2022-ci ilin sonuna sayılı günlər qalıb. Qarşıdan yeni il gəlir. Yeni il bayramı münasibətilə valideynlər övladlarını sevindirmək üçün şəhərin müxtəlif ərazilərində satılan yeni il bağlamaları alırlar. Yeni il bağlamaları market, dükan, metro çıxışlarında, bir sözlə, şəhərin istənilən ərazisində satılır.
Yeni il hədiyyələrinin satış qiyməti 5 manatdan başlayır. Bu bağlamaların içərisinə, əsasən, uşaqlar üçün şokolad, peçenye, şar və müxtəlif cür şirnilər qoyulur. İddia olunur ki, səyyar şəkildə satışa çıxarılan bağlamaların içərisində əksər hallarda vaxtı ötmüş məhsullar olur.
“Uşaqlara qablaşdırılmış Yeni il hədiyyələri alan valideynlər aldıqları hədiyyələri açıb içindəkilərə baxmalıdır, əks halda…”
Azad İstehlakçılar Birliyinin sədri Eyyub Hüseynov bildirdi ki, çox zaman "Yeni il hədiyyələri" adı altında qablaşdırılan qutuların içərisinə vaxtı keçmiş, üzərində yararlılıq müddəti qeyd edilməyən məhsullar qoyulur. Bu da uşaqlarda zəhərlənmə hallarının baş verməsinə səbəb olur: “Bu səbəbdən vətəndaşları diqqətli olmağa çağırıram. İstehlakçılar həmin qutuları alarkən onların içərisində olan bütün qidaların tarixinə baxmalı, hüquqlarının müdafiəsi üçün fəallıq göstərməlidirlər. Yeni il bayramı günlərində bu hədiyyələrlə əlaqədar şikayətlər edilir. İstehlakçılar belə hallarla rastlaşdıqda, şikayətini bildirməlidir. Uşaqlara qablaşdırılmış Yeni il hədiyyələri alan valideynlər aldıqları hədiyyələri açıb içindəkilərə baxmalıdır”.
Birlik sədri onu da əlavə etdi ki, hər il bayram şənliklərində ekzotik qutularla yararlılıq müddəti keçmiş mallar qablaşdırılır və istehlakçılara verilir. Valideynlər isə bu hədiyyələri alır, verir uşaqlara, özlərinin başı şənliyə qarışır, uşaqları nəzarətsiz qoyurlar və zəhərlənmə halları baş verir. Hətta ola bilər yararlılıq müddəti keçməsin, amma məhsul xarab olmuş olsun. Belə hallarda da istehlakçının 14 gün ərzində həmin malları qaytarmaq və pullarını geri almaq, həmçinin şikayət etmək hüququ var: “Uşaqlarının sağlamlığı naminə valideynlər belə hədiyyələr alarkən diqqətli olmalıdırlar. Hər bir valideyn yeni il hədiyyə paketi alarkən içindəki şirniyyatların keyfiyyəti ilə maraqlanmalı, qutuların üzərindəki son istifadə tarixinə nəzər salmalı və məhsulların hansı ölkədə istehsal olunması ilə də maraqlanmalıdır. Valideyn uşağına yeni il hədiyyə bağlaması və yaxud şirniyyat alarkən mütləq diqqətli olmalıdır. Çünki onları sevindirməyə çalışdığınız halda, həyatları ilə oynaya bilərsiniz".
Günel CƏLİLOVA
