Bakı sürətlə inkişaf edən və böyüyən şəhərlərdən biri olduğundan, yollarda hər gün tıxac və sıxlıq hallarına rast gəlinir. Təbii ki, əhalinin sayının, məskunlaşma ərazilərinin və nəqliyyat vasitələrinin sürətlə artması da bu məsələdə mühüm rol oynayır. Eyni zamanda yollarda sürücülərin sayının çoxalması qəzaların baş vermə səbəblərini nisbətən artırır.
Ekspertlər bildirir ki, paytaxt ərazisində tıxacın yaranmasının səbəblərindən biri də yolların dar olmasıdır. Bu hal daha çox Bakı ətrafında yerləşən kənd və qəsəbələrə gedən yollarda müşahidə edilir. Tıxac probleminin və sərnişin sıxlığının qarşısını almaq üçün Bakı ətrafında yerləşən kənd və qəsəbələrə gedən yollar genişləndirilməlidir.
Eldəniz Cəfərov: “Avtomobil yollarının bir hissəsində, piyada səkisində belə binalar tikilir və yollar daralır”
Nəqliyyat eksperti Eldəniz Cəfərov bildirdi ki, Bakıda avtomobil tıxacları müxtəlif obyektiv və subyektiv səbəblərdən dolayı yaranır. Əsas məsələ hazırda Bakı şəhərində yolların daraldılması, avtomobil sayının çox olması və ictimai nəqliyyatın zəif işləməsidir. İctimai nəqliyyat, demək olar ki, əlçatmaz olub, xüsusən də avtobuslar arasında çox böyük intervallar var. İnsanların dayanacaqda uzun müddət avtobusu gözləməsi, kart sistemindəki problemlər və s. insanları avtobus istifadəsindən uzaqlaşdırır: “Tıxacların yaranma səbəblərdən birincisi bundan ibarətdir ki, vaxtilə Bakı şəhərində nizamsız tikililər inşa edilib, avtomobillərin infrastrukturu doğru qurulmayıb, bəzən parklanma yerləri zəbt olunub hündür binalar tikilib. Hətta avtomobil yollarının bir hissəsində, piyada səkisində belə binalar tikilir və yollar daralır. Onu da deyim ki, yağış yağanda da avtomobillər çox aşağı sürtətlə hərəkət edir. Avtomobillər nisbətən aşağı sürətlə idarə olunduqda yolun buraxıcılıq qabiliyyəti azalır. Nəticədə aşağı sürətlə hərəkət edən avtomobillər sıxlıq yaradır. Xüsusilə dar yollarda bu kimi problemlər özünü daha qabarıq şəkildə büruzə verir”.
Elxan Əliyev: “Çox zaman tikinti şirkətləri hərəkət zolaqlarını zəbt edir, bu da...”
Sosial sahə üzrə ekspert Elxan Əliyev qeyd etdi ki, çox zaman tikinti şirkətləri hərəkət zolaqlarını zəbt edir. Bu da yollarda hərəkət iştirakçılarına, hərəkətin intensivliyinə mane olur. Həmin yolda hərəkətin sürəti azalır və sıxlıq müşahidə edilir. Bəzi hallarda yollar zəbt edilsə də, avtomobillər üçün alternativ yollar təqdim edilmir: “Yollar tikinti şirkətləri tərəfindən bütünlüklə zəbt edilə bilməz. Bu o zaman baş verə bilər ki, hərəkət iştirakçılarına alternativlər təqdim edilsin”.
Günel CƏLİLOVA
