Öz davranışı ilə bir sıra xalqların qadınlarına nümunə olan Azərbaycan qadını harada olsa öz milli mənsubiyyətini qoruyur və övladlarını da bu ruhda tərbiyə edir. Amma təəssüf ki, bəzi cəmiyyətlərdə Azərbaycan qadınına qarşı milli ayrıseçkilik də müşahidə olunur.
Rusiya Federasiyasının Surqut şəhərində yaşayan 3 uşaq anası, əslən Tovuz rayonundan olan soyadaşımız Məmmədova Raya Sabir qızı kimi. Onu da qeyd edək ki, azərbaycanlılar, xüsusən də qadınlarımız hansı ölkədə yaşayırlarsa, hər zaman o ölkənin, o cəmiyyətin qanun-qaydalarına əməl edirlər. Amma təəssüf ki, bəzi hallarda milli ayrı-seçkilik həvəskarları bizim qadınlara qarşı haqsızlıqlar edirlər. Raya Sabir qızı Məmmədova da yaşadığı ölkədə, yaşadığı cəmiyyətdə haqsızlıqla üzləşib. O bu barədə əməkdaşımız Məhəmmədəli Qəribliyə müsahibəsində danışıb. 3 uşaq anası olan soydaşımızın uzaq Rusiyada siyasi motivlə həbs olunması təhlükəsi var və əsassız şikayət əsasında Raya xanım həbsə atıla bilər.
M.Qəribli Facebook səhifəsində soyadımızın problemini yaydığı video ilə ictimailəşdirib ki, Azərbaycan xalqı olaraq susmayaq və soydaşımıza sahib çıxaq :“Çox xahiş edirəm, bu videonu sona qədər izləyib paylaşaq ki, geniş ictimaiyyətə çata bilsin. Videoda danışan xanım əslən Tovuz rayonundan olan soydaşımızdır. Rusiyanın Surqut şəhərinfə yaşayır, 3 uşaq anasıdır. Adı - Məmmədova Raya Sabir qızıdır.
Yaşadığı binanın sakinləri arasında yaradılan votsap qrupunda xanımın uşaqlarının və özünün milli mənsubiyyətini təhqir ediblər. Xanım da adekvat cavab verərək, rusları təhqir edib. Bunu danmır, əsəbi halda olduğu səbəbindən söylədiyini bildirir, hətta publik olaraq üzürhaqlıq da edib.
Ancaq Rusiyanın hüquq-mühafizə orqanları və media nümunələri bu məsələni elə səviyyədə şişirdiblər ki, xanımın həbsə getməkdən başqa şansı qalmır. Ona “Milli münasibətləri qızışdırma” maddəsi ilə ittiham verilib. 6 aydır ki, istintaq və məhkəmə gedir. Vəkili bildirib ki, növbəti məhkəmə iclasında xanıma 4 il həbs cəzası nəzərdə tutulan hökm elan ediləcək.
Həmin maddədə pul cəriməsi, şərti cəza da nəzərdə tutulsa da, məhkəmə həbs qərarı verməkdə israrlıdır. Ancaq bildirirlər ki, bu qərar verilsə də, soydaşımızın himayəsində azyaşlı uşaq olduğu üçün 3 il sonra icraya yönəldiləcək. İstənilən halda, bunun adı həbsdir!
Dəyərli dostlar! Hamı Ukraynadakı Misir Qasımlı kimi qışqırıb-bağıra, dəmir barmaqlıqları təpikləyə və siyasi şüarlar səsləndirə bilmir ki, diqqəti özünə cəlb edə bilsin. Əsl siyasi motivlə bu xanım həbs edilib və ona nə cəmiyyətimiz, nə diasporumuz, nə də ki, Rusiyadakı səfirliyimiz səviyyəsində heç bir dəstək yoxdur.
Mən bu müraciəti bütün sosial şəbəkə hesablarımızda yerləşdirmişəm və onların linkini şərh bölümündə paylaşacam. Gəlin, qərib eldə olan bir azərbaycanlı xanımı tək buraxmayaq. Kimin əlindən nə dəstək gəlirsə, versin!”
Raya xanımın üzləşdiyi problem doğrudan da acınacaqlıdır. Hesab edirik ki, ölkəmizin qadın hüquqlarını müdafiə edən təşkilatları bu məsələyə biganə qalmalı deyil.
“Raya xanımı meydanda tək qoymamalıyıq, onun probleminə biganə qalmaq olmaz”
“Vəfa” Sosial İctimai Birliyinin sədri Fatimə Hacıbəyli “Bakı-Xəbər” qəzetinə açıqlamasında bildirdi ki, bütün cəmiyyət, bütün qadın təşkilatları Raya Sabir qızının hüquqlarının bərpası istiqamətində əlindən gələni etməlidir. “Əlbəttə, üç uşaq anası olan Azərbaycan xanımının uzaq Surqutda, yad eldə bu cür aqibətlə üzləşməsi bizim hər birimizi narahat etməlidir. Biz hər birimiz xanım soydaşımıza dəstək verməli və onun yanında olmalıyıq. Düşünürəm ki, orada fəaliyyət göstərən diaspor təşkilatlarımız, ictimai fəallar, eləcə də Rusiyadakı səfirliyimizin əməkdaşları Raya xanımın üzləşdiyi haqsızlığa səssiz qalmamalıdır. Heç birimiz xanım soydaşınızın üzləşdiyi haqsızlığa biganə qala bilmərik. Hesab edirəm ki, səfirliyimiz, diaspor təşkilatlarımız hərəkətə keçməlidir. Hər bir azərbaycanlının hüquqlarını, haqqını qorumaq borcumuzdur. Raya xanımı meydanda tək qoymamalıyıq, onun probleminə biganə qalmaq olmaz”.
F.Hacıbəyli qeyd etdi ki, Azərbaycan tolerant ölkədir və burada heç bir xalqın nümayəndəsinə qarşı ayrıseçkiliyə yol verilmir. Azərbaycanlıların da tolerantlıqları ilə xüsusi seçildiyini deyən F.Hacıbəylinin sözlərinə görə, buna baxmayaraq, bəzən soydaşlarımız başqa ölkələrdə ayrı-seçkiliklə qarşılaşır. “Hesab edirəm ki, Surqutdakı diaspor təşkilatımız, oradakı üzdə olan şəxslər, fəallar xanım soydamızın ədalətsiz qərarın qurbanı olmasına imkan verməməlidirlər. Onlara səslənirəm ki, üç uşaq anası olan soydaşımızı tək qoymayın və onun hüquqlarını bərpa etmək üçün əlinizdən gələni edin” - deyə F.Hacıbəyli qeyd edir.
İradə SARIYEVA
