Bir zamanlar xarici və yerli telekanallarda evlilik proqramları yayımlanırdı. Həmin proqramların yayımı ölkəmizdə və qonşu Türkiyədə ləğv olunub. Səbəb isə televiziyalarda nümayiş etdirilən evlilik proqramlarının gənc nəslin təlim-tərbiyəsinə mənfi təsir etməsi idi. Bu kimi verilişlər yayımlanan zaman ölkə ictimaiyyəti narazılıq edirdi. Onlar bu proqramların cəmiyyətimizin parametrlərinə uyğun gəlmədiyini, milli adət-ənənələrimizə yad olduğunu bildirir, etiraz edirdilər.
Qeyd etdiyimiz kimi həmin proqramlar bağlansa da, acı nəticələri hələ də yaşanır. Belə ki, o verilişlər sayəsində evlənənlərin əksəriyyəti artıq boşanıb. Araşdırmalar zamanı məlum olub ki, bu tip verilişlərin araçılığı ilə ailə quran cütlüklərin izdivacı uzun sürməyib. Məlumdur ki, son zamanlar boşanmaların sayı durmadan artır. Ekspertlər bildirir ki, boşanmaların sayının artma səbəblərindən biri də məhz bu tip verilişlərdir.
Bildirdiyimiz kimi, bu gün boşanmaların sayı günü-gündən artır. Ailə institutunun dağılmasının səbəblərindən biri kimi də kreditlər göstərilir. Belə ki, gənclərin bir qismi ailə qurmazdan öncə dəbdəbəli toy etmək üçün kredit götürür. Məlum, toydan sonra ailə banka olan borcunu geri qaytarmalıdır. Maddi imkanı zəif olan cütlük banka borcu geri qaytara bilməyəndə bu hal ailədə müəyyən problemlərə səbəb olur. Beləliklə, həmin ailənin bünövrəsində çatlar yaranır. Ailə krediti geri qaytara bilməkdə çətinlik çəkir. Sonda bu çətinlik ailənin dağılmasına səbəb olur.
“Evlilik verilişlərinin yayımlanmasında məqsəd tək biznes deyil, eyni zamanda, xalqın milli-mənəvi dəyərlərinin bəzi mərkəzlər tərəfindən sarsıdılmasıdır”
Sağlam Cəmiyyət Hərəkatının rəhbəri, sosioloq-jurnalist Elçin Bayramlı “Bakı-Xəbər”ə açıqlamasında qeyd etdi ki, ailə, evlilik çox müqəddəs bir dəyərdir. Ailəni küçə şousu, bulvar mediası ilə ucuzlaşdıranda nəticəsi xoşagələn olmur. Heç bir halda normal bir xalqın dəyəri cılız, ucuz reklam üzərində qurulmur: “Kimlərsə bundan istifadə edib pul qazanacaq, oxucu, tamaşaçı toplayacaq. Ancaq həmin şirkət bilməlidir ki, o gəlir əldə etdiyi halda ölkənin dəyər sistemi əldən gedəcək. Evlilik verilişlərinin yayımlanmasında məqsəd tək biznes deyil, eyni zamanda, xalqın milli-mənəvi dəyərlərinin bəzi mərkəzlər tərəfindən sarsıdılmasıdır. Bu hərtərəfli mənəvi terror vasitəsi idi. Ailə problemləri ilə bağlı yayımlanan əksər verilişlər ailə dəyərlərini ucuzlaşdırdı. Bu tip verilişlər sayəsində ailə qurmaq uşaq oyuncağına çevrildi”.
E.Bayramlının sözlərinə görə, evlilik proqramları insanların alt-şüuruna hopduruldu. Milli-mənəvi dəyərlərin qorunması ilə bağlı ciddi işlər görülməlidir: “Televiziya kanallarında ailə-məişət mövzusunda yayımlanan verilişlərin hamısı bağlanmalıdır. Bu verilişlər yalnız biabarçılıqdır. O proqramlar vasitəsilə ailə sirri elnən bir olur”.
Sosioloq onu da əlavə etdi ki, beynəlxalq hesabatlarda Azərbaycan boşanmalar üzrə ilk sıralarda yer alır. Boşanmaların bir səbəbi də maddiyyatdır.
Günel CƏLİLOVA
