Doğuşayardım xidmətində zamanla nöqsanlar aşkarlanır. Bu problemlərin həll olunması istiqamətində müəyyən işlər görülsə də, hələ də çatışmazlıqlar mövcuddur.
Bu günlərdə respublikada doğuşayardım xidmətinin vəziyyəti ilə bağlı Səhiyyə Nazirliyində TƏBİB-in nümayəndələrinin iştirakı ilə müştərək kollegiya iclası keçirilib. Iclas zamanı bir sıra məsələlərə toxunulub. O cümlədən qeyd edilib ki, Səhiyyə Nazirliyinın mütəxəssisləri tərəfindən baş vermiş ana ölümlərinin təhlilləri nəticəsində doğuşayardım xidməti sahəsində bir sıra nöqsan və çatışmazlıqlar aşkar olunub.
Ekspertlər bildirir ki, qeyd edilən sahədə hər zaman müəyyən problemlər olub. Bunun əziyyətini isə ana və dünyaya gələn körpələr çəkir.
“Ərazi üzrə tibbi nümayəndələr mütəmadi olaraq hamilə qadınla maraqlanmalı, onun və gələcək körpənin sağlığını diqqətdə saxlamalıdır”
Doğuşayardım xidmətində hansı çatışmazlıqların olması barədə ginekoloq-həkim Pərvanə Mustafayeva ilə danışdıq. O bildirdi ki, doğuşayardım xidmətində müəyən problemlər var. Bu nöqsanlar daha çox bölgələrdə müşahidə olunur: “Hər bir ana ölümü halı doğuşayardım müəssisəsinin doğuş və zahılıq dövrlərində, Doğuşayardım Komissiyasında ciddi müzakirə olunur. Hamiləliyin ilk həftələrindən başlayaraq son günə qədər aparılan bütün müayinələr və müalicə taktikası aparıcı mütəxəssislər tərəfindən təhlil olunur. Təhlil nəticəsində aşkar olunmuş təşkilati nöqsanlar, tibbi xidmətdə yol verilmiş nöqsanlar müvafiq tibb müəssisəsinin rəhbərinin və tibb işçilərinin nəzərinə çatdırılır. Hamiləlik, doğuş və zahılıq dövründə baş verən ölüm tibb işçisi tərəfindən qarşısı alına bilən səbəbdən baş veribsə, tibb işçisi lazım olan tibbi xidmət göstərməyibsə, bu halda həkim barəsində müvafiq intizam tədbirləri görülür.
Onu da qeyd edim ki, bu gün bölgələrdə, ucqar ərazilərdə yaşayan hamilə xanımlar qeydiyyata düşmür. Və ya qeydiyyata düşsə də tibbi göstərişlərə əməl etmir. Nəticədə isə xoşagəlməz hal yaşanır. Bu cür halın baş verməməsi üçün ərazi üzrə tibbi nümayəndələr mütəmadi olaraq hamilə qadınla maraqlanmalı, onun və gələcək körpənin sağlığını diqqətdə saxlamalıdır. Bu gün rayonlarda çalışan əksər doğuşayardım xidməti işçilərinin əsas işi qeydiyyat blankını doldurmaqdan ibarətdir. Hamilə qadın “yaxşıyam” sözünü deyəcək və bunlar işini tamamlamış sayacaqlar. Təhlillər əsasında nəticələr çıxarılmalıdır. Bu halda bilmək olar ki, hamiləliyin gedişində doğuşa qədər hansı çatışmazlıqlar var və onları aradan qaldırmaq lazımdır. Həkimlər də protokollarla işləməlidir. Dünya təcrübəsində hamilə qadınların monitorinqi protokollarla aparılır. Buna görə də xarici ölkələrdə belə problemlərə rast gəlinmir. Biz isə əvvəlki qayda ilə - Sovet sistemi ilə gedirik. Düşünürəm ki, əhali özü diqqətli olmalıdır. Hamilə qadınların müşahidəsi ilə bağlı müvafiq strukturları, səhiyyənin bu işə cavabdeh olan infrastukturlarını yenidən qurmalıyıq ki, belə fors-major hallarla qarşılaşmayaq”.
Həkimin sözlərinə görə, son illər Azərbaycanda ana və uşaq ölümlərinin sayı azalıb. Bunun da səbəbi tibbin inkişafı ilə bağlıdır.
Günel CƏLİLOVA
