Hazırda təhsil sahəsində əsas problemlərdən biri siniflərdə şagird sıxlığıdır. Bu sıxlıq daha çox Bakı və Abşeron məktəblərində müşahidə olunur. Şagird sıxlığı təhsilin keyfiyyətinə birbaşa təsir edən amillərdəndir.
Sinifdə 40 və daha artıq şagirdin olması müəllimin dərsi uşaqlara çatdırmasını, hər bir uşağa fərdi yanaşmasını mümkünsüz edir. Bu da uşaqların bilik səviyyəsinin aşağı düşməsinə səbəb olur.
Valideynləri də narahat edən məhz bu sıxlıqdır ki, onlar övladlarının normal təhsil ala bilmədiyindən şikayətlənirlər. Onların fikrincə, say çoxluğu şagirdlərin keyfiyyətli təhsil almasına, normal biliyə yiyələnməsinə mane olur. Abşeron rayonu, Ceyranbatan qəsəbəsi 2 nömrəli tam orta məktəbdə şagird sıxlığı yaşandığından, dərslər yaxınlıqda olan tibb məntəqəsinin ambulator korpusunda keçirilir. Valideynlər məktəbdə şagird sıxlığından və dərsin tibb məntəqəsində keçirilməsindən narahatdırlar. Valideynlər qeyd edir ki, tibb məntəqəsində dərs keçmək üçün şərait yoxdur.
Abşeron-Xızı Regional Təhsil İdarəsi: “Vəziyyətlə bağlı aidiyyəti qurumlara müraciət edilib”
Abşeron-Xızı Regional Təhsil İdarəsindən bildirildi ki, vəziyyətdən xəbərdardırlar: “Vəziyyətlə bağlı aidiyyəti qurumlara müraciət edilib. Dövlət proqramı çərçivəsində məsələ öz həllini tapacaq”.
Nizami Hüseynov: “Problemdən çıxış yolu kimi dərsin tibb məntəqəsində keçirilməsi düzgün deyil”
Təhsil eksperti Nizami Hüseynov bildirdi ki, sıxlıq məsələsi ümumilikdə ölkə məktəbləri üçün deyil, əsasən paytaxtda fəaliyyət göstərən məktəblər üçün xarakterikdir: "Bölgələrdə elə məktəblər var ki, sinifdə şagird sayı maksimum 20-dir. Ancaq bölgələrdən fərqli olaraq, Bakı məktəblərində mənzərə tamamilə fərqlidir. Paytaxt və ətraf ərazilərdəki məktəblərdə 20 şagirdlik bir sinif tapmaq mümkün deyil. Minimum 35 şagird. Bu problem əsasən məskunlaşma ilə bağlı yaranır. Məktəbə qəbul qaydalarında ərazi amili önə çəkilir. Ona görə də əhalinin sıx yaşadığı yerlərdə yerləşən məktəblərdə sıxlıq yaranır”.
Ekspert onu da əlavə etdi ki, yeni yaşayış sahəsi salınan ərazilərdə yeni tikililərə kupça yox, müqavilə verildiyindən insanlar yaşadığı ərazi üzrə daimi qeydiyyata düşə bilmirlər. Nəticədə də orta məktəblərdə şagird sıxlığı yaranır. Mövcud problemdən çıxış yolu şagird sıxlığı olan məktəblərdə şagird tutumunu artırmaqdır: "Hansı məktəblərdə sıxlıq yaranarsa, o məktəblərdə mərtəbə sayı ən azı 3-ə çatdırılmalıdır. Problemdən çıxış yolu kimi dərsin tibb məntəqəsində keçirilməsi düzgün deyil".
Günel CƏLİLOVA
