Azərbaycanda moped idarə etmək üçün sürücülük vəsiqəsi tələb olunacaq. Bununla bağlı məsələ Milli Məclisin ötən iclasında müzakirəyə çıxarılan “Yol hərəkəti haqqında” qanuna təklif edilən dəyişiklikdə əksini tapıb. Dəyişikliyə görə, konstruktiv maksimal sürəti 50 km/saatdan artıq olan bütün nəqliyyat vasitələrinin dövlət qeydiyyat nişanı ilə təmin edilməsi və sürəti 50 km/saatdan çox olan mopedçilərin sürücülük vəsiqəsi olmalıdır.
Qeyd edək ki, Baş Dövlət Yol Polisi İdarəsinin məlumatına əsasən, bu prosesin asan və şəffaf keçirilməsi üçün xüsusi komissiya yaradılıb, mopedçilər üçün sürücülük vəsiqəsi (A1) imtahanlarının məzmunu sadələşdirilib.
Məlumdur ki, mopedlərlə bağlı çoxsaylı problem yaşanır. Onu da qeyd edək ki, mopedlər hansısa şirkət və ya özəl sektora aid olur. həmin şirkətin məhsulu moped vasitəsilə daşınır. Moped sürənlərin mütləq qaydada sürücülük vəsiqəsinə sahib olması bu sahədə yaşanan problemlərin həll olunmasına səbəb olacaqmı?
Elməddin Muradlı: “Moped istifadəçiləri ümumi istifadədə olan yollarda təhlükəli manevrlər edirlər”
Nəqliyyat eksperti Elməddin Muradlı bildirdi ki, qanuna bu dəyişikliklər müsbət haldır, çünki moped sürücülərinin sayı günü-gündən artır. O qeyd etdi ki, bəzi sürücülər sürəti saatda 50 km/saat olan, mühərrikin iş həcmi 50 kub/sm-dən yüksək olan nəqliyyat vasitələrini də moped adı ilə idarə etməyə çalışırlar: “Bu, kobud qayda pozuntusudur. Onları aşkar etmək çox çətindir. Buna görə dünyanın əksər ölkələrində dəyişikliklər qəbul edilib. Vəziyyətdən çıxış yolu kimi bu qaçılmaz idi. Moped istifadəçiləri ümumi istifadədə olan yollarda təhlükəli manevrlər edirlər. Onların iştirakı ilə qeydə alınan yol-nəqliyyat hadisələrinin sayı artır. Qaydalara riayət etmirlər, xüsusi texniki vasitələr onları aşkar edə bilmir və beləliklə məsuliyyətdən kənar qalırlar. Onların peşəkar sürücü kimi formalaşmasına ehtiyac var. Nəqliyyat vasitələri dövlət qeydiyyatına alınmalıdır, dövlət nömrə nişanı verilməlidir. Əgər yolda hərəkət edən hər hansı nəqliyyat vasitəsinin sürücüsü, piyadalar qayda pozuntusuna görə cəzalanırsa, cərimələnirsə, niyə moped sürücüsü məsuliyyətdən kənar qalmalıdır? Onların da məsuliyyəti olmalıdır, cəza mexanizmi tətbiq edilməlidir. Bunun üçün də dövlət qeydiyyatı mütləqdir. Bu halda dövlət nömrə nişanı vasitəsilə onları aşkarlamaq mümkündür. Sürücülük vəsiqəsi ilə bağlı tələb peşəkarlığın artırılması məqsədi ilə bağlıdır”.
İlqar Hüseynli: “Problemin həll olunması üçün yol infrastrukturu düzgün qurulmalıdır”
Sosial sahə üzrə ekspert İlqar Hüseynli bildirdi ki, Azərbaycanda moped sürücüləri ilə bağlı qanunun nəzərdə tutulması müsbət haldır. Moped tipli motosikletlərin törətdiyi qəzaların sayı həddindən artıq çoxdur: “Problemin həll olunması üçün yol infrastrukturu düzgün qurulmalıdır. Hərəkət istiqamətinin haradan və necə yönlənməsi ilə bağlı hər bir nəqliyyat vasitəsi istifadəçisinin özünəməxsus öhdəlikləri var. Bura moped, motosiklet və velosipeddən istifadə edən şəxslər də daxildir. Bu mənada Azərbaycanda da moped sürücüləri ilə bağlı qanunun nəzərdə tutulması müsbət haldır. Lakin qanunun icrasına nəzarət və dəyişikliklərin nəticəsinin monitorinqinin necə aparılacağı hələlik naməlumdur”.
Günel CƏLİLOVA
