvvür edin ki, bir avtobusu qaraja aparırsız və orada digər sürücü tibbi müayinədən keçir, sonra avtobusa minib xəttə çıxır. Görün, nə qədər sərnişin həmin vaxt yolda qalır. Bu biri variantda da deyirlər ki, bunu hansısa bir dayanacaqda edirlər. Bu isə həm qəbul edilən, həm də qəbul edilməyən variantdır. Ona görə qəbulediləndir ki, hazırda avtobuslarımızın sayı çox azdır və bunu nəzərə almaq lazımdır. Onları da bir-bir dayanacaqdan çəkib aparsaq ki, sürücülər müqayinədən keçsin, nəticədə nə qədər sərnişin yolda qalacaq. Amma digər tərəfdən baxanda, bəli, burada məsuliyyətsizlik də var. Bu əvvəllər başqa şirkətlərdə olurdu, sürücülərdə belə hallar baş verirdi. Deyək ki, reysqabağı tibbi müayinədən keçmirdilər, amma hardansa öyrənirdilər ki, tutalım bu gün reyd olacaq, reyd günü də hansısa poliklinika ilə danışırlar, həmin poliklinikanın əməkdaşları da gəlib yolda bunlara 3-5 manata tibbi müayinə kağızı satır. Bu dəfələrlə olub, çəkilişlər də aparılıb, bu halı yollarda da aşkarlayıb üzə çıxarıblar. Ola bilsin ki, bu da belə bir əməldir, “BakuBus” öz sürücülərini vaxtında müayinədən keçirə bilmir və məcbur olub onları xidmətdə olduqları vaxt tibbi müayinəyə cəlb edirlər”.
E.Muradlının fikrincə, hər bir halda bu müayinə formal deyilsə, həqiqətən də sürücülər tibbi müayinədən keçirilirsə, onu yenə də alqışlamaq, ona dözümlü yanaşmaq olar. “Bu müayinə gerçəkdən keçirilirsə gecikmələrə dözümlü yanaşmaq olar. Amma müayinə olunmadan xəttə çıxan o qədər sürücülər var ki”-deyə E.Muradlı vurğuladı.
Leyla QARAXANLI
